សម្រង់​ប្រសាសន៍​សម្តេច​តេជោ ហ៊ុន សែន ថ្លែង​ក្នុងពិធីប្រគល់ប្រាក់រង្វាន់រាជរដ្ឋាភិបាលជូនជ័យលាភីមេដាយមាស ក្នុងការប្រកួតជាលក្ខណៈអន្តរជាតិ

141

CNV:

សម្តេច ឯកឧត្តម លោកជំទាវ អស់លោក លោកស្រី អ្នកនាងកញ្ញា!

ថ្ងៃនេះ ខ្ញុំពិតជាមានការរីករាយ ដែលបានជួបអ្នកទាំងអស់គ្នាសាជាថ្មីម្តងទៀត ហើយក៏សូមយក​ឱកាស​នេះ ក្នុងនាមរាជរដ្ឋាភិបាល ខ្ញុំសូមសំដែងការអបអរសាទរ ចំពោះជ័យលាភីទាំងអស់ គឺគ្រប់កម្រិតនៃ​ការ​ប្រកួត ដែលបាននាំមកនូវកិត្តិយសជាតិថ្ងៃនេះ ដែលខ្ញុំសូមស្នើអោយអង្គពិធីទាំងមូលទះដៃអបអរសាទរ។

កីឡាមិនមែនដើម្បីដូរប្រាក់ ត្រូវរក្សាតម្លៃ និងមានការយោគយល់គ្នាទៅវិញទៅមក

កីឡារបស់យើងពិតជានាំមកនូវវឌ្ឍនភាព ហើយដែលអម្បាញ់មិញ ឯកឧត្តម ហង់ ជួនណារ៉ុន ក៏បានធ្វើ របាយការណ៍ជូនអង្គប្រជុំរួចហើយ សូម្បីតែឥណទានថវិកាដែលបានត្រៀមបម្រុង គឺមិនគ្រប់គ្រាន់ យើង​បានចាយលើសពី ៣ ពាន់លានរៀល ឡើងទៅដល់ជាង ១២ ពាន់លានរៀល ហើយក៏មិនទាន់គ្រប់ ជាមួយនឹងកីឡាករ/ការិនីថ្មីៗ ដែលទើបនឹងបានទទួល។ ក្នុងពេលដែលខ្ញុំអបអរសាទរ​ជាមួយនឹង​កីឡា​ករ/ការិនី ដែលជាជ័យលាភីនៅទីនេះ ខ្ញុំក៏សូមយកឱកាសនេះ និយាយទៅកាន់ក្មួយៗ ក៏ដូចជា អ្នក​គាំទ្រ​ទាំងឡាយ មេត្តាយោគយល់ អធ្យាស្រ័យ ហើយយើងតាំងខ្លួនជាអ្នកកីឡាស្អាតស្អំ កីឡាមិន​មែន​ដើម្បី​ដូរប្រាក់ ព្រោះរយៈពេលកន្លងទៅ ខ្ញុំក៏បានឃើញនូវការបង្ហោះតាមហ្វេសប៊ុកមួយចំនួន ដែល​នេះ​ជាការ​ទម្លាក់ខ្លួនរបស់ក្មួយៗ ឬក៏អ្នកគាំទ្រក្មួយៗទៅវិញទេ។

ទោះបីជាមេដាយថ្នាក់ណាក៏ដោយ បើសិនជាអង្គុយទាមទារនូវប្រាក់ប្រញាប់ប្រញាល់ហួស ច្បាស់ជានឹង ធ្វើអោយតម្លៃ ដែលយើងប្រកួតប្រកបដោយកិត្តិយសត្រូវធ្លាក់ចុះទៅវិញ។ អារម្មណ៍បែបនេះខ្ញុំយល់ ក៏ប៉ុន្តែ យើងត្រូវយល់នូវអ្វីដែលគេហៅថា ការចាយវាយប្រាក់ ប្រសិនបើយើងកំណត់បានជាមុន យើងមិនខុស បានពីការរៀបចំពិន្ទុទុកជាមុនសម្រាប់ការប្រកួតទេ។ យើងច្បាស់ជាត្រៀមបម្រុងនូវថវិកាគ្រប់គ្រាន់សម្រាប់​ការបើកផ្តល់អោយក្រសួងអប់រំ យុវជន និងកីឡា។ មានពេលមួយ ឯកឧត្តម ថោង ខុន បានស្នើសុំ​រៀបចំ​ពិធីជូនរង្វាន់សម្រាប់កីឡារបស់យើង ក៏ប៉ុន្តែ ក្រសួងអប់រំ យុវជន និងកីឡា ដែលជាអាណាប័កនឹង​ទទួល ខុសត្រូវទៅលើបញ្ហាថវិកា បានជម្រាបស្នើសុំពន្យារពេល ព្រោះអ្នកទាំងពីរមិនបានពិគ្រោះពិភាក្សាគ្នាទេ។ រឿង​នេះ សុំបញ្ជាក់ជូនថា នៅក្នុងក្របខណ្ឌនៃថវិកាជាតិ ការរៀបចំថវិកាគឺមានបែបបទថវិកា។ គ្មាន​អ្នក​​ណាមួយដែលមានសិទ្ធិក្នុងការផ្ទេរថវិកានៅជំពូកនេះ បញ្ជូលទៅក្នុងជំពូកមួយទៀតទេ ហើយបើ​ចង់​ធ្វើ​បែប​នោះ ទាល់តែមានអនុក្រឹត្យ។

ក្រសួងអប់រំ យុវជន និងកីឡា គេបានទទួលនូវថវិកា សម្រាប់ជាប្រាក់រង្វាន់ប្រចាំឆ្នាំមានត្រឹមតែ ៣,២០០ លានរៀល តែប៉ុណ្ណោះ ប៉ុន្តែឆ្នាំនេះ ដោយសារតែសមត្ថភាពកើនឡើងរបស់កីឡាករ/ការិនីរបស់យើង គឺ​បានកើនឡើងទៅដល់កម្រិតចំណាយមកដល់ពេលនេះ ១២ ពាន់ ៥០០ លានរៀល។ អញ្ចឹង វាខុស​ត្រូវ​​គ្នា​ច្រើនដងណាស់។ អញ្ចឹង ក្រសួងខ្លួនឯងត្រូវធ្វើនិយ័តភាពផ្ទៃក្នុងនៃថវិកា បន្ថែមលើនោះ ត្រូវស្នើសុំរាជ​រដ្ឋាភិបាល (ដែល)ក្នុងឋានៈខ្ញុំជានាយករដ្ឋមន្ត្រី តើខ្ញុំចង្អុលទៅយកថវិកានៅកន្លែងណា? ត្រូវអោយ​ក្រសួងសេដ្ឋកិច្ចហិរញ្ញវត្ថុ ពិនិត្យមើល តើនៅកន្លែងណាត្រូវបង្វែរចេញ ដើម្បីមកបញ្ចូលអោយខ្ទង់នៃ​ប្រាក់​ចំ​ណាយនេះ? ប្រសិនបើចំពោះមិនទាន់បែងចែក មិនទាន់បានប្រើប្រាស់ទេ វាអាចងាយស្រួល ក៏ប៉ុន្តែ ក្មួយៗ​អើយ ជិតចុងឆ្នាំមិនមែនជាការងាយស្រួលទេ។ ប៉ុន្តែ ជាអកុសល ប្រហែលជាក្មួយៗជាកីឡាករ​/ការិនី ដែល​ជាអ្នកទទួលបានពានរង្វាន់នេះ មិនមែនជាអ្នកបង្ហោះតាមហ្វេសប៊ុកទេ តែយើងអាចសង្កេត​ឃើញនៅក្នុង​បណ្តាញ​សង្គម​នោះ វាទៅជាអ្នកគាំទ្រ ឬអ្នកដទៃទៅវិញ។

ធ្វើយ៉ាងដូច្នេះ វាជាការបន្តុះបង្អាប់មួយសម្រាប់កីឡាករ/ការិនី ដែលយើងជាអ្នកគាំទ្រពួកគាត់។ សម័យ​ថ្ងៃ​មួយ វាជារឿងចៃដន្យប្រញាប់ប្រញាល់ពេក ស៊ន សៀវម៉ី ត្រូវការវះកាត់បន្ទាន់ ត្រូវបញ្ជូនទៅ​សា​ធារ​ណ​រដ្ឋ​កូរ៉េ។ ពេលនោះយើងមិនមានប្រាក់ ចំពោះចំណាយសម្រាប់ផ្នែកនេះទេ ឯកឧត្តម ហង់ ជួនណារ៉ុន បាន​ដោះស្រាយប្រាក់ប្រមាណជាង ២ ពាន់ដុល្លារសហរដ្ឋអាមេរិក ជាប្រាក់គ្រួសាររ​បស់គាត់។ គាត់បាន​ស្នើ​សុំ​មករាជរដ្ឋាភិបាលនូវប្រាក់ ៥ ពាន់ដុល្លារ សម្រាប់ ស៊ន សៀវម៉ី ប៉ុន្តែ ដោយឃើញភាពបន្ទាន់ ខ្ញុំ​មិន​ពឹង​ពាក់ទៅលើថវិកាដែលលើរាជរដ្ឋាភិបាលទេ បើត្រូវការថវិការាជរដ្ឋាភិបាល វាត្រូវការពេលវេលាទៅទៀត ហើយថ្ងៃនោះចំថ្ងៃឈប់សម្រាក ដែលជាថ្ងៃដែលគេមិនអនុញ្ញាតអោយបញ្ចេញសាច់ប្រាក់នោះទេ។ ពូក៏​ត្រូវ​ចេញ​ប្រាក់ ១ ម៉ឺនដុល្លារសហរដ្ឋអាមេរិក ដើម្បីជួយជម្រុញបន្ទាន់ ធ្វើទៅម៉េចអោយដល់ ស៊ន សៀវម៉ី នៅ​ក្នុង​ការវះកាត់។

