សម្រង់ប្រសាសន៍​​សម្តេច​តេជោ ហ៊ុន សែន ថ្លែងក្នុងពិធី​បិទទ្វារទឹកទំនប់វារីអគ្គិសនីសេសានក្រោម២ អានភាព៤០០ មេហ្កាវ៉ាត់ ខេត្តស្ទឹងត្រែង

190

CNV: 25 ខែ​កញ្ញា, 2017

ឯកឧត្តម Xiong Bo អគ្គរដ្ឋទូតវិសមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំ​ព្រះ រាជាណាចក្រកម្ពុជា!

សម្តេច ឯកឧត្តម លោកជំទាវ អស់លោក លោកស្រី បងប្អូនជនរួមជាតិ ដែលបាន​អញ្ជើញ​ចូល​រួមនៅក្នុង​ឱកាសនេះ ជាទីនឹករលឹក!

ថ្ងៃនេះ ខ្ញុំពិតជាមានការសប្បាយរីករាយ ដែលបានវិលត្រឡប់​មកកាន់ទីនេះសាជាថ្មីម្តងទៀត បន្ទាប់​ពីឆ្នាំ​ទៅ បានមកកាន់ទីនេះម្តងរួចទៅហើយ ហើយក៏បានកំណត់កាលបរិច្ឆេទតាំងពីមួយឆ្នាំមុនមកម្ល៉េះ ដើម្បី​យកថ្ងៃនេះ ធ្វើជាថ្ងៃដើម្បីបិទទំនប់ទី ១ សម្រាប់ការចាប់ផ្តើមដំណើរការនៃទំនប់វារីអគ្គិសនីសេសាន ២ របស់យើង។ ថ្ងៃនេះ ពិតជាថ្ងៃប្រវត្តិសាស្រ្ត ដូចដែល ឯកឧត្តម ស៊ុយ សែម ក៏ដូចជា ឯកឧត្តម ហ៊ុង យុងដា បានលើកឡើងអម្បាញ់មិញ ពាក់ព័ន្ធជាមួយនឹងដំណើរការជាមួយនឹងវារីអគ្គិសនីនេះ។

បង្វែរផ្លូវជាតិលេខ ៧៨ ចៀសវាងប៉ះពាល់ពេលបិទទំនប់

មុននឹងឈានទៅដល់ដំណាក់កាលថ្ងៃ​នេះ យើងបានខិតខំប្រឹងប្រែងជាមួយនឹងការងារជាច្រើន​ តាំងពី​ប្រមាណ ១០ ឆ្នាំ ឯណោះ។ ហេតុអ្វីបានជាយើងនិយាយពី ១០ ឆ្នាំមុន? គម្រោងការ​អនុវត្តនីមួយៗ​មិន​មែនជាបញ្ហាកញ្ឆក់កណ្តៀត តាមបែបនឹកឃើញ ​និងស្មានៗដូចក្រុមមនុស្សមួយចំនួននោះទេ។ ក៏ប៉ុន្តែ យើងមានការសិក្សាច្បាស់លាស់ អំពីបញ្ហានេះ រាប់ទាំងការបង្វែរផ្លូវជាតិ ៧៨ ដែលតភ្ជាប់ពីស្ទឹងត្រែង​ទៅ​រតនគិរី ត្រង់តំបន់ស្រែពក ហើយទៅឆ្ងាយ ព្រោះថា ​នៅពេលដែលយើងបិទទំនប់នៅទីនេះ ធ្វើវារីអគ្គិសនី វានឹងមានផលប៉ះពាល់​ទៅដល់​ផ្លូវ​ជាតិ​លេខ ៧៨ តែម្តង។ ដូច្នេះ បានជាយើងត្រៀមរៀបចំកសាងផ្លូវ ដែលកំពុងតែដំណើរការ ប្រហែលជា​បង​ប្អូន​អាចមើលឃើញថា ផ្លូវជាតិលេខ ៧៨ កាលពីពេលមុន​ឆ្លង​កាត់នៅតំបន់ស្រែពក មានការប្រែប្រួល ហើយ​ការប្រែប្រួលនោះ បណ្តាល​មកពី​ការ​សិក្សានៅតំ​បន់​នេះ​នោះ​ឯង។ ដូច្នេះ ចក្ខុវិស័យនៃការអភិវឌ្ឍនៅក្នុងវារី​អគ្គិសនីសេសានទី ២ នេះ​ មិនមែនគ្រាន់តែជា​បញ្ហា​មួយ​ថ្ងៃ​ពីរថ្ងៃ មួយឆ្នាំពីរឆ្នាំ ឬបីបួនឆ្នាំនោះទេ គឺយើង​បានធ្វើកិច្ចការនេះ​ជាង ១០ ឆ្នាំរួចមកហើយ។

