សម្តេចតេជោ ហ៊ុន សែន អញ្ជើញទស្សនាគម្រោងផលិតផលបច្ចេកវិទ្យា របស់មជ្ឈមណ្ឌលអភិវឌ្ឍកុំព្យូទ័រទំនើបឥណ្ឌា

ក្នុងឱកាស​នៃការស្នាក់អាស្រ័យបំពេញទស្សន​កិច្ច​ការងារ នៅទីក្រុងញ៉ូវដែល្លី សាធារណរដ្ឋឥណ្ឌា នារសៀល ថ្ងៃទី២៤​មករា សម្តេច​អគ្គ​មហា​សេនា​បតីតេជោ ហ៊ុន សែន នាយករដ្ឋមន្រ្តី នៃព្រះរា​ជា​ណា​ចក្រ​កម្ពុជា អញ្ជើញ​​ទស្សនាគម្រោង​ផលិត​ផលបច្ចេកវិទ្យា របស់​មជ្ឈមណ្ឌល​អភិវឌ្ឍ​កុំព្យូទ័រ​ទំនើបឥណ្ឌា។ វត្តមាន​នៃកា​រអញ្ជើញ​ដល់​​របស់​សម្តេច​តេជោ​ នាយករដ្ឋមន្រ្តី ត្រូវបាន​ការ​ធ្វើគារ​វកិច្ច​ស្វាគមន៍​យ៉ាង​ស្និទ្ធស្នា​ល និង​រ៉ាក់​ទាក់​បំផុត ពីថ្នាក់​ដឹកនាំ បុគ្គលិក របស់​មជ្ឈ​មណ្ឌល​អភិវឌ្ឍ​កុំព្យូទ័រទំនើប​ឥណ្ឌា​ជា​ច្រើន​រូប។