នេះខ្ញុំសូមស្នើដោយទទូច ចំពោះក្មួយៗ ទោះបីថា សាម៉ីខ្លួនក្តី ឬក៏អ្នកគាំទ្រក្តី សូមមេត្តាយោគយល់ ហើយ​តាំងចិត្ត និងតាំងកាយ ផ្លូវចិត្ត ផ្លូវកាយ អោយសមរម្យ ក្លាយទៅជាកីឡា ដែលមិនមែន​ជា​កីឡា​ដូរ​អង្ករ កីឡាដើម្បីដូរជាមួយប្រាក់នោះទេ។ ប្រាក់រង្វាន់ត្រូវទទួលហើយ។ ជ័យលាភីត្រូវបានស្វាគមន៍ និង​លើក​ទឹកចិត្ត ក៏ប៉ុន្តែយើងត្រូវយល់គ្នាទៅវិញទៅមក។ ប្រសិនបើប្រកួតឈ្នះភ្លាម មកដល់ភ្លាម ​​​បើក​លុយ​ភ្លាម នៅពោធិ៍ចិនតុងតែម្តង វាជារឿងមួយដូចជាអាក្រក់មើលខ្លាំងណាស់។ ថ្ងៃនេះ ទើបពូឆ្លៀត​និយាយ​បញ្ហា​នេះបន្តិច ដើម្បីយល់គ្នា បើមិនដូច្នោះ ថ្ងៃក្រោយការប្រកួតណាក៏ដោយ អោយតែចេញពីការប្រកួត ដឹង​តែ​មកដល់លុយៗ … អញ្ចឹង តម្លៃរបស់យើងនៅទីណាទៀត?

ក្រៅពីនោះ ក៏នៅមានបញ្ហាការប្រៀបធៀបនៅមិនទាន់អស់ ប៉ុន្តែ វាបានកាត់បន្ថយ។ មុននេះខ្ញុំធ្លាប់​បាន​និយាយ​​នៅកន្លែងនេះដែរ ពេលដែលខ្ញុំទៅចូលរួមប្រជុំនៅទីក្រុងបាងកក ពេលនោះមានការប្រកួតបាល់​ទាត់ រវាងបាល់ទាត់កម្ពុជា និងបាល់ទាត់ស្រីលង្ការ។ កំពុងតែទាត់នោះ គឺតង់ទី ១ យើងបានស៊ី​ស្រីលង្ការ​ដូចជា ២-០ រួចស្រេចទៅហើយ កាលហ្នឹងដូចជាយើងទាត់យកឈ្នះស្រីលង្ការ ៥-០ ឯណោះ។ ខ្ញុំកំពុង​មើល​ការ​ប្រ​កួត ព្រោះវាមិនមានការលំបាកទេ Download  One TV និង​ CCTV ចូលទៅក្នុងទូរស័ព្ទ។ យើងអាច​មើល​ការផ្សាយបន្តផ្ទាល់បានតាមរយៈទូរស័ព្ទ(របស់)យើង ទោះបីទៅទីណាក៏ដោយ។ ពេល​ដែលខ្ញុំជួប​ប្រ​ធានាធិបតីស្រីលង្ការ ខ្ញុំក៏បាននិយាយលេងជាមួយគាត់ថា ឥឡូវ យើងកំពុងតែមានការ​ប្រកួតជាមួយគ្នា កម្ពុជា​ស៊ី ៣-០ ហើយ ប៉ុន្តែ បើសិនករណីចុងក្រោយនេះ បើសិនជាលទ្ធផលល្អ អាចស្រីលង្ការ​ដណ្តើម​យក​ស្មើក៏អាចថាបាន ហើយបើសិនថាចាញ់ ចាំកម្ពុជាទៅលេងជាមួយស្រីលង្ការ យកឈ្នះស្រីលង្ការវិញ។ បន្ទាប់​ពីការប្រកួត នាយឧត្តមសេនីយ៍ សៅ សុខា ក៏បានឧបត្ថម្ភជាប្រាក់ សម្រាប់កីឡាករម្នាក់ៗ​ខាង​បាល់​ទាត់ គឺចំនួន ១ ពាន់ដុល្លារសហរដ្ឋអាមេរិក ទាំងកីឡា ទាំងគ្រូបង្វឹក សរុបទាំងអស់ជាង ៣០ នាក់ ជាង ៣ ម៉ឺនដុល្លារសហរដ្ឋអាមេរិក ដើម្បីលើកទឹកចិត្ត។ ប៉ុន្តែ ក៏ចាប់​ផ្តើម​មានការផុសចេញ អំពីការថ្នាំងថ្នាក់​ថា ​កី​ឡាប្រដាល់មិនត្រូវបានយកចិត្តទុកដាក់ទេ មានកីឡាដែល​ដណ្តើមបានមេដាយពិភពលោក មកដល់​ហើយ​ក៏​មិន​ព្រមផ្តល់។

យប់នោះ ខ្ញុំខិតខំសរសេរឆ្លើយតបតាម Page Facebook របស់ខ្ញុំ ដើម្បីឆ្លើយអំពីការយកចិត្តទុកដាក់​ទៅ​បញ្ហា​លើវិស័យកីឡាប្រដាល់ មានអ្នកណាយកចិត្តទុកដាក់លើសខ្ញុំទៅទៀតទេ? បើនិយាយពីកីឡា​ប្រដាល់​នោះ តាំងពីគ្មាន Sponsor ហើយពេលនោះ Sponsor មានតិចណាស់ ខុសពីឥឡូវ។ ឥឡូវ​ចាប់ពីល្ងាច​ថ្ងៃ​សុក្រនេះបាយ័នវាយហើយ ចាំមើលបាយ័នយប់នេះ វាយមានខ្មែរផង មានថៃផង ដល់​ថ្ងៃ​សៅរ៍ និងថ្ងៃ​អា​ទិត្យ គ្រប់ប៉ុស្តិ៍ទាំងអស់ គឺវាយ ហើយ Sponsor ពេញៗ។ ភរិយារបស់ខ្ញុំ គ្រាន់តែ​គាត់​មិន​ចេញមុខ មិនប្រកាសតែប៉ុណ្ណោះ គឺកីឡាប៉ុន្មានគាត់ស្គាល់ទាំងអស់ អ្នកណាគេវាយបាក់ដៃ អ្នកណា​គេ​វាយបាក់ជើង សូម្បីតែមួយនោះគ្នាមកពីបន្ទាយមានជ័យ។ ការពិតកំហុសដោយអចេតនាទេ រឿងកីឡា​នេះ គ្នាខំជិះតាក់​ស៊ី​មកវាយនៅប៉ុស្តិ៍បាយ័ន ដល់វាយទៅវាយខុសក្បួន បានសេចក្តីថា វាជ្រុលដៃ គេដួល​ហើយទៅថែម អាទាត់ទៅៗដកជើងយ៉ាងម៉េច? អាប៊ីតបណ្តេញចុះពីសង្វៀនប្រកួត។ ភរិយាខ្ញុំអោយ​ទាក់​ទងភ្លាម ហៅ​មក​ជូន​បាន ៣ ពាន់ដុល្លារ។ ទាត់គេខុសហើយ គាត់លួចជូនគេ ៣ ពាន់ដុល្លារថែមទៀត។ គាត់ចំណាយ​ទៅ​លើ​កីឡា ប៉ុន្តែ គាត់មិនប្រកាសនោះទេ។ កាលពីមុនគាត់មិនចេះមើលកីឡាប្រដាល់ទេ ឥឡូវអត់ទេ នៅជា​មួយ​គាត់មើលព័ត៌មានមិនបាន គាត់មើលតែប្រដាល់។

ខ្ញុំក៏បានបកស្រាយលើចំណុចមួយថា មេដាយពិភពលោកអោយតែបានមក សូមស្ពាយមក មេដាយ​ពិភព​លោក​ទៅបង្កើតត្រឹមតែប្រទេសថៃ អោយយើងទទួលស្គាល់ថាម៉េច? ក្របខណ្ឌនៃការប្រកួត មានចែង​នៅ​ក្នុង​អនុក្រឹត្យ ហើយត្រូវបានក្រសួងអប់រំ យុវជន និងកីឡា ជាអ្នកចាត់បញ្ជូន។ នៅក្នុងក្របខណ្ឌអូឡាំពិក ឬក្នុងក្របខណ្ឌ FIFA សហព័ន្ធកីឡាបាល់ទាត់ ក៏ត្រូវមានក្របខណ្ឌរបស់វា មិនអាចទៅរាយប៉ាយ ហើយ​ត្រឡប់មកវិញកាន់ស្អីមួយមក ថាពិភពលោកនោះទេ។ សូមយល់គ្នាអំពីបញ្ហានេះ បើមិនដូច្នោះ វា​ទៅ​ជាបាត់សណ្តាប់ធ្នាប់ក្នុងវិស័យកីឡារបស់យើង ដែលជាការគួរអោយសោកស្តាយ បង្កើតទៅ​ជា​រឿង​អនា​ធិបតេយ្យមួយ។ ហើយចំណុចនេះ គឺជាចំណុចដែលមិនមែនការឈានឡើងរបស់កីឡា ហើយធ្វើអោយ​បាត់​សណ្តាប់ធ្នាប់របស់កីឡាទេ។ យើងមានវិធានការច្រើនណាស់ ដើម្បីជម្រុញវិស័យកីឡានេះ ​រាប់ទាំង​បញ្ហា​ការផ្តល់អាហារូបករណ៍ ផ្តល់នូវប្រាក់បំប៉នក្នុងរយៈពេលនៃការហ្វឹកហាត់ នៅគ្រប់ក្របខណ្ឌនៃ​ជម្រើស​ជាតិ ដែលធានាគ្រប់កាឡូរី សម្រាប់ការហ្វឹកហាត់របស់កីឡាករ/ការិនីជម្រើសជាតិរបស់យើង។