សេសាន ២ អានុភាព ៤០០ មេហ្គាវ៉ាត់ និងវិនិយោគដោយក្រុមហ៊ុនពហុភាគី

ថ្ងៃនេះ ខ្ញុំពិតជាមានការរីករាយដោយយើងបានមកចូលរួមជាមួយគ្នា ដើម្បីចាប់ផ្តើម​បិទទ្វារទឹកទំនប់​វារី​អគ្គិ​សនី​សេសាន។ តាមរយៈនោះ ដំណើរការចាប់ផ្តើមពីទីនេះ យើងនឹងផ្តល់នូវវឌ្ឍនភាព​ថ្មីមួយ សម្រាប់​ទូទាំងព្រះ​រាជាណា​ចក្រ​កម្ពុជា និងនៅក្រោមនយោបាយអាទិភាពរបស់យើង អំពីមនុស្ស ទឹក ផ្លូវ ភ្លើង ដែលជាគោល​នយោបាយអាទិភាព សម្រាប់ការវិនិយោគរបស់ព្រះរាជាណាចក្រកម្ពុជា។ ជាមួយនឹង​ការ​ខិតខំនេះ ខ្ញុំសូម​សម្តែងនូវការកោតសរសើរ​ចំ​ពោះក្រសួងរ៉ែ និងថាមពល ក៏ដូចជាក្រុមហ៊ុនដៃគូ។ ខ្ញុំអាច​និយាយថា ជាវារី​អគ្គិ​សនីដែលធំជាងគេនៅ​ក្នុង​ព្រះ​រាជាណាចក្រកម្ពុជា ដែលមុននេះ យើងមានតែត្រឹម​ជាង ១០០ ទៅ ២០០​ មេហ្គាវ៉ាត់ ក៏ប៉ុន្តែ នេះជា​វារី​អគ្គិ​​សនីដែលមានកម្លាំងរហូតទៅ​ដល់ ៤០០ មេហ្គា​វ៉ាត់។ បន្ថែមលើនេះ នេះក៏ជាទំនប់វារីអគ្គិសនី​ដែល​មាន​ភាពជាដៃគូរហូតដល់ទៅ ៣ គឺមានកម្ពុជាយើង មានរ៉ូយ៉ាល់គ្រុប​របស់​លោកឧកញ៉ា គិត ម៉េង ក៏ដូចជា ក្រុមហ៊ុន China Huaneng Group ដែលមាន​អគ្គ​នាយក ហ៊ុង យ៉ុងដា បានលើកឡើងអម្បាញ់មិញ​ ហើយ​និង​ក្រុម​ហ៊ុន​វៀតណាម ដែលជាអ្នកសិក្សាចំនួន ១០ ភាគរយ នៅ​ទី​នេះ …។

តម្រូវការអគ្គិសនីកើនឡើង/ផលិតអគ្គិសនីមានអន្តរសកម្មវិស័យដទៃទៀត

ខ្ញុំសូមចាប់ផ្តើមពីស្ថានភាព ដែលយើងត្រូវនិយាយថា ដំណាក់កាលដុតទៀន ដំណាក់កាលដុតចង្កៀង​ប្រេង​កាត ដុតចន្លុះ ដុតជ័រ ដុតខ្លាញ់ត្រី ត្រូវបានរសាត់ឆ្ងាយពីទឹកដីព្រះរាជាណាចក្រកម្ពុជាទៅហើយ។ ឥឡូវនេះ មិនដូចជាដំណាក់កាលដូចសម័យកាលដើម ឬក៏ ៣០ ឆ្នាំមុន ដែលយើងនាំគ្នាពេលនោះ គឺលក់​ប្រេង​កាត​ជូន​ប្រជាជនរបស់យើង។ ឥឡូវនេះ អគ្គិសនីរបស់កម្ពុជា​បានកើន​​ឡើង​ជាបន្តបន្ទាប់ ហើយ ខ្ញុំ អាច​ធ្វើការ​ប្រៀប​ធៀបថា នៅក្នុងទសវត្សរ៍ ៨០ ពេលនោះ យើងប្រើប្រាស់អគ្គិសនីមានត្រឹមប្រមាណតែ ៣០​ ទៅ ៤០ មេ​ហ្គាវ៉ាត់តែប៉ុណ្ណោះ។ ព្រះរាជាណាចក្រកម្ពុជាបច្ចុប្បន្ន បានឈានដល់ដំណាក់កាលជាង ២ ពាន់មេហ្គាវ៉ាត់ រួចស្រេចទៅហើយ គ្រាន់តែទីក្រុងភ្នំពេញមួយ ត្រូវប្រើប្រាស់ប្រមាណខ្ទង់ ៥០០ មេហ្គា​វ៉ាត់ ដែលមុននេះ ត្រឹមតែ ៣០ មេហ្គាវ៉ាត់។ ឥឡូវនេះ អគ្គិសនីរបស់យើងមានតម្រូវការកាន់តែខ្ពស់ ហើយ​តាមរយៈ​វិស័យអគ្គិសនីនេះ វា​មាន​អន្ត​រសកម្មទៅលើវិស័យឧស្សាហកម្ម វិស័យសេវា វិស័យកសិកម្ម​ និង​វិស័យដទៃទៀត ដែលទាក់ទង​នឹងជីវ​ភាព​របស់ប្រជាពលរដ្ឋរបស់យើង។