សម្តេចតេជោ នាយករដ្ឋមន្រ្តី ក៏ដូចជាថ្នាក់ដឹកនាំ​ជាន់​ខ្ពស់រាជ​រដ្ឋាភិបាល​កម្ពុជា បានធ្វើការ​តាម​ដាន​ស្តាប់យ៉ាង​យកចិត្ត​ទុក​ដាក់ លើ​បទ​បង្ហាញ​ស្តីពី​គម្រោង​ផលិត​ផល បច្ចេក​វិទ្យា​របស់​មជ្ឈ​មណ្ឌល​អភិវឌ្ឍ​កុំព្យូទ័រ​ទំនើប (Centre for Development of Advanced Computing) របស់​សាធារណរដ្ឋឥណ្ឌា។ បទបង្ហាញ​ដែល​លើក​ឡើង​ដោយ ឯកឧត្តម Ravi Shankar Prasad រដ្ឋមន្រ្តីក្រសួង​អេឡិច​ត្រូ​និក និងបច្ចេកវិទ្យា​ព័ត៌មាន​ឥណ្ឌា បាន​ឪ្យដឹង​ថា មជ្ឈ​មណ្ឌល​នេះគឺជា​ទីកន្លែង​ប្រមូល​ផ្តុំដោយ​ការសិក្សា​ស្រាវជ្រាវ និងការ​អនុវត្ត​ជាក់ស្តែង ក៏ដូចជា​ការរក្សា​ទុក​បណ្តាទិន្នន័យ​នានា លើ​ប្រព័ន្ធ​អ៊ីន​ធើណែត ក្នុងការគ្រប់​គ្រង​លើគ្រប់​​ផ្នែក និងគ្រប់​ទីកន្លែង​ក្នុង​ប្រទេស​ឥណ្ឌា និងក៏ជា​ការភ្ជាប់​ទំនាក់​ទំនង​ទៅកាន់​បណ្តា​ប្រទេស​មួយ​ចំនួន ទាំងនៅ​ក្នុង​តំបន់ និង​ក្រៅតំបន់។ ជាមួយគ្នានេះ​ឯកឧត្តម រដ្ឋមន្រ្តីក៏​បាន​លើក​ឡើងពី ការគ្រ​ប់គ្រង​ទិន្នន័យ​ដល់​ប្រជាកសិករ និង ការធ្វើអាជីវកម្ម​គ្រប់​បែបយ៉ាង​ទាំងក្នុង​ប្រទេសឥណ្ឌា និងអន្តរ​ជាតិនានា ពិសេសការ​ភ្ជាប់ទៅ និងបណ្តាសាកលវិទ្យា​ល័យ​ធំៗ​លើ​ពិភព​លោក​ប្រមាណ ១៦ម៉ឺនកន្លែង។ នៅក្នុង​ពិធី​នោះដែរ សម្តេចតេជោ​ នាយករដ្ឋមន្រ្តី​មាន​ប្រសាសន៍ សំដែង​នូវការ​វាយ​តម្លៃ​ខ្ពស់ និង​កោត​សរសើរ​ចំពោះថ្នាក់​ដឹកនាំ នៃក្រសួង​អេឡិច​ត្រូ​និក និងបច្ចេកវិទ្យា​ព័ត៌មានឥណ្ឌា ពិសេសថ្នាក់​ដឹកនាំ នៃមជ្ឈមណ្ឌលអភិវឌ្ឍកុំព្យូទ័រទំនើប (Centre for Development of Advanced Computing) ដែលបានអនុញ្ញាតនិងផ្តល់​ឱកាសឲ្យរូបសម្តេចបានមកធ្វើការស្វែងយល់ សិក្សាពីគំរោងអាទិភាពនានា នៅក្នុងមជ្ឈ មណ្ឌលនេះ។ ជាមួយគ្នា​នេះស​ម្តេចតេជោ នាយករដ្ឋមន្រ្តី បានស្នើដល់ភាគីឥណ្ឌា ធ្វើការសិក្សានិងផ្តល់លទ្ធភាពក្នុង ការភ្ជាប់ទំនាក់ទំនង​ជាមួយកម្ពុជា ដើម្បីឲ្យកម្ពុជាបាន​ធ្វើការតភ្ជាប់និងផ្តល់​នូវព័ត៌មាន ពីគ្នាទៅវិញទៅ​មកលើប្រព័ន្ធ ព័ត៌មានវិទ្យា​ដ៏មានសារៈសំខាន់នេះ។

នៅក្នុងពិធី​ដ៏មាន​អត្ថន័យ​នោះដែរ បន្ទាប់ពីការធ្វើ​បទ​បង្ហាញ​ស្តីពីគម្រោង ផលិត​ផល​​បច្ចេកវិទ្យា​របស់មជ្ឈមណ្ឌលអភិវឌ្ឍកុំព្យូទ័​រទំនើប​រួចមក សម្តេច​តេជោ​ នាយករដ្ឋមន្រ្តី និងគណះប្រតិភូ បានអញ្ជើញទស្សនា​នូវការប​ង្ហាញជាក់ស្តែង ស្ទីពីការ​តភ្ជាប់​នូវប្រព័ន្ធ​បច្ចេកវិទ្យា​ទំនើប ការគ្រប់គ្រងទន្នន័យ ការ​តម្លើង​ប្រព័ន្ធ Software ការចុះ​​បញ្ជីដីធ្លី និង​ឯកសារ​ផ្សេងៗ តាមរយះប្រព័ន្ធព័ត៌មាន​វិទ្យាបែបទំនើប ពិសេសការ​តភ្ជាប់ពី ប្រទេសឥណ្ឌា​ទៅកាន់​ប្រទេស​ដទៃទៀត លើពិភពលោក។