កុំអោយគេថា កីឡាខ្មែរគិតតែរឿងលុយ

អញ្ចឹងទេ យើងត្រូវបន្តការខិតខំទៅជាមួយគ្នា បើទោះបីជាយឺតបន្តិច វាគ្រាន់បើជាងមិនបាន។ ម្យ៉ាងទៀត ក្មួយៗសុទ្ធតែមានតម្រូវការ ទៅលើការជាប់ជួបជាមួយនាយករដ្ឋមន្រ្តី អោយនាយករដ្ឋមន្រ្តីបំពាក់មេដាយ អោយនាយករដ្ឋមន្រ្តីផ្តល់នូវរង្វាន់ជូន។ ប៉ុន្តែ ក្នុងមួយឆ្នាំ វេទិកាបែបនេះវាមានច្រើន ហើយថ្ងៃនេះ មិនដឹង​ថា​ប៉ុ​ន្មានប្រកួតយកមកជុំគ្នាម្តងទេ ច្រើនប្រកួតណាស់ អញ្ចឹងទេ យើងអាចជួបគ្នាម្តងទៅ បើសិនជាចង់​បាន​បែបនោះ។ ប្រសិនបើក្មួយៗមិនចង់​ជួប​មុខ​ពូទេ វាមានតែចាត់តាំងតំណាងប៉ុណ្ណោះ។ បើសិនជា​ចង់​ជួប​មុខពូ ពូមានតែម្នាក់ឯង ឯណាត្រូវការងារនេះផង ការងារនោះផង រកសម្រាកមិនបានទេ។ អញ្ចឹង ការ​រង់​ចាំមិនមែនជាបញ្ហាអាក្រក់ពេកនោះទេ។ សូមអ្នកគាំទ្រទាំងឡាយ ជួនកាលប្រើពាក្យខ្លះគួរអោយក្នាញ់ គួរអោយជ្រេញ។ គេថា “ប្រាក់រង្វាន់ដូចជាប្រាក់សុំទាន”។ តែមិនអីទេ ថ្ងៃក្រោយទៅខ្ចីចិន​នៅផ្សារ​អោយ​តែ​ម្តង​ទៅ ប្រសិនបើបែបនោះទៅហើយៗ ក៏មិនចាំបាច់មានការប្រកួតអីតទៅទៀតដែរ។ ហ្នឹងនិយាយអោយ​ត្រង់ៗ​នឹងគ្នាតែម្តង។ បើយើងមិននិយាយត្រង់ទេ វាទៅជាបាត់សណ្តាប់ធ្នាប់។ បើប្រទេសក្រៅគេចេះខ្មែរ គេ​ថា ពួកកីឡាខ្មែរនេះក៏អាក្រក់អាក្រីម្ល៉េះ គិតតែរឿងលុយសុទ្ធទៅហើយ។​

ពិតហើយ អ្នកណាក៏គិតដែរ សូម្បីតែអាឡឺម៉ង់ប្រកាសពីម្សិល មួយគ្រាប់​ ២៥ ម៉ឺនអឺរ៉ូ សម្រាប់នាំ​អាឡឺ​ម៉ង់​ទៅ World Cup ដល់កាន់ពានរង្វាន់លេខមួយ មួយគ្រាប់ហ្នឹង គឺសម្រាប់ម្នាក់ ២៥ ម៉ឺនអឺរ៉ូ។ គេដាក់​កម្រិត​កំ​ណត់​អញ្ចឹងតែម្តង បើនាំទៅដល់ពានរង្វាន់ គឺក្នុងមួយគ្រាប់បាល់សម្រាប់មនុស្សម្នាក់ ២៥ ម៉ឺន ហើយបើ​សិន​ត្រឹមវគ្គពាក់កណ្តាលផ្តាច់ព្រ័ត្រ ១០ ម៉ឺនជាង។ គ្រាន់តែ​ចូលទៅដល់វគ្គ ៨ ក្រុម គឺម្នាក់ ៨ ម៉ឺនអឺរ៉ូ។ គេក៏បានគិតអំពីបញ្ហាហ្នឹងដែរ​ ប៉ុន្តែ ខ្ញុំជឿថា​ កីឡាករអាឡឺម៉ង់នឹងមិនត្រឡប់មកផ្ទះវិញ ទារ​លុយ​ភ្លាមទេ វាត្រូវមានពេលរបស់វា វាត្រូវមានឱកាសរបស់វា ហើយជួនកាលគេទៅបើក​តាមធនាគារនោះ​ទៅ​ទៀត។

នេះពូចង់ឆ្លៀតយកឱកាសជាការដាស់តឿន មិនមែនជាការស្តីបន្ទោសទេ។ ក៏ប៉ុន្តែ យើងធ្វើដំណើររួមគ្នា ហើយកាន់តែបន្តដំណើររួមគ្នាឆ្ពោះទៅកាន់ស៊ីហ្គេម ២០២៣ ដែលវានៅមិនឆ្ងាយប៉ុន្មាននោះទេ មកដល់​ពេល​នេះ គឺនៅសល់រយៈពេល ៦ ឆ្នាំទៀត មិនដល់ផង ស៊ីហ្គេមនឹងបានដើរមកដល់។ ស្តាតរបស់យើង​ដែល​កំ​ពុងសាងសង់ដោយជំនួយរបស់ចិន នឹងត្រូវរួចរាល់នៅឆ្នាំ ២០២២ ជាមួយហេដ្ឋារចនា​សម្ព័ន្ធ​ចាំ​បាច់​មួយចំនួនទៀត។ យើងក៏បានបង្កើតលក្ខខណ្ឌសម្រាប់ការប្រកួតនៅតំបន់នោះ ហើយនៅទីនោះ នឹង​ក្លាយ​ទៅជាតំបន់ ដែលមានការរីកលូតលាស់ថ្មីមួយទៀត នៅពេលដែលយើងកសាងហេដ្ឋារចនា​សម្ព័ន្ធ​ចាំ​បាច់ ដើម្បីឈានឆ្ពោះទៅកាន់ស៊ីហ្គេមឆ្នាំ ២០២៣។

កោតសរសើរគ្រប់សហព័ន្ធកីឡាសុទ្ធតែប្រឹងប្រែង

ខ្ញុំសូមយកឱកាសនេះ ដើម្បីកោតសរសើរគ្រប់សហព័ន្ធទាំងអស់ ដែលបានប្រឹងប្រែងក្នុងរយៈ​ពេលកន្លង​ទៅ។ ឥឡូវនេះ កីឡាខ្លះរបស់យើង ក៏បានទៅយកមេដាយនៅលើទឹកដី នៃម្ចាស់ប្រភេទកីឡានោះតែម្តង។ បើ​ប៉េតង់ យើងតែងតែដណ្តើមយកពីម្ចាស់ប៉េតង់​ ម្ចាស់ប៊ូល នរណាទៅ? គឺបារាំង។ អតីតនាយករដ្ឋ​មន្រ្តី​បារាំង ហ្វ្រង់ស្វ័រ ហ្វីយ៉ុង នៅពេលដែលគាត់មកជួបខ្ញុំនៅកម្ពុជា អ្វីដែលគាត់ផ្ញើខ្ញុំ គឺប៊ូល។ ម្យ៉ាងប៊ូល គឺ​ជានិមិត្តរូប ដែលការច្នៃប្រឌិតម្ចាស់ដើមរបស់វា គឺបារាំង ហើយពេលនោះ គាប់ជួនខ្ញុំក៏លេងប៊ូលដែរ អញ្ចឹង គាត់​ផ្ញើ​អាប៊ូលហ្នឹងដែរ។ ឥឡូវនេះ ទៅប្រទេសជប៉ុន នាយករដ្ឋមន្រ្តី ស៊ិនហ្សូ អាបេ កាដូរបស់​គាត់​(សម្រាប់ខ្ញុំ) គឺអី? គឺ Putters ​សម្រាប់ការវាយកូនហ្គោល ហើយគាត់បានប្រាប់ទៀតថា អា Putter ហ្នឹង ប្រធានា​ធិប​តី ដូណាល់ ត្រាំម៍ ខ្ចី Putter របស់គាត់ ដើម្បី Putt ពីរឡូ។ អញ្ចឹង គាត់គិតថា Putter ហ្នឹង​ល្អ គាត់ក៏​ផ្តល់​អោយខ្ញុំមួយដើម។

​អញ្ចឹង គេស្វែងយល់ណាស់ អំពីចរិតរបស់មនុស្សម្នាក់ៗ ចង់អ្វី? អញ្ចឹង បានជាពេលបំពេញ​ប្រវត្តិរូប​ទៅ​ប្រ​ទេសណាមួយ គេតែងសិក្សាពីយើង ជួនកាលគេតម្រូវអោយយើងបំពេញអោយគេតែម្តង។ ឈាមយើង​Group អី ព្រោះនៅពេលដែលយើងមានជំងឺភ្លាម គឺត្រូវបញ្ចូលឈាម គេមិនត្រូវការធ្វើតេស្ត៍ឈាមទេ គេ​យកឈាម Group ហ្នឹងមកបញ្ចូលឈាមអោយយើង។ ម្ហូបចំណីយើងត្រូវការម្ហូបចំណីអី តមស្អីខ្លះ ហិរ ឬតមស្អី? ជួនកាលយើងត្រូវការម្ហូបបួស ដើម្បីអោយពេលគេដាក់ម្ហូបអោយយើងក្នុងពិធីជប់លៀងផ្សេង។ ចំណង់ចំណូលចិត្តយើងស្អី? ប៉ុន្តែ ភាគច្រើន គឺគេសិក្សាពីយើងទៅវិញទេ។ ចំណង់​ចំណូល​ចិត្ត​របស់​មនុស្ស​នេះចូលចិត្តអានសៀវភៅ ចូលចិត្តស្តាប់ភ្លេង ចូលចិត្តហាត់កីឡា ហើយកីឡាហ្នឹងមាន​ប្រភេទ​កី​ឡា​អីទៀត។ អញ្ចឹង បានជាគេកាដូអោយយើងតែងតែត្រូវទៅលើការចង់បានរបស់យើង។ កាដូអោយខ្ញុំ​រ៉ាកែតវាយសី គឺអត់ត្រូវទេ។ ប៉ុន្តែ ឥឡូវហ្នឹង បើជាកាដូប្រដាប់វាយកូនហ្គោល គឺថាមួយណាក៏យកដែរ ព្រោះអាហ្នឹងជារបស់ដែលយើងត្រូវការ។