អគ្គិសនីបានពីសេសាន ២ នឹងផ្គត់ផ្គង់ចម្បងដល់ខេត្ត ៤ នៃភាគឦសាន ឬអាចដល់ខេត្តព្រះវិហារ និងកំពង់ធំ

សម្រាប់ភូមិភាគឦសានរបស់យើងនេះ ដែលរួមមានខេត្តស្ទឹងត្រែង ខេត្តក្រចេះ ខេត្តរតនគិរី និងមណ្ឌលគិរី ការផ្គត់ផ្គង់អគ្គិសនីរបស់យើង ដែលមុននេះ គឺជាការផ្គត់ផ្គង់ដែលមានលក្ខណៈបណ្តោះអាសន្នតែប៉ុណ្ណោះ ដោយ​គ្រា​​ន់​តែជាការផ្គត់ផ្គង់ ដែលយើងទាញភ្លើងពីឡាវមកខ្លះ​ និងទាញភ្លើងតាមរយៈការផលិតរបស់​ក្រុម​ហ៊ុន​តូចៗ​មួយចំនួន។ ប៉ុន្តែ ចាប់ពីពេលនេះទៅ ជាពិសេស នៅពេលដែលតួប៊ីនទី ១ ចាប់ផ្តើមដំណើរការ អ្នកនៅក្នុង​ខេត្ត​ស្ទឹងត្រែងផ្ទាល់ ក៏ដូចជាអ្នកដែលរស់នៅតាមតំបន់នេះ ដែលតាមរយៈអនុស្ថានីយ​នៅខេត្ត​ក្រចេះ វានឹង​អាច​ផ្តល់អោយខេត្តទាំង ២ នេះ នូវស្ថេរភាពនៃការផ្គត់ផ្គង់ បូកជាមួយនឹងការរៀបចំ​បណ្តាញ​សម្រាប់​​ផ្គត់ផ្គង់​ទៅ​ខេត្ត​រតនគិរី និងមណ្ឌលគិរី ដែលធ្វើអោយខេត្តទាំង ៤ នេះ អាចមានស្ថេរ​ភាព សម្រាប់​ការផ្គត់ផ្គង់រយៈពេលវែង ហើយមានតម្លៃថោក។

បន្ថែមលើនោះ យើងក៏បានគិតគូរប្រមើលមើលអំពីការផ្គត់ផ្គង់សម្រាប់ខេត្តព្រះវិហារ ថាត្រូវទាញភ្លើងពីឡាវ​មក​កាន់ខេត្តព្រះវិហារ ឬក៏ត្រូវទាញភ្លើងពីវារីអគ្គិសនីសេសាន? បើយើងគិតអំពីខេត្តស្ទឹងត្រែង ទៅកាន់​ខេត្ត​ព្រះ​វិហារ គឺអាចនិយាយបានថា ចម្ងាយនោះវាមិនឆ្ងាយជាងពីកំពង់ចាម មកកាន់ខេត្ត​ស្ទឹងត្រែង​នោះ​ទេ។ ក៏ប៉ុន្តែ ដោយសារមានតម្រូវការទាប ការវិនិយោគទៅលើបណ្តាញ ដែលតភ្ជាប់ជាមួយនឹងវារីអគ្គិសនី​សេសាន នៅខេត្ត​ស្ទឹង​ត្រែងនេះ វាក៏មានការលំបាក ហើយថ្លឹងថ្លែងអំពីការចំណេញខាត​នៅទីនោះផង​ដែរ​។ ប៉ុន្តែ គេក៏ត្រូវ​គិត​អំពី​លទ្ធភាពផ្សេងទៀត នៃការផ្គត់ផ្គង់អគ្គិសនី សម្រាប់ខេត្តកំពង់ធំ ខេត្តព្រះវិហារ ដែលជាតំបន់ខ្វះ​ខាត​ដែរ។