នៅក្នុងពិធីនោះដែរ សម្តេចតេជោ នាយករដ្ឋមន្រ្តី និង​គណៈប្រតិភូជាន់​ខ្ពស់បាន​ចំណាយពេល​ប្រមាណ៣០នាទី ក្នុងការទស្សនាស្វែងយល់ និងការស្តាប់នូវ​បទបង្ហាញ​​ស្តី​ពីគម្រោងផលិតផល​បច្ចេកវិទ្យា របស់មជ្ឈមណ្ឌល​អភិវឌ្ឍកុំព្យូទ័រ​ទំនើប (Centre for Development of Advan​ced Computing) ។

សូមបញ្ជាក់ដែរថា សាធារណរដ្ឋឥណ្ឌា មានផ្ទៃក្រឡាទំហំ៣លាន​២៨៧​ពាន់​២៦​៣​គីឡូ​ម៉ែត្រការ៉េ ចែកជា២៩រដ្ឋ និង៧ដែនដី ចំណុះរដ្ឋសហភាព មានព្រំប្រទល់ជាប់និងប្រទេសបង់ក្លាដែស ប៊ូតាន មីយ៉ានិម៉ារ ចិន នេប៉ាល់ និងប៉ាគីស្ថាន និង​មានប្រជាជន​សរុបចំនួន​១ពាន់២៧០លាននាក់ តួលេខក្នុងខែកក្កដា ឆ្នាំ២០១៦។ ថ្ងៃ​បុណ្យ​​ជាតិ​របស់សាធារណ​រដ្ឋឥណ្ឌា គឺនៅថ្ងៃទី២៦ ខែមករាឆ្នាំ១៩៥០។ ស្ថានភាពសេដ្ឋកិច្ច​របស់សាធារណ​រដ្ឋ​ឥណ្ឌា កាលពីឆ្នាំ២០១៦​កន្លងទៅ កំណើនសេដ្ឋកិច្ច​ប្រចាំឆ្នាំ​មាន​ទំហំ៧,៦% ក្នុងនោះ GDP សម្រាប់​មនុស្ស​ម្នាក់​ស្មើនិង ១​ពាន់៧០៩,៦​ដុល្លា​អាមេរិក​។ ផលិតផល​តាមវិស័យ​គិតជា​ភាគរយ ក្នុងវិស័យក​សិកម្មមាន១៧,៤% ឧស្សាហកម្ម​​មាន​២៨,៨% និង​សេវាកម្ម​មាន៤៦,២% ជាមួយ​គ្នានេះ​ទំហំពាណិជ្ជកម្ម​ នៃការនាំចេញ​របស់សាធារ​ណរដ្ឋឥណ្ឌា កាល​ពីឆ្នាំ២០១៦ មានទឹក​ប្រាក់សរុប ២៦៨,៦ពាន់លានដុល្លា ឯការនាំចូលមាន​ទឹកប្រាក់សរុប ៣៧៦,១​ពាន់​លាន​ដុល្លា។

សូមបញ្ជាក់​ដែរថា នៅក្នុង​ដំណើរ​នៃការ​អញ្ជើញទ​ស្សនកិច្ច​នោះដែរ ថ្នាក់ដឹកនាំ​ឥណ្ឌាក៏បាន​ចាត់ទុក​ថា វត្ត​មាន របស់សម្តេច​តេជោ​ នាយករដ្ឋមន្រ្តី​នៅពេលនេះ គឺជាការជួយជំរុញ​លើកទឹកចិត្ត​ដល់ថ្នាក់​ដឹកនាំឥណ្ឌា ពិសេស​​ថ្នាក់មជ្ឈ​មណ្ឌល​អភិវឌ្ឍកុំព្យូទ័រទំនើបនេះ កាន់តែមានស​កម្មភាព​រស់រវើក​ថែមទៀត ក្នុងការស្រាវជ្រាវ​រក នូវ​រកប គំហើញថ្មីៗ ក្នុង​ការ​អភិវឌ្ឍប្រព័ន្ធព័​ត៌មានវិទ្យា​នេះជាមួយ និងបណ្តាប្រទេស​ជឿន​លឿននានា លើសកលលោក។

ពត៌មានទាក់ទង

ពត៌មានផ្សេងៗ