ទីលានប្រកួតកីឡា មិនខុសពីទីលាននយោបាយ

គ្រប់សហព័ន្ធទាំងអស់ សុទ្ធតែមានការប្រឹងប្រែង។ ប៉ុន្តែ ម្សិលមិញនេះ ​នៅក្នុងទូរទស្សន៍​ណាមួយដូចជា​មាន​ប្រភេទកីឡាអីមួយនោះ ដែលមានទំនាស់ផ្ទៃក្នុង ចាត់តាំងប្រកួតមិនបាននោះ។ ដូចជាក្នុងទូរទស្សន៍​ប៉ុស្តិ៍​លេខ ៥ ប្រភេទកីឡា Wushu … (សួរនាំ) …។ ព្យាយាមនឹងរកម៉ែត្រវាស់មួយអោយឃើញ នៅក្នុង​វិស័យ​កីឡា ហើយកីឡានេះសុំចងចាំ ទីលាន​កីឡាមិនខុសពីទីលាននយោបាយទេ។ កីឡា ទោះបីថាកី​ឡា​យើងជំនាន់នេះ នៅសល់តែប៉ុន្មានឆ្នាំទៀត យើងនឹងមានវ័យចាស់ យើងប្រកួតមិនបាន ប៉ុន្តែ ការប្រ​កួត​មិន​បាននោះ មិនមែនមានន័យថា កន្លែងប្រកួតត្រូវបំផ្លាញចោលទេ។ ពេលខ្លះ កីឡានៅលើពិភព​លោក​​នេះមានគេហាមឃាត់ជាក្រុម នៅពេលដែលមានការប្រព្រឹត្តធ្ងន់ធ្ងរ ហើយមានការហាម​ឃាត់ជា​បុគ្គល។ ប៉ុន្តែ ការហាមឃាត់ទាំងនោះ វាមិនពាក់ព័ន្ធ គេមិនបំផ្លាញតារាងបាល់ទាត់ ឬបាល់ទះ​ចោល​នោះ​ទេ។ នៅពេលដែលគេធ្វើតេស្ត៍ឃើញថា អ្នកឯងប្រើសារធាតុលើកកម្លាំង គឺត្រូវពិន័យ ខ្លះគេហាម ២ ឬ ៣ ឆ្នាំ ខ្លះគេហាមមួយជីវិតតែម្តង ប៉ុន្តែ សួរថា ការហាមឃាត់ ចំពោះអ្នកទាំងនោះ វានាំទៅដល់ការ​លុប​ចោល​នូវការ​ប្រកួតកីឡានេះអត់ទេ?

ការបោះឆ្នោតឆ្នាំ ២០១៨ នៅតែបន្តធ្វើធម្មតា

កម្ពុជាក៏ដូចគ្នាដែរ ការបោះឆ្នោតឆ្នាំ ២០១៨ នៅតែបន្តធ្វើធម្មតា បើទោះបីជាមនុស្សដែលប្រព្រឹត្តខុស ត្រូវ​បានហាមឃាត់សម្រាប់ប៉ុន្មាននាក់ ក៏ប៉ុន្តែ ១៥ លាននាក់ ទៀតនៅតែបន្តការបោះឆ្នោតធម្មតា។ រឿង​ធម្មតាខ្លាំងណាស់ សម្រាប់ពិភពលោកមួយនេះ អញ្ចឹងទេ ខ្ញុំមិនចង់និយាយរឿងនយោបាយទេ ក៏ប៉ុន្តែ ខ្ញុំចង់បញ្ជាក់ថា​ សូមកុំលួងចិត្តខ្លួនឯងប្រចាំថ្ងៃ ប្រចាំអាទិត្យ ឬប្រចាំខែ។ អ្នកខ្លះសង្ឃឹមទៅលើការបង្កក​ទ្រព្យ​សម្បត្តិរបស់មេដឹកនាំកម្ពុជានៅក្រៅប្រទេស។ សូមអញ្ជើញធ្វើទៅ។ ខ្ញុំរុញអោយអ្នកឯងធ្វើ ដើម្បីរក​អោយ​ឃើញ​ថា មេដឹកនាំកម្ពុជាណាខ្លះមានលុយនៅក្រៅប្រទេស … មេដឹក​នាំណាខ្លះមានលុយនៅ​ក្រៅ​ប្រទេស សូមអញ្ជើញធ្វើទៅ។ វាមិនបានប៉ះក្បាល ហ៊ុន សែន ទេ។ លើកលែងតែអ្នកឯងនាំកងទ័ព ទៅ​វាយទន្រ្ទាន​យកប្រទេសរបស់ខ្ញុំទាំងមូល។ ប៉ុន្តែ បើអ្នកឯងហ៊ានចូល ក៏អ្នកឯងហ៊ានចោលខ្មោច​នៅស្រុក​ខ្មែរដែរ។

ដំណាក់កាលនេះ ​ពិភពលោកគេមិនធ្វើអាធនហ្នឹងទេ គេប្រើគ្នាឯងអោយធ្វើគ្នាឯងតែប៉ុណ្ណោះ ព្រោះគេក៏​ធ្លាប់​ងាប់លើដីយើងរកមិនទាន់អស់ផង។ មិនចាំបាច់គំរាមទេ សុំអំពាវនាវអោយអ្នកទាំងឡាយធ្វើ​អោយ​ស្រូតបន្តិចទៅ ហើយគូសមក មនុស្សណាខ្លះដែលត្រូវហាមឃាត់មិនអោយចូលប្រទេសអ្នកឯង។ បានតើ នៅពេលដែលគេមិនហាមឃាត់ សួរថា មន្រ្តីទាំងអស់ហ្នឹងត្រូវការទៅនៅស្រុកគេឬស្អី? នៅស្រុកឯង​វាងាប់​ឬវា​រស់? នៅស្រុកឯងមួយជីវិតហើយ ម៉េចក៏ចាំបាច់ទៅនៅស្រុកគេធ្វើស្អី? កុំលួងចិត្តខ្លួនឯង​តាមរយៈ​ទៅធ្វើ​កញ្ជះគេ។

អ្វីទៅក្រុមប្រឹក្សាសន្តិសុខអង្គការសហប្រជាជាតិ?

មានអ្នកខ្លះហ៊ាននិយាយដល់ប៉ុណ្ណេះទៅទៀត គេថា បន្តិចទៀតទៅដល់ក្រុមប្រឹក្សាសន្តិសុខអង្គការ​សហ​ប្រ​ជា​ជាតិ … ​សូមផ្តាំទៅ សូមរៀនសូត្រអោយមានការចេះដឹងបន្តិច អំពីអ្វីទៅដែលហៅថា ក្រុមប្រឹក្សា​សន្តិ​សុខ​អង្គការសហប្រជាជាតិ ដែលអង់គ្លេសគេហៅកាត់ថា UNSC នោះ? នៅពេលដែលកម្ពុជា​មាន​បញ្ហា រុញបញ្ហាទៅក្រុមប្រឹក្សាសន្តិសុខ។ មិនមែនចេះតែ​ដើរគោះ​ទ្វារក្រុមប្រឹក្សាសន្តិសុខអង្គការសហ​ប្រ​ជា​ជាតិ​អោយគេបើកបានទេ? បើអញ្ចឹងក្រុមប្រឹក្សាសន្តិសុខ ជំពាក់លើបញ្ហាគ្រប់យ៉ាង។ ហើយក្រុម​ប្រឹក្សា​សន្តិ​សុខ គ្មានជំនាញពិភាក្សាលើកិច្ចការផ្ទៃក្នុងរបស់ប្រទេសណាទេ។ នៅក្នុងចំណោមក្រុមប្រឹក្សាសន្តិ​សុខ មានសមាជិកអចិន្រ្តៃយ៍ ៥ រូប ៥ ប្រទេស ដែលរួមមាន៖ ចិន រុស្ស៊ី មានបារាំង មានអាមេរិក និង​មាន​អង់​គ្លេស។ ក្នុង ៥ ប្រទេស មានតែមួយ វេតូ គឺចប់។ សុំផ្តាំទៅ ហើយសុំបញ្ជាក់អ្នក​នៅក្នុង​ស្រុក​ដែល​ចាញ់​បោកអាពួកអ្នកស្រែកពីខាងក្រៅមក សុំកុំសង្ឃឹម រៀនសូត្រអោយចេះដឹង អំពីរចនាសម្ព័ន្ធរបស់​អង្គការ​សហ​ប្រជាជាតិសិន។

សេចក្តីសម្រេចរបស់មហាសន្និបាតអង្គការសហប្រជាជាតិ គ្មានន័យចាប់បង្ខំសម្រាប់ការអនុវត្តទេ

សេចក្តីសម្រេចរបស់មហាសន្និបាតអង្គការសហប្រជាជាតិ គ្មានន័យចាប់បង្ខំ សម្រាប់ការអនុវត្តទេ ផ្ទុយ​ទៅវិញ​សេចក្តី​សម្រេចរបស់ក្រុមប្រឹក្សាសន្តិសុខ មានន័យចាប់បង្ខំអោយមានការអនុវត្ត។ ការសម្រេច​របស់សភា​អាមេ​រិក ក៏មិនមែនមានន័យចាប់បង្ខំអោយរដ្ឋាភិបាល Trump អនុវត្តដែរ ការអនុម័តដោយ​សភាអឺរ៉ុប ក៏​មិនមានលក្ខណៈចាប់បង្ខំអោយស្នងការអឺរ៉ុប ប្រធានអឺរ៉ុបអនុវត្តនោះទេ ត្រូវយល់កិច្ចការងារ​នេះអោយបាន។ ចាំមើលទៅ។ កុំលួងចិត្តឯងប្រចាំថ្ងៃ ប្រចាំអាទិត្យ និងប្រចាំខែ លួងមើលទៅ ចាំមើល​ទៅ អស់លោក​ចាំ​មើល​ទៅ មិនមែនអ្វីៗពិភពលោកសុទ្ធតែធ្វើបានតាមចិត្តចង់នោះទេ ហើយចំណុច​អស់​ទាំងនេះ មានទៅ​មានមក។