ធ្វើវារីអគ្គិសនី ផលិត​អគ្គិសនី ប្រតិ​សកម្មនឹង​វិស័យដទៃទៀត

តាមរយៈនៃការដែលយើងបញ្ចេញនូវអគ្គិសនីនៅទីនេះ ចំនួនអគ្គិសនីដែលយើងត្រូវការផ្គត់ផ្គង់ ហើយដែល​បច្ចុប្បន្ន យើងកំពុងនាំចូលពីក្រៅប្រទេសនាំចូលពីវៀតណាម នាំចូលពីថៃ នាំចូលពីឡាវ នឹងមានការ​កាត់​បន្ថយ ព្រោះថា ប្រទេសទាំងនោះសុទ្ធតែមានតម្រូវការផ្ទាល់ខ្លួន អំពីការកើនឡើងនៃអគ្គិសនី។ សម្រាប់​កម្ពុជា​ យើងត្រូវការនូវឯករាជ្យភាពរបស់ខ្លួន ទៅលើការផ្គត់ផ្គង់អគ្គិសនីផងដែរ។ នៅទីណាក៏ដោយ ពេល​ប្រជុំ​អន្តរ​ជាតិ​សំខាន់ បញ្ហាពីរដែលបានលើកមកពិភាក្សា គឺសន្តិសុខស្បៀង និងសន្តិសុខថាមពល​នោះ​ឯង។​ សម្រាប់ព្រះ​រា​ជា​ណាចក្រកម្ពុជាក៏ដូចគ្នា ដើម្បីការរីកលូតលាស់នៃ​វិស័យកសិកម្ម សេវាកម្ម ក៏ដូចជា វិស័យផ្សេងទៀត រាប់ទាំង​កសិ​កម្មផងដែរ ទាមទារអោយអគ្គិសនីត្រូវដើរមុខមួយជំហាន ទើបអាចទៅរួច។

យើងលើកឧទាហរណ៍៖ បើសិនជាចង់អោយឧស្សាហកម្មរបស់យើងមានការប្រកួតប្រជែង ផលិតទំនិញ​កាន់​តែច្រើន ហើយការកែច្នៃផលិតផល ដែលជម្រុញទៅលើបញ្ហា​វិស័យឧស្សាហកម្មនោះ ទាមទារអោយ​មាន​ការផ្គត់ផ្គង់អគ្គិសនីដោយទៀងទាត់ និងដោយតម្លៃថោកគួរសម​ ទើបអាចឈានជម្រុញ ទៅលើ​ការ​អភិវឌ្ឍ​វិស័យឧស្សាហកម្មបាន។ លើកបញ្ហាមួយប៉ុណ្ណោះក្នុងវិស័យសេវាកម្ម គឺទាក់ទងនឹងសណ្ឋាគារ និង​ទេស​ចរណ៍។ សណ្ឋាគារ/ទេសចរណ៍បច្ចុប្បន្ន មិនមែនទេសចរណ៍បក់ផ្លិតដូចកាលពីសម័យដើមទេ។ ជាទេសចរណ៍​ដែល​​ប្រើម៉ាស៊ីនត្រជាក់ ហើយក៏ជាទេសចរណ៍ដែលត្រូវប្រើប្រាស់នូវគ្រឿងយន្ត ជណ្តើរយន្ត ដូចជាឥឡូវ​​យើង​មាន​អគារ រហូតទៅដល់រាប់សិបជាន់។ ប្រសិនបើគ្មានអគ្គិសនីទាញជណ្តើរយន្តទេ គេក៏មិនអាចទៅរួចផងដែរ។ វិស័យកសិកម្មក៏ដូចគ្នា ឥឡូវបូមទឹកដាក់ស្រែនៅកន្លែងខ្លះ ក៏ត្រូវបូមទឹកទៅ​ដោយការប្រើប្រាស់អគ្គិសនី។

