សម្ដេចតេជោ ហ៊ុន សែន អញ្ជើញចូលរួមកិច្ចប្រជុំកំពូលរំលឹកខួបអនុស្សាវរីយ៍អាស៊ាន-កាណាដា លើកទី៤០

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញចូលរួម កិច្ចប្រជុំកំពូលរំលឹកខួបអនុស្សាវរីយ៍អាស៊ាន-កាណាដា លើកទី៤០ ដែលធ្វើឡើងនៅ Reception Hall, PICC ទីក្រុងម៉ានីល ប្រទេសហ្វីលីពីន។

សម្តេចតេជោនាយករដ្ឋមន្រ្តី បានស្វាគមកម្មវិធីអាហារូបករណ៏សំខាន់ថ្មីនៃគម្រោងកម្មវិធីផ្លាស់ប្តូរវិស័យ អប់រំ ដែលមានថវិកា១០លានដុល្លារកាណាដា ដែលផ្តល់ការបណ្តុះបណ្តាលដល់យុវជន អ្នកជំនាញវ័យកណ្តាល ជាពិសេសស្រ្តីពីកម្ពុជា ឡាវ មីយ៉ាន់ម៉ា និងវៀតណាម។ សម្តេចតេជោបានសើ្នកាណាដាបន្តផ្តល់ជំនួយបច្ចេកទេស ដល់អាស៊ាន ជាពិសេសកម្ពុជា ឡាវ និងមីយ៉ាន់ម៉ា ដើម្បីលើកកំពស់ការអភិវឌ្ឍគម្រោងនវានុវត្តន៍ និងកំណើន សេដ្ឋកិច្ច ព្រមទាំងពិចារណាផ្តល់ជំនួយបច្ចេកទេស និងហិរញ្ញវត្ថុដល់មជ្ឈមណ្ឌលតំបន់អាស៊ានសម្រាប់សកម្មភាពមីន។ ថ្នាក់ដឹកនាំអាស៊ាន និងកាណាដា បានឯកភាពគ្នាក្នុងការណែនាំដល់មន្រ្តីសេដ្ឋកិច្ច ចាប់ផ្តើមកិច្ចពិភាក្សារិះរកកិច្ចព្រមព្រៀងពាណិជ្ជកម្មសេរីអាស៊ាន- កាណាដា ដ៏មានសក្តានុពលមួយ។ នៅក្នុងកិច្ចប្រជុំកំពូលនោះដែរ មេដឹកនាំអាស៊ាន កាណាដា ក៏បានធ្វើការកត់សំគាល់ចំពោះភាពរីកចម្រើនទៅមុខ នៃទំនាក់ទំនងដៃគូសន្ទនាអាស៊ាន កាណា ដោយមាន ជំនឿជឿជាក់ថា ឆ្នាំ២០១៧គឺជាឆ្នាំដ៏ល្អសម្រាប់អាស៊ាន កាណាដា ក្នុងការពង្រឹងនិងពង្រីកសហប្រតិបត្តិការប្រកបដោយអត្ថប្រយោជន៍ទៅវិញទៅមក ខណៈពេលដែលភាគីទាំងពីរអបអរសាទរខួបអនុស្សាវរីយ៍លើកទី៤០ នៃទំនាក់ទំនងរបស់ខ្លួន។