ផ្អាកសហប្រត្តិបត្តិការរុករកអដ្ឋិធាតុទាហានអាមេរិក ដរាបណាអាមេរិកយល់ព្រមតាមសំណើរបស់កម្ពុជា

យើងនឹងបើកអោយដំណើរការឡើងវិញ នៃការុករកអដ្ឋិធាតុរបស់ទាហានអាមេរិក ដែលនៅបន្តបាត់ខ្លួន ៤៩ នាក់ ក្នុងលក្ខខណ្ឌដែលអាមេរិកនឹងផ្តល់អោយយើងត្រឡប់មកវិញ នូវអ្វីដែលអាមេរិកយកពីយើង។ យើងមិន​ទាន់​បាននិយាយថាបញ្ចប់កិច្ចព្រមព្រៀងឯណា យើងស្នើពិភាក្សាអំពីការធ្វើវិសោធនកម្ម ទៅលើ​កិច្ចព្រមព្រៀង​នេះ ដោយសារតែយើងបានទទួលពលរដ្ឋយើង ដែលជាប់គុកនៅអាមេរិក ​ហើយ​ត្រូវ​គេ​ដេញ​ចេញ។ អញ្ចឹង ខ្ញុំបានស្នើសុំទៅអាមេរិកថា គួរមានគោលការណ៍មនុស្សធម៌ គួរធ្វើវិសោធនកម្ម ព្រោះអ្នក​ដែលបញ្ជូនមក ៦០០ នាក់ មាន ៤ នាក់ ធ្វើអត្តឃាតសម្លាប់ខ្លួន។  អញ្ចឹង ក្រោមហេតុផលសិទ្ធិមនុស្ស និងមនុស្សធម៌នេះ យើងបានស្នើទៅអាមេរិក ​ប៉ុន្តែ បែរជាអាមេរិកដាក់យើងជាមួយនឹងប្រទេស​ប៉ុន្មាន​ទៀត​ថា ជាប្រទេសមិនសហការណ៍ទទួលយកពលរដ្ឋខ្មែរត្រឡប់មកវិញ។ ក៏ធ្វើការរិតបន្តឹងទៅលើទិដ្ឋាការ យើងក៏យក​នូវវិធានការណ៍មួយឆ្លើយតប។ បើដូច្នោះ ត្រូវផ្អាកនូវសហប្រតិបត្តិការរុករកអដ្ឋិធាតុសិន។

យើងត្រៀមខ្លួននឹងផ្តល់កិច្ចសហការត្រឡប់ទៅវិញ នៅពេលដែលអ្នកឯងអោយអាហ្នឹងត្រឡប់មកខ្ញុំវិញ ចប់គ្នាហើយ។ ម្យ៉ាងទៀត ឥឡូវនេះយើងកំពុងតែអនុវត្តតើ យើងកំពុងតែធ្វើសម្ភាសន៍ ឥឡូវ ធ្វើសម្ភាសន៍​បាន ៧០ នាក់ទៀត។ ក្នុង ៧០ នាក់ មានប៉ុន្មាននាក់នោះកំពុងឈឺធ្ងន់ សុំអោយអាមេរិកសហការណ៍ ម្យ៉ាងទៀត ឥឡូវនេះ ខ្ញុំបើកច្រកអោយមានការពិភាក្សាលើការទទួលយកប្រជាពលរដ្ឋ ដែលទៅរស់នៅ​អាមេរិកក្រោយឆ្នាំ ១៩៩៤ ខ្ញុំមិនចង់អោយពលរដ្ឋខ្មែរដែលត្រូវទៅនៅអាមេរិក ត្រូវគេបញ្ជូនទៅកាន់​ប្រទេសនេះ ប្រទេសនោះផ្សេងទៀតក្រៅពីត្រឡប់មកកម្ពុជាទេ។

អញ្ចឹង បញ្ហានេះ ដោយសារវាជាប្រធានបទមួយ ខ្ញុំក៏ត្រូវតែនិយាយ ដើម្បីជាសារមួយ។ អ្នកខ្លះរង់ចាំនេះ អ្នកខ្លះរង់ចាំនោះ។ ខ្ញុំស្តាប់អស់លោកនិយាយដែរ មិនមែនថាមិនស្តាប់ទេ អស់លោកសង្ឃឹមណាស់ថា​បន្តិចទៀតរដ្ឋបាលភ្នំពេញ គឺនឹងគាំងតែម្តង។ សុំផ្តាំទៅ សម័យដើម ធ្វើការដូរអង្ករ ឯងហ៊ុំព័ទ្ធ​អញៗ​រស់​បាន រឿងអីមកដល់ប៉ុណ្ណឹងហើយរស់មិនបាន? កន្លងទៅដែលគេអោយទិដ្ឋាការនោះ តើអស់លោកមួយឆ្នាំ​ទៅ​ប៉ុន្មាន​ដង? បើខ្ញុំវិញ ដែនដីអាមេរិក ​ក្រៅពីញូវយ៉កដែលជាទីកន្លែងអង្គការសហប្រជាជាតិ តែមួយ​ដង​គត់​ដែលខ្ញុំទៅ។ ទៅវ៉ាស៊ីនតោន។ ទៅហ្នឹងទៅក្នុងនាមបេសកកម្ម ដែលអ៊ុនតាក់ស្នើអោយខ្ញុំទៅ។  អ៊ុន​តាក់​ អ្នកស្នើអោយខ្ញុំទៅ ដើម្បីទៅបញ្ជាក់ជាមួយនឹងសភាអាមេរិក ក្រៅពីនោះមាន​ហេតុផលអី​ដែល​ខ្ញុំ​ទៅ? ខ្ញុំដើរតែមួយស្រុកខ្មែរ ខ្ញុំដើរមិនទាំងអស់ផង ចាំបាច់ដើរស្រុកគេ? តារាងកូនហ្គោលក្បែរ​ហ្នឹង ដើរមិន​ទាំង​អស់តារាងកូនហ្គោលផង។ និយាយអោយពិតទៅ គិរីរម្យអត់ដែលបានឡើងទេ។ តាំងពីមុនរហូតមក​ដល់​ឥឡូវ អត់ស្គាល់គិរីរម្យយ៉ាងម៉េច។ បូកគោទៅបានតែកន្លែងសម្ពោធ (និង)ទៅប្រជុំ ទៅបាន ២ ដង។ ដើរ​ស្រុកខ្មែរ ដើរមិនទាន់អស់ផង។

វិធានការទណ្ឌកម្ម មិនមែនអ្នកណាចេះតែធ្វើបានទេ

វិធានការទណ្ឌកម្មតាមសំណូមពររបស់អ្នក មិនមែនអ្នកណាចេះតែធ្វើទេ។ កុងត្រាកិច្ចសន្យា នៃការបញ្ជា​ទិញ​ពីស្រុកខ្មែរបានចុះហត្ថលេខារួចហើយ សួរថាវិស័យឯកជនគេព្រមធ្វើតាមទេ? ត្រូវសងគេងាប់នៅ​(ទី)​នេះ។ ហើយអារឿងទិដ្ឋាការ ត្រូវមើលពាក្យ “ទណ្ឌកម្មទិដ្ឋាការ និងរឹតបន្តឹងទិដ្ឋាការ” វាខុសគ្នាណា? មើល​ក្នុងហ្នុង​ មើលក្នុងភាសាដែលគេប្រើ។ គេថា រឹតបន្តឹង មិនមែនទណ្ឌកម្មទិដ្ឋាការទេ។ បើសិនជា​ទណ្ឌ​កម្ម​ទិដ្ឋាការ ក៏វាអត់ងាប់ខ្មែរដែរ។ សុំផ្តាំទៅ។ ហើយ Comment តាម Facebook Page មក ធម្មតាមាន Live ផ្ទាល់ … ស្អីសុទ្ធតែបន្តិចទៀតទៅដល់ក្រុមប្រឹក្សាសន្តិសុខ(អង្គការសហប្រ​ជា​​ជាតិ) ក្រុមប្រឹក្សា​សន្តិ​សុខ​(អង្គ​ការ​សហប្រជាជាតិ)បើកទ្វារស្រួលណាស់អី? នៅក្នុងចំណោមក្រុមប្រឹក្សាសន្តិសុខ​(អង្គការសហ​ប្រជា​ជាតិ) សួរថា តើគេឯកភាពទាំងអស់ទេ? អាអ្នក​ឆ្កួត​នៅ​ខាង​ក្នុងនេះចាំតែឆ្កួតតាម​អាអ្នក(នៅ​ខាង​ក្រៅ) អានោះខ្លាៗហ្នឹងគេដែរ។ សួរថាពលរដ្ឋខ្មែររាល់ថ្ងៃនេះ សួរថាកីឡាគេស្ទះទេ? ក្មួយអើយ! ទោះបីថា អា​លុយ​វាយឺតយ៉ាវបន្តិចក៏ដោយចុះ ក៏ប៉ុន្តែ ក្មួយគង់តែបានទេ។ ថ្ងៃនេះត្រូវយកមកចែកជិត ២ លាន​ដុល្លារ សួរ​ថា ខ្មែរវាងាប់ហើយឬនៅ? អត់ពីពួកឯងប៉ុន្មាននាក់ហ្នឹងវាងាប់ហើយឬនៅ? កាលពីយើង​កសាងប្រទេស ពួកហ្នឹងមិនដឹងនៅឯណាផងទេ? និយាយអោយវាចំៗអញ្ចឹងតែម្តងទៅ ពួកហ្នឹង​ដែល​ជួយ​យើងពីអង្កាល់? ពូកែខាងសម្លាប់យើងហ្នឹង? ប៉ុន្តែ វាមិនងាប់ទេ។ អញ្ចឹង សូមផ្តាំផ្ញើ។