តម្រូវការអគ្គិសនីកើន​ឡើងរាល់ថ្ងៃ

ដូច្នេះហើយបានជារាជរដ្ឋាភិបាលត្រូវរកវិធី ដើម្បីដោះស្រាយបញ្ហាកង្វះអគ្គិសនី ដែលមុននេះមានត្រឹមតែ ៣០ មេហ្គាវ៉ាត់ ជាងតែប៉ុណ្ណោះ។ ក្រោយរំដោះ ១៩៧៩ ហើយមកដល់ឆ្នាំ ២០០៥ ពេលនោះ​កម្ពុជា​មាន​អគ្គិសនី​ត្រឹមតែជាង  ២០០  មេហ្គាវ៉ាត់ ប៉ុន្តែ ដល់ឆ្នាំ ២០១៧ នេះ យើងមានជាង ២.០០០ មេហ្គាវ៉ាត់ បាន​សេចក្តីថា មានកំណើនប្រមាណ ១០ ដង សម្រាប់ប្រជាជនរបស់យើង។ តម្រូវការពិតជាត្រូវការច្រើន ហើយពីមួយថ្ងៃទៅមួយថ្ងៃ គ្មានថ្ងៃមួយដែលថាអគ្គិសនីវាមិនកើននោះទេ ដោយសារវាមានតម្រូវ​ការរបស់​វា។ សូម្បីតែឥឡូវនេះ ពេលនេះ ម៉ោងនេះ តើមានក្មេងប៉ុន្មាននាក់ទៅដែលវាកើត? នៅពេលដែលវាកើត វាត្រូវការ​ទាំង​អស់ ក្នុងហ្នឹងរាប់ទាំងបញ្ហាអគ្គិសនី។ បន្តិចទៀតចាប់ចេញវស្សា រួចហើយ គឺដល់​រដូវការ​ហើយ ដែលកូនកម្លោះកូនក្រមុំតែងតែត្រូវការបន្ទប់ថ្មី ឯបន្ទប់ថ្មីរបស់ពួកគេ មិនមែនជាបន្ទប់ដែលដុតប្រេង​កាតទៀតទេ គឺ​ជា​បន្ទប់ដែលមានអគ្គិសនី ហោចណាស់ក៏មានកង្ហារដែរ មិនមែនជាបន្ទប់ ដែលគេហៅថា បក់ផ្លិត​ដូចសម័យដើមទេ។ ត្រង់នេះហើយ បានជាយើងមានតម្រូវការ។

ការផលិតអគ្គិសនី ខុសពីការវិនិយោគផ្នែកដទៃទៀត

យើងមិនអាចនឹងផលិតផ្ទួនៗ ដោយមិនរង់ចាំដំណាក់កាលរបស់វានោះទេ ដូច្នេះ បានជាផែនការក្នុងការ​ផលិត​អគ្គិសនី ផលិតមួយណាមុន មួយណាក្រោយ ព្រោះវាមានតម្រូវការរបស់វា។ ខ្ញុំសូមបញ្ជាក់ជូនបន្តិច ការ​ផលិត​អគ្គិសនីខុសពីការវិនិយោគផ្នែកដទៃទៀត នៅត្រង់ថា ដើម្បីអោយគេធានាដាក់ទុនវិនិយោគនៅ​ក្នុង​ការ​វិនិយោគសេសាន ២ នេះ គឺវិនិយោគទៅដល់ជាង ៧០០ លានដុល្លារសហរដ្ឋអាមេរិក។ ដូច្នេះ តម្រូវ​ការ​វិនិ​យោគ​ខាងផ្នែកទាក់ទិនជាមួយនឹងវារីអគ្គិសនី តម្រូវអោយមានការធានាដល់រដ្ឋសភា ដោយ​អង្គការនីតិបញ្ញត្តិ។

ឧស្សាហកម្ម និងសេវាមួយចំនួន មិនមានតម្រូវការអោយរដ្ឋាភិបាលធ្វើការធានា​ទៅដល់កម្រិតថ្នាក់​រដ្ឋ​សភា ថ្នាក់នីតិបញ្ញត្តិនោះទេ។ ក៏ប៉ុន្តែ សម្រាប់អគ្គិសនី គឺតម្រូវការបែបនេះ ព្រោះអញ្ចេះ ក្រែងលោ​រដ្ឋា​ភិ​បាល​ក្រោយ​មិនគោរពនូវការសន្យា។ ដូច្នេះ ហើយដើម្បីធានាយកទុនដ៏ធំ ​សម្រាប់បណ្តាក់​នៅទីកន្លែង​មួយ ហើយរយៈពេល ៤៥ ឆ្នាំ ៣៥ ឆ្នាំ សម្រាប់ការសាងសង់ និង ៤០ ឆ្នាំ សម្រាប់ដំណើរការ ក្រោយរយៈ​ពេល ៤០ ឆ្នាំ ដំណើរការហើយ តំបន់នេះនឹងក្លាយជាតំបន់របស់រដ្ឋតែម្តង ពេលនោះរដ្ឋគ្រប់គ្រង នឹងយក​មក​គ្រប់​គ្រង ១០០ ភាគរយ។ រដ្ឋចង់ជួលអោយក្រុមហ៊ុនតទៅទៀត អាហ្នឹងរឿងរបស់រដ្ឋ ហើយតម្លៃគិត​ផ្សេង។

ដើម្បីធានាទៅដល់ការវិនិយោគបាន ទាមទារអោយរដ្ឋាភិបាលត្រូវឆ្លងកាត់ការធានា ពីអង្គការនីតិបញ្ញត្តិ ព្រោះ​​នៅ​ពេលដែលគេផលិតហើយ វាមានចំណុចរបស់វាត្រង់អញ្ចេះ បើផលិតហើយ គេផលិតបានប៉ុន្មាន ត្រូវ​ទិញ​អស់ប៉ុណ្ណឹង បើទិញមិនអស់ទេ យើងត្រូវសងថ្លៃគេទាំងអស់តែម្តង។ អញ្ចឹងទេ បានជាមាន​តម្រូវ​ការ នៃ​ការដែលរាជរដ្ឋាភិបាលត្រូវការធានាពីអង្គការនីតិបញ្ញត្តិ ដើម្បីធានាថា ទុនរបស់គេមិនបានបាត់​បង់​នៅ​ក្នុង​ការ​វិនិយោគមួយនេះ។ ខ្ញុំពិតជាមានការរីករាយ ដោយសារតែគម្រោងការនេះត្រូវ បានអនុវត្តទាន់​ពេល​វេលា។

ដើម្បីបានអគ្គិសនី និង​បង្កើតការងារ ត្រូវ​លះបង់​ខ្លះ(ចំពោះបរិស្ថាន)

ខ្ញុំក៏សុំកោតសរសើរ ​ជាមួយនឹងក្រសួងរ៉ែ និងថាមពល ជាមួយនឹងក្រុមហ៊ុន ក៏ដូចជា អភិបាល (នៃ)គណៈ​អភិ​បាល​ខេត្ត​ស្ទឹងត្រែង ដែលបានចូលរួមដោះស្រាយបញ្ហានោះទាន់ពេលវេលា ជាពិសេស ការដោះ​ស្រាយផល​ប៉ះ​ពាល់​នានា ដែលទាក់ទងជាមួយនឹងតំបន់ដែលត្រូវទុក។ គ្មានការអភិវឌ្ឍ​ណាមួយដែលមិន​ប៉ះពាល់ទៅ​ដល់​បរិស្ថាននោះទេ គ្រាន់តែវាមានទំហំច្រើន និងទំហំតិចតែប៉ុណ្ណោះ ដែលទាមទារនូវ​ការ​ថ្លឹង​ថ្លែង ដើម្បីនឹងថា តើយើងគួរធ្វើ ឬមិនគួរតែប៉ុណ្ណោះ? តើមានការអភិវឌ្ឍណាមួយលើលោកនេះ ដែលវាមិន​ប៉ះពាល់ដល់​បរិស្ថាន​នោះ? ចំណុចនេះ ខ្ញុំគិតថា អ្នកបរិស្ថាននិយមជ្រុលមួយចំនួន គួរតែត្រូវបាន​ការ​ត្រិះរិះ​ឡើងវិញ។ ម្ខាងខ្លួន​ទាម​ទារមានអគ្គិសនីប្រើប្រាស់ និងតម្លៃថោក តែម្ខាងទៀត ខ្លួនតែងតែទៅរារាំង និង​បញ្ចៀស ដើម្បីកុំអោយ​មាន​ការ​អភិវឌ្ឍ។ ដូច្នេះ ន័យពិតប្រាកដគឺអ្វី? ដើម្បីចង់សួរថា អ្នកឯងម្ខាង​ចង់​មាន​ភ្លើងប្រើ ហើយចង់អោយភ្លើង​នោះ​វា​ចុះ​​ថោកទៅទៀត។ ម្ខាងទៀត ទៅកន្លែងណាក៏មានមុខអ្នកឯង​ទៅ​ប្រឆាំងដែរ អ្វីក៏ប្រឆាំងៗ ប្រឆាំងគ្រប់ទាំង​អស់។