មិនមានលុយផ្ញើនៅធនាគារក្រៅប្រទេស បើរកឃើញយកទាំងអស់ចុះ

សភាអឺរ៉ុបតាំងពីចេញមក សូម្បីតែអាភ្នំពេញប៉ុស្តិ៍ហ្នឹងវាក៏ចុះផ្សាយព្រឹកមិញនេះ ក្នុងពីឆ្នាំ ២០១៤ មក​ដល់​ឥឡូវហ្នឹងវាចេញសេចក្តីសម្រេចដល់ទៅ ៥ ដង លើបញ្ហាខ្មែរ។ ប៉ុន្តែសួរថា រដ្ឋាភិបាលអឺរ៉ុប​វាអនុវត្ត​ទេ? ហើយម្យ៉ាងទៀតអឺរ៉ុបវាត្រូវមានកុងសង់ស៊ីសរបស់វា ហើយតិចៗគេបង្កកទ្រព្យសម្បត្តិ​របស់មេដឹក​នាំ​គណ​បក្សប្រជាជន។ អើ! មេដឹកនាំណាភ្លើយកលុយទៅទុកនៅហ្នឹង ហ្អែងយកចុះ? បន់អោយ​យក​ថែម​ទៀត។ ខ្ញុំស្អប់អាយកលុយទៅទុកនៅខាងក្រៅ អោយគេយកអោយអស់តែម្តងទៅ មន្ត្រីភាគច្រើន និងប្រ​ជា​ជនកម្ពុជាទេ រាប់ទាំង ហ៊ុន សែន អត់មានលុយនៅក្រៅប្រទេសទេ។

មានលុយវានៅមិនសុខក្នុងហោប៉ៅទេ វាមើលឃើញសាលានេះវាខ្វះ ស្រះទឹកនោះវាអត់ អ្នកជំងឺ​នេះខ្វះ​លុយ និយាយអោយវាច្បាស់ទៅ។ យ៉ាងណាត្រូវតែព្យាបាល តាវីតាមីនសេ អោយជា។ តាវីតាមីនសេ មិន​និ​យាយ ខ្ញុំប្រកាសថ្ងៃនេះ។ ថ្ងៃមុន ភរិយាខ្ញុំអោយប្រាក់មួយចំនួនទៅពិនិត្យ ត្រឡប់មកវិញគាត់​សម្ភាសន៍​តាម CNC តម្រូវការនៃការវះកាត់ថ្លើមរបស់គាត់។ ខ្ញុំជូន ៥ ម៉ឺនដុល្លារ ភ្លាមអោយទៅព្យាបាល ហៅទូរស័ព្ទទៅ តាវីតាមីនសេ យំតែម្តង។ អានេះជាតម្រូវការរបស់មនុស្ស គ្រាន់តែខ្ញុំមិនប្រកាសតែប៉ុណ្ណឹង ហើយវាពឹង​ពាក់​អ្នកនេះអោយ ២០ ដុល្លារ អ្នកនោះអោយ ៣០ ដុល្លារ អ្នកនោះអោយ ១០០ ដុល្លារ រង់ចាំប៉ុន្មានឆ្នាំ តាវីតាមីន​សេ ងាប់បាត់។ លុយទៅដល់ តាវីតាមីនសេ ហើយ ទូរស័ព្ទទៅតាមក្រោយ។ តាវីតាមីនសេ យំ​បណ្តោយ។ ថាតាឯងទៅព្យាបាល ទៅវះកាត់ កុំរង់ចាំលុយដែលគេចូល ទៅវះកាត់​អោយ​ឆាប់។ សង្គ្រោះ​ជីវិតមនុស្សវាសំខាន់ជាង។ ខ្ញុំអត់មានលុយយកទៅក្រៅប្រទេសទេ។ ពេលដែលខ្ញុំស្លាប់ សូមដាក់​តែ​ប្រាក់កាក់មួយទៅបានហើយ ខ្ញុំស្ពាយទៅមិនរួចទេ។ ខ្ញុំទុកបន្សល់នូវអ្វីៗនៅលើផែនដីកម្ពុជា។

អាមួយនោះវាថា ហ៊ុន ម៉ាណែត មានប្រាក់ ២ រយលានអឺរ៉ូនៅធនាគារបារាំង ហើយកំពុងដាក់ដេញ​ថ្លៃ​ទី​ស្នាក់ការបក្សសង្គមនិយមបារាំង។ បាន ហ៊ុន ម៉ាណែត ថា បើរកឃើញយកទៅ។ សូមផ្តាំទៅ ខ្ញុំលើក​ទឹក​ចិត្ត​អឺរ៉ុប និងអាមេរិក បង្កកទ្រព្យសម្បត្តិមេដឹកនាំកម្ពុជា ខ្ញុំលើកទឹកចិត្តថែម មិនចាំបាច់គម្រាមទេ ធ្វើទៅ អ្នកឯងពូកែអ្នកឯងធ្វើទៅ។ ខ្ញុំមានសញ្ជាតិតែមួយទេ និយាយអញ្ចឹងវាប៉ះពាល់អ្នកមានសញ្ជាតិច្រើន ខ្ញុំ​មិនចង្អៀតចង្អល់ទេរឿងហ្នឹងនោះ។ មន្ត្រីរាជរដ្ឋាភិបាល (និងមន្ត្រី)គណបក្សប្រជាជនប៉ុន្មាននាក់ទៅ ដែលមាន​ទ្រព្យ​សម្បត្តិនៅក្រៅប្រទេស? អើ! បើភ្លើណាស់យកទៅទុកនៅទីនោះទៅ។ អត់មានទ្រព្យ​សម្បត្តិយកទៅ​ទុក​នៅខាងក្រៅប្រទេសទេ ហើយនៅក្នុងប្រទេសទ្រព្យសម្បត្តិរបស់ខ្ញុំ ដើរទៅមើលទៅ នៅតាមសាលារៀន នៅតាមវត្តអារាម នៅតាមស្រះទឹក នៅតាមប្រឡាយទឹក មានអណ្តូងទឹក។

ផ្តល់ប្រាក់លើកទឹកចិត្តផ្ទាល់ខ្លួនបន្ថែមលើប្រាក់រដ្ឋ ចំពោះជ័យលាភីគ្រប់កម្រិត

ថ្ងៃនេះ ប្រាក់កាក់មួយចំនួនក៏ត្រូវបានផ្តល់អោយក្មួយៗបន្ថែមលើប្រាក់រដ្ឋទៅទៀត អាហ្នឹងស្អីទៅ? ដើម្បី​ជម្រុញ​វិស័យ​កីឡា លើកទឹកចិត្តអាហ្នឹងទៀត បន្តិចទៀតពូនឹងប្រាប់ ព្រោះតែអោយលើកទីមួយហើយ ត្រូវតែអោយ​លើក​ទីពីរ, ទីបី, ទីបួន, ទីប្រាំ ទៅរហូតដល់ពេលណាដែលពូឈប់ធ្វើជានាយករដ្ឋមន្ត្រី។ អាហ្នឹងលុយ​ដោយ​​ឡែករបស់ពូទេ មិនមែនយកលុយរដ្ឋមកធ្វើទេណា។ លុយរដ្ឋផ្សេង លុយពូផ្សឹង។ ថ្ងៃ​នេះ ម្នាក់ៗក្លាយ​ទៅ​ជា​អ្នកមាន។

ពិភពលោកបច្ចុប្បន្ន មានឥរិយាបថនយោបាយការបរទេសឯករាជ្យផ្សេងៗគ្នា

នេះគ្រាន់តែជាសារទេ រឿងធំជាងគេ មិនមែនកត្តាសម្រេចមកពីសម្ពាធនេះ សម្ពាធនោះទេ សុំទោស។ ពិភព​លោកបច្ចុប្បន្ន គឺមានឥរិយាបថនយោបាយការបរទេសឯករាជ្យផ្សេងៗគ្នា កម្រិតខុសៗគ្នា យើងត្រូវ​យល់​អោយបាន។ នៅពេលកូនគេមកលួចយើង ប្លន់យើងនោះ យើង​វាយ​បំបាក់ជើងកូនគេ ច្បាស់ណាស់​ឪ​គេ​ខឹង។ កុំឆ្ងល់ពេកអាហ្នឹងនោះ។ ដឹងហើយអាអ្នកយើងវាយបំបាក់ជើងកូនរបស់អ្នកណា? បើយើងវាយ​បំ​បាក់​ជើងកូនគេម៉េចឪគេមិនខឹង? រឿងធម្មតាណាស់អាហ្នឹងនោះ។ បដិវត្តពណ៌អ្នកណាអ្នកបញ្ជាវា? រឿង​ធម្មតា​ខ្លាំងណាស់អាហ្នឹង។ ឪគេប្រតិកម្មដោយសារតែកូនគេត្រូវវាយបំបាក់ជើង ក្នុងពេលលូនចូល​ផ្ទះ​ដាក់​គ្រាប់បែកក្នុងផ្ទះយើង។ វាយបំបាក់ជើង ឪគេខឹងវាជារឿងធម្មតា។ ប្រតិកម្មនេះ ប្រតិកម្មនោះ អាងឯង​ជា​ប្រទេសធំ អាងឯងជាប្រទេសមាន ប៉ុន្តែ កុំភ្លេចថា ប្រទេសក្រហ្នឹងវាក៏ចេះតស៊ូ​ដើម្បីឯករាជ្យ​ភាព​ដែរ​។