នៅប្រទេសកម្ពុជាយើង ជាឋានសួគ៌លោកិយរបស់អង្គការប្រឆាំងតែម្តង អោយតែអ្នកណាប្រឆាំង គឺអ្នក​ហ្នឹង​បាន​លុយ​ពីបរទេស យកមកធ្វើសកម្មភាពប្រឆាំងតែម្តង។ ផ្កាប់មុខប៉ុណ្ណាក៏នៅតែប្រឆាំងដែរ។ យើង​មើលពិភព​លោក​​ទៅ​មើល សួរថា មួយថ្ងៃៗយន្តហោះដែលហោះរាប់ម៉ឺន រាប់ពាន់គ្រឿង តើអាហ្នឹង​វាពាក់​ព័ន្ធដល់​បរិ​ស្ថានទេ? សូម្បីតែយន្តហោះ ហោះលើមេឃ សួរថាវាចេញផ្សែងពេញលើអាកាសនោះ តើវាមិន​បំផ្លាញ​បរិ​ស្ថាន​ទេអី? សព្វថ្ងៃ ប្រទេសអ្នកមានៗបូមប្រេងកាតនៅក្រោមទឹក នៅក្រោមសមុទ្រ នៅក្រោម​ទន្លេ ឬក៏​នៅ​ក្រោមដីយកមកប្រើប្រាស់។ តើវាមិនប៉ះពាល់ដល់បរិស្ថានទេអី? វាប៉ះពាល់ដូចតែគ្នាហ្នឹង? ប្រទេសខ្លះ​ទៀត​គេចាប់ផ្តើមអនុវត្តប្រើប្រាស់ថាមពលនុយក្លេអ៊ែរ ដើម្បីផលិតអគ្គិសនី​ ហើយនៅពេល​ដែល​វាផ្ទុះម្តងៗ វាងាប់មនុស្សច្រើនណាស់ ហេតុអ្វីបានជាគេត្រូវធ្វើ? ព្រោះវាមានតម្រូវការនៃជីវិតរបស់មនុស្ស។ ឯយើងធ្វើ​ត្រង់​ណាក៏វាមានបញ្ហាដែរ? នៅទីនេះខ្ញុំក៏បានដឹង ហើយខ្ញុំអរគុណ ដោយខ្ញុំបានទៅពិនិត្យ​មើល​ភូមិក្បាល​រមាស, ស្រែស្រណុក …។

ការដោះស្រាយផលប៉ះពាល់

ខ្ញុំសូមសរសើរ ចំពោះការរៀបចំភូមិករ ហើយខ្ញុំគិតថា នៅពេលណាមួយខ្ញុំនឹងទៅសម្រាកនៅផ្ទះ ដែលខ្ញុំ​ធ្លាប់​ទៅនោះ។ កុំអីខ្ញុំទៅយប់មិញហើយ ក៏ប៉ុន្តែ វាភ្លៀងច្រើនពេក មិនទាន់សម្រាកបាន អាចទៅ​សម្រាក​នៅទី​នោះនៅពេលណាមួយ ដើម្បីចង់ដឹងថា តើធាតុអាកាសនៅម្តុំនោះវាយ៉ាងម៉េច? ហើយអាចថា តំបន់​នេះជាតំបន់ដែលដោះស្រាយផលប៉ះពាល់បានល្អប្រសើរ ជាមួយនឹងសំណងដែលផ្តល់ជូនប្រជាពលរដ្ឋ ឯ​ប្រជា​ពល​រដ្ឋមិនទាន់ចាកចេញ តាមខ្ញុំដឹង គាត់មានចំការវិលជុំរបស់គាត់។ គាត់អាងចំការវិលជុំរបស់គាត់ ដល់តែ​យើង​ទប់អាហ្នឹងទៅ គាត់មិនមក(ទី)នេះទេ គាត់ទៅចំការវិលជុំរបស់គាត់នោះ។ ប៉ុន្តែ ផ្ទះក៏យើង​ត្រៀម​​ដែរ។ គាត់មកឯណេះក៏យើងអោយផ្ទះ ទៅអាចំការវិលជុំក៏គាត់នៅ គាត់មកអាផ្ទះនេះក៏គាត់មក ដូច្នេះ យើង​ចេះតែត្រៀមទៅ។ គាត់ចង់យកលុយអោយលុយគាត់ទៅ គាត់ចង់យកផ្ទះ អោយផ្ទះគាត់ទៅ។ ការដោះ​ស្រាយ​​នៅកន្លែងនេះ អស់ប៉ុណ្ណេះ នេះគឺជារឿងចាំបាច់សម្រាប់ការអភិវឌ្ឍប្រទេស។