កីឡាករ ត្រូវខិតខំប្រកួត​​ដោយស្មើភាព និងស្មើសិទ្ធ

ក្មួយៗជោគជ័យនេះ នៅពេលដែលទង់ជាតិយើងបង្ហោះឡើង ហើយភ្លេងជាតិរបស់យើងត្រូវបានរោទិ៍ឡើង ក្នុងពេលដែលទទួលមេដាយ​ តើនេះជាអ្វី? យើងទាំងអស់គ្នាប្រឹងការពារអាហ្នឹង។ ស្មើភាព ហើយស្មើសិទ្ធិ​ទៀត។ គ្រាន់តែវ៉ូវីណាមមួយ ថ្ងៃហ្នឹងត្រូវចាយ ១ លានដុល្លារ។ អញ្ចឹង នៅលើពិភពលោក អត់គិតថា ប្រទេសតូច ឬប្រទេសធំ ប្រទេស(អ្នក)មាន ឬប្រទេស(អ្នក)ក្រទេ ត្រូវស្មើភាព ស្មើសិទ្ធិទាំងអស់គ្នា។

គោលនយោបាយគាំពារសង្គម ចំពោះកីឡាករ/ការិនី

ខ្ញុំសូមយកឱកាសនេះសារជាថ្មីម្តងទៀត ថ្លែងនូវការកោតសរសើរ ចំពោះការខិតខំ​ទាំងអស់របស់​គ្រប់​សហ​ព័ន្ធ ការខិតខំទាំងអស់របស់គ្រូបង្វឹក ហើយជាពិសេសការខិតខំទាំងអស់របស់ក្មួយជាកីឡាករ/ការិនី។ ក្មួយៗ​បានដឹងហើយ អំពីគោលនយោបាយគាំពារសង្គម ដែលអនុវត្តសម្រាប់ចំពោះកីឡាករ/ការិនី ដែល​ទទួល​​បាន​អត្ថប្រយោជន៍ដូចកម្មករ/ការិនីដែរ។ ជិះឡានក្រុងដោយមិនយកប្រាក់រយៈពេល ២ ឆ្នាំ យ៉ាង​តិច។ របបការពារសុខភាព ដែលព្យាបាលមិនបង់ប្រាក់ ហើយដែលស្ថិតនៅក្រោមមូលនិធិសមធម៌។ សម្រាប់កី​ឡា​ករ/កា​រិនី ដែលជាមន្ត្រីរាជការ គឺត្រូវទទួលនូវក្រោមរបបមួយផ្សេងទៀត គឺទទួល​របប​មន្ត្រី​រាជ​ការ។ ការខុសគ្នាវានៅត្រង់នេះ មន្ត្រីរាជការដែលជាស្ត្រីនៅពេលឆ្លងទន្លេ នឹងត្រូវទទួលបានដល់ទៅ ៨០ ម៉ឺនរៀល ប៉ុន្តែ បើយើងជាកីឡាការិនីធម្មតាទទួល ៤០ ម៉ឺនរៀល គឺខុសគ្នាប៉ុណ្ណឹង។

បន្តពង្រីកវិសាលភាពការថែទាំសុខភាព ដែលជាផ្នែកមួយនៃការគាំពារសង្គម

ការគ្របដណ្តប់ទៅលើបញ្ហាទាក់ទិនជាមួយនឹងការថែទាំសុខភាពនេះ ដែលជាផ្នែកមួយ នៃការគាំពារ​សង្គម ត្រូវបានផ្តល់អត្ថប្រយោជន៍កាន់តែធំទៅៗ។ ចាប់ផ្តើមដំបូង គឺអាទិភាពសម្រាប់ស្ត្រីមានផ្ទៃពោះ ហើយ​យើងនឹងបន្តពង្រីកវិសាលភាពវាបន្តទៅទៀត។ ថ្ងៃមុន យើងពង្រីកវិសាលភាពសម្រាប់ថ្នាក់ប្រធាន​ភូមិ អនុ​ប្រ​ធាន​ភូមិ និងជំនួយការភូមិ។ សម្រាប់ក្រុមប្រឹក្សាឃុំសង្កាត់ ដែលមានមនុស្សជាង ៦ ម៉ឺននាក់ ថែមទៀត ដាក់​នៅ​ក្រោមដំបូល នៃមូលនិធិសមធម៌ ទៅលើការពិនិត្យព្យាបាលជំងឺ ហើយក៏នឹងអនុវត្ត​ដូចគ្នាជាមួយនឹង​ការ​ផ្តល់ប្រាក់ជាកម្មវិធីសាច់ប្រាក់ សម្រាប់ស្ត្រីដែលត្រូវឆ្លងទន្លេ។

អនុក្រឹត្យកំណត់ចំនួនប្រាក់រង្វាន់លើកទឹកចិត្ត ចំពោះកីឡាករ/ការិនី និងគ្រូបង្វឹក ដែលទទួលបានមេដាយ

ខ្ញុំសូមអោយអ្នកទាំងអស់គ្នាបន្តការខិតខំបន្តទៅទៀត។ នៅក្នុងនេះគេដាក់អញ្ចេះ អនុក្រឹត្យបានកំណត់ គឺ​​កីឡាកម្រិតពិភពលោក៖ មេដាយមាស​ ១២០ លាន(រៀល)។ មេដាយប្រាក់ ៨០ លាន(រៀល)។ សំរឹទ្ធិ ៦៤ លាន(រៀល)។ ឯកីឡាអាស៊ី៖ មេដាយមាស ៨០ (លានរៀល)។ មេដាយប្រាក់ ៤០ (លានរៀល)។ មេដាយ​សំរឹទ្ធិ ២៤ (លានរៀល)។ កីឡាអាស៊ីអាគ្នេយ៍ ដែលហៅថា ស៊ីហ្គេម៖ មេដាយមាស ៤០ (លាន​រៀល)។ មេដាយប្រាក់ ៣០ (លានរៀល) និងមេដាយសំរឹទ្ធិ ១៦ (លានរៀល)។

អ្នកខ្លះទទួលមេដាយវាច្រើន ប៉ុន្តែ បើយោងទៅលើបទដ្ឋានសម្រាប់បៀវត្សរ៍ គេអោយទទួលបៀវត្សរ៍តែមួយ កន្លែងទេ យើងកាន់មុខនាទីដល់ទៅពីរបី ឧទាហរណ៍៖ ធ្វើប្រធានអគ្គនាយកដ្ឋានផង ហើយធ្វើជាជំនួយ​ការ​របស់ឧបនាយករដ្ឋមន្ត្រីណាមួយផង ដែលមានឋានៈស្មើអនុរដ្ឋលេខាធិការ អញ្ចឹង ក្នុងចំណោមពីរហ្នឹង គេអោយយកបៀវត្សរ៍តែមួយទេ។ យកថ្នាក់អគ្គនាយកដ្ឋាន ឬយកថ្នាក់អនុរដ្ឋលេខាធិការ? អោយយក​តែមួយ​ទេ។ ប៉ុន្តែ ក្មួយៗផ្ទុយពីនេះ មេដាយមួយត្រូវគិតថវិកាមួយដុំ អញ្ចឹង បានជានៅទីនេះ មានអ្នកខ្លះ ទទួលបានដល់ទៅ​ ១០ ម៉ឺនដុល្លារ ឯណោះ។

ឥឡូវ សូមបញ្ជាក់ កីឡាករ ទិន ឌិន ត្រូវទទួលបាន ចំនួន ២០០ លាន(រៀល) បូកជាមួយនឹងថវិកាពូ ១ ម៉ឺនដុល្លារសហរដ្ឋអាមេរិក ថែមទៀត ដូច្នេះ ឡើង ២៤០ លាន(រៀល)​ បាត់ទៅហើយ។ កីឡាការិនី ពៅ សុខា (ទទួល)បាន ៤២៤ លាន(រៀល) បូកជាមួយនឹងថវិកាពូ ១ ម៉ឺនដុល្លារសហរដ្ឋអាមេរិក ថែមទៀត។ កីឡាការិនី ប៉ាល់ ឆរស្មី (ទទួល)បាន ៤០០ លាន(រៀល) បូកនឹងថិកាពូ ១ ម៉ឺនដុល្លារសហរដ្ឋអាមេរិក ថែមទៀត។ កីឡាករ សាន សុជាតិ បាន ៤៧២ លាន(រៀល) បូកជាមួយនឹងថវិកាពូ ១ ម៉ឺនដុល្លារ​សហ​រដ្ឋ​អាមេរិក ថែមទៀត។ កីឡាករ ប្រាក់ សុវណ្ឌី បាន ៣២៨ លាន(រៀល) និងប្រាក់របស់ពូ ១ ម៉ឺនដុល្លារ​(សហរដ្ឋអាមេរិក) ទៀត។ កីឡាករ លី បូរ៉ាមី បាន ៣២០ លាន(រៀល) បូកជាមួយនឹងប្រាក់ពូ ១ ម៉ឺន​ដុល្លារ(សហរដ្ឋអាមេរិក) ទៀត។ កីឡាការិនី សឿ ចាន់លក្ខិណា (បាន) ៣៩២ លាន(រៀល) បូកនឹង ១ ម៉ឺនដុល្លារ(សហរដ្ឋអាមេរិក) ប្រាក់​របស់ពូ។

អញ្ចឹង ពូត្រូវចាយ ៧ ម៉ឺនដុល្លារ(សហរដ្ឋអាមេរិក) សម្រាប់ពួកអ្នកមេដាយកម្រិតពិភពលោក។ សូម​អោយ​អ្នក​ទាំង​ឡាយដែលចង់បង្កកទ្រព្យសម្បត្តិ មកទារពីក្មួយៗទៅ។ អញអត់មានលុយទៅទីនោះទេ។ អញ​មាន​​លុយ​អោយក្មេងៗ។ សុំទោស។ ឌឺអោយបន្តិចហើយ។ ផ្ចាញ់អោយថែមទៀតហើយ កាត់អោយ​រហ័សទៅ។ អា​ហ្នឹងជាការរួមចំណែកមួយដែរណា ១ ម៉ឺនដុល្លារ(សហរដ្ឋអាមេរិក) មិនតិចទេ។