ការជម្រុញអភិវឌ្ឍន៍នូវវិស័យសេដ្ឋកិច្ចសង្គម តម្រូវអោយមានអគ្គិសនី

តំបន់ខេត្តទាំងបួននៅឦសាន និងអាចថា ព្រះវិហារមួយទៀត ក៏អាចចាត់បញ្ចូលនៅក្នុងតំបន់ដែលខ្វះ​អគ្គិ​សនី ប៉ុន្តែ សម្រាប់ការជម្រុញអភិវឌ្ឍន៍នូវវិស័យសេដ្ឋកិច្ចសង្គម សម្រាប់ប្រទេសទាំងមូល តម្រូវការ​អោយ​មាន​អគ្គិស​នី ហើយយើងនឹងបន្តកសាងអគ្គិសនីតាមដំណាក់កាលនីមួយៗ ដើម្បីឆ្លើយតបទៅនឹង​តម្រូវការ​នោះ។ អម្បាញ់មិញខ្ញុំនិយាយថា យើងត្រូវមានការធានា។ គេផលិតបានប៉ុន្មាន គឺយើងត្រូវទិញគេប៉ុណ្ណឹង បើទិញគេមិនអស់ ត្រូវសងគេ។ អញ្ចឹង បើយើងកសាងភ្លាម ថាបាន ៥ ពាន់ ឬ ១ ម៉ឺនមេហ្គាវ៉ាត់ ពេល​ដែលគេបញ្ឆេះម៉ាស៊ីន ពេលណាក៏ដោយ (គឺ)ទារលុយពីយើងទាំងអស់។ អញ្ចឹង បានជាទាមទារនូវការ​គិតគូរហ្មត់ចត់ អំពីកំណើននៃតម្រូវការសម្រាប់ការផ្គត់ផ្គង់ ហ្នឹងម្ខាង។ ម្ខាងទៀត ដូចជាការផលិតរថយន្ត ប៉ុន្តែ ការផលិត​រថ​យន្តវាមិនទាន់គ្រប់នោះទេ យើងត្រូវការនូវផ្លូវ​ ដើម្បីអោយរថយន្តសម្រាប់បើកបរ។ បើ​គ្រាន់តែមាន​រោង​ចក្រ​ធ្វើឡាន ហើយអត់មានផ្លូវ តើឡាននោះវាបើកទៅណា? វាករណីដូចគ្នានោះដែរ យើងផលិតវារី​អគ្គិសនី​នៅ​​ទីនេះ ក៏ប៉ុន្តែ ដើម្បីអោយអគ្គិសនីនៅទីនេះវាទៅកន្លែងផ្សេងបាន ទាមទារនូវការ​កសាងបណ្តាញ​ចែក​ចាយ​របស់វា ដែលតភ្ជាប់ពីខេត្តស្ទឹងត្រែង ចុះទៅក្រចេះ ពីក្រចេះ ទៅកំពង់ចាម និង​ពី​កំពង់ចាម ចូលទៅ​ទី​ក្រុង​ភ្នំពេញ ដើម្បីនឹងភ្ជាប់ជាមួយបណ្តាញមេទាំងអស់។

ឆ្នាំ ២០២២ នៅគ្រប់ភូមិទាំងអស់មានអគ្គិសនីប្រើប្រាស់

មកដល់បច្ចុប្បន្ននេះ តម្លៃភ្លើងរបស់យើងកាន់តែធ្លាក់ចុះ ដែលមុននេះប្រើប្រាស់ច្រើនតម្លៃខ្ពស់។ ឥឡូវនេះ តម្លៃ​វាបានធ្លាក់ចុះ។ ខាងក្រុមហ៊ុនអគ្គិសនីក៏បានកាត់បន្ថយនូវប្រាក់ចំណេញរបស់ខ្លួនយ៉ាងច្រើន ហើយ​តាម​រយៈ​នោះ ក៏ធ្វើអោយខ្វះខាតជាមួយនឹងថវិកាសម្រាប់ការតភ្ជាប់នូវបណ្តាញចែកចាយផងដែរ។ ឥឡូវ យើង​ពិនិត្យ​ផែនការរបស់យើងនៅទូទាំងប្រទេស។ ឆ្នាំ ២០២២ គ្រប់ភូមិទាំងអស់មាន​អគ្គិសនី​ប្រើ​​ប្រាស់​។ យើងមានភូមិ ១ ម៉ឺន ៤