ឥឡូវ ចូលខាងក្រោម មេដាយប្រាក់៖ កីឡាករ ជិន ពិសិដ្ឋ ទទួលបាន ៤៨០ លាន(រៀល) ហើយទទួល ថវិកាពីពូ ៥ ពាន់(ដុល្លារសហរដ្ឋអាមេរិក) ព្រោះអាហ្នឹងយើងចុះកម្រិតហើយ។ កីឡាការិនី ម៉ៅ មុន្និតា (ទទួលបាន) ២២៤ លាន(រៀល) ជាមួយនឹងប្រាក់របស់ពូ ចំនួន ៥ ពាន់ដុល្លារ(សហរដ្ឋអាមេរិក) ថែម​ទៀត។ កីឡាការិនី ចាន់ សីហា (ទទួលបាន) ៨០ លាន(រៀល) ជាមួយនឹងថវិកាពូ ៥ ពាន់​ដុល្លារ​(សហរដ្ឋអាមេរិក)។ កីឡាករ ទិន ភាព ទទួលបាន ៨០ លាន(រៀល) និង ៥ ពាន់ដុល្លារ​(សហ​រដ្ឋ​អាមេ​រិក)។

ឥឡូវ ក្រុមមេដាយសំរឹទ្ធិ៖ កីឡាករ ជ្រិន ប៊ុនឡេង (ទទួលបាន) ៣៨៤ លាន(រៀល) និងបន្ថែមប្រាក់ពូ ចំនួន ៣ ពាន់(ដុល្លារសហរដ្ឋអាមេរិក)។ កីឡាករ កើត សុភ័ក្ត្រិ (ទទួលបាន)​ ១៩២ លាន(រៀល) និង​ថវិកាពូ ចំនួន ៣ ពាន់(ដុល្លារសហដ្ឋអាមេរិក)។ កីឡាករ តាំង ប៊ូហេង (ទទួលបាន) ៧ លានរៀល បូកជាមួយ​ថវិកាពូ ចំនួន ៣ ពាន់ដុល្លារសហរដ្ឋអាមេរិក។ កីឡាករ សួន កុសល (ទទួលបាន) ៧ លាន(រៀល) បូកជាមួយនឹង ៣ ពាន់ដុល្លារ(អាមេរិក) របស់ពូ។ កីឡាការិនី ម៉ាន់ ស៊ីម៉ា (ទទួលបាន)​ ១៤ លានរៀល ជាមួយនឹង ៣ ពាន់ដុល្លារ(អាមេរិក) របស់ពូថែមទៀត។

ចំពោះគ្រូបង្វឹក និងជំនួយការ ចំនួន ៤ នាក់ ក្នុងនោះ លោក ង្វៀង វ៉ាន់គង់ (ទទួលបាន ចំនួន​) ១២០ លាន(រៀល) បូកនឹង ១ ពាន់ដុល្លារ(អាមេរិក) របស់ខ្ញុំថែមទៀត ឈ្មោះហ្នឹងដូចឈ្មោះវៀតណាម? គ្រូវៀតណាម? គ្រូវ៉ូវីណាម? ហើយគ្រូហ្នឹងវាយឈ្នះសិស្សឬអត់? លោក ទេព ជីវសុខុម (ទទួលបាន ចំនួន) ៨៤ លានរៀល ជាមួយនឹងប្រាក់របស់ខ្ញុំ ១ ពាន់ដុល្លារ(អាមេរិក)។ លោក ឯម សុធារ័ត្ន (ទទួលបាន ចំនួន) ៨៤ លានរៀល ជាមួយនឹង ១ ពាន់ដុល្លារ(អាមេរិក) របស់ខ្ញុំ។ លោក ហ៊ុត វិចិត្រ (ទទួលបាន ចំនួន) ៧ លាន(រៀល) បូកនឹង ១ ពាន់ដុល្លារ(អាមេរិក) របស់ខ្ញុំ។

សូមបន្តការខិតខំ ចំពោះអ្នកដែលមិនទទួលបានមេដាយ

គ្រាន់តែចំណាយថ្ងៃនេះ យើងចំណាយ(ច្រើន) តែការចំណាយនេះវាបានផល។ សង្ឃឹមថា ក្មួយៗដែលមិន​ទទួល​បាននូវមេដាយ នូវជ័យលាភី ក៏នឹងបន្តការខិតខំ។ បើយើងទៅឈ្នះទាំងអស់គ្នា ប្រហែលជាមិន​មែន​​ជាកីឡាទេ។ អញ្ចឹងទេ ដោយសារទំហំលុយនេះវាមានធំហំធំ នៅក្នុងពេលដែលថវិការបស់ក្រសួង​អត់​មាន។ ថវិកាក្រសួងបានជម្រាបហើយថា មានតែ ៣.២០០ លាន(រៀល) នៅពេលដែលយើង តម្រូវការ​ចំណាយ ១២ ពាន់ ៥០០ លាន(រៀល) ហើយឥឡូវនៅប៉ុន្មានទៀតឯណោះ។ នៅប៉ារ៉ាអូឡាំពិកទៀត។ ត្រូវចែកនៅ(ពេល)ខាងមុខនេះ ចំនួន ៣.២០០ លាន(រៀល)ទៀត។

នឹងឡើងបាន ១ ស័ក្តិ ចំពោះកីឡាករ/ការិនីក្នុងក្របខណ្ឌយោធា នៅពេលទទួលបានមេដាយមាស

លោកស្រី កែ ឡេង ឡើងបាន ១ ស័ក្តិទៀតហើយ ព្រោះអាហ្នឹងមានស្តង់ដាមួយ កីឡាករដែលនៅក្នុង​(ក្រប​ខណ្ឌ)​ប៉ូលីស​/ទាហាន/ប៉េអឹម ពេលណាដែលជាប់មេដាយមាសភ្លាម ឡើង(បាន) ១ ស័ក្តិ។ អាហ្នឹង គឺគិតជាស្តង់ដាអញ្ចឹងតែម្តង ដើម្បីលើកទឹកចិត្តក្នុងការប្រកួត។ នេះវាជាការការពារកិត្តិយសក្មួយៗទេ ដែលពូចាប់ផ្តើមនិយាយគឹប និយាយដល់អារឿងបង្ហោះហ្វេសប៊ុក វាជាកិត្តិយស និងសេចក្តីថ្លៃថ្នូរ​របស់​ក្មួយៗ ព្រោះបញ្ហាទាំងអស់យើងត្រូវរួមដំណើរទាំងអស់គ្នា ហើយថ្ងៃនេះ យ៉ាងណាក៏ដោយ ការរង់ចាំវា​បានមកដល់ ជាមួយកិច្ចការទាំងឡាយដែលត្រូវធ្វើ។ ថ្ងៃស្អែកមានការប្រកួតមួយ ដែលពូត្រូវទៅ​បើកការ​ប្រកួតនោះតែម្តង តើស្អីទៅ? ប្រកួតវាយកូនហ្គោល តែខ្ញុំមិនមានសិទ្ធិចូលប្រកួតទេ ហើយក៏មិនបាន​ចុះឈ្មោះចូលប្រកួតដែរ តែនឹងទៅបើកការប្រកួត និងទៅបិទជូនរង្វាន់នៅសណ្ឋាគារកាំបូឌីយ៉ាណាវិញ។ ព្រឹកថ្ងៃសៅរ៍ ចាប់ផ្តើម​បើក​ការប្រកួត ហើយក៏ចាប់ផ្តើមវាយក្រុមមួយផ្សេង កាប់ចាក់ក្រុមមួយផ្សេងទៅ នោះពានរង្វាន់ ហ៊ុន សែន ២០១៧ ខាងផ្នែកកូនហ្គោល តែមិនតម្រូវការថវិកាពីក្រសួងអប់រំទេ។

សុំអភ័យទោសនូវការខ្វះខាត ប្រសិនជាមិនពេញចិត្តជាមួយសំដីណាមួយ ប៉ុន្តែគឺជាការចង់បាន ហើយ​ចង់​អោយកីឡារបស់យើងថ្លៃថ្នូរ ហើយក៏ផ្តាំផ្ញើទៅអ្នកដែលគាំទ្រកីឡាទាំងឡាយ កុំរពឹសខ្លាំងពេក ជាមួយ​នឹង​ការបង្ហោះតាមហ្វេសប៊ុក ទៅលើការទាមទារនេះ ទាមទារនោះ ព្រោះយើងត្រូវមានស្តង់ដាមួយ ជាក់​លាក់ ដែលកំណត់ដោយអនុក្រឹត្យ មិនមែនបំពាន ហើយតាមចិត្តដែលខ្លួនចង់ គាំទ្រកីឡានេះ គាំទ្រកីឡា​នោះ​ទេ យើងគិតគូរទាំងអស់ជាកញ្ចប់បញ្ហាតេម្តង។

ជាថ្មីម្តងទៀត អបអរសាទរ ចំពោះក្មួយៗកីឡាករ/ការិនី ដែលទទួលជោគជ័យ ហើយនឹងអំពាវនាវអោយ មានការខិតខំពីគ្រប់កីឡាករ/ការិនីដទៃទៀត ដែលនឹងត្រូវប្រកួតនៅពេលក្រោយៗទៀត ដើម្បីអនាគត សម្រាប់ខ្លួនយើង សម្រាប់ប្រទេសរបស់យើង ក្រុមគ្រួសាររបស់យើង។ ជូនពរចំពោះ សម្តេច ឯកឧត្តម លោកជំទាវ អស់លោក លោកស្រី ពិសេសក្មួយៗកីឡាក/ការិនី សូមទទួលបានជោគជ័យ និងជួបប្រទះតែ នឹងពុទ្ធពរ និងពរប្រាំប្រការ៖ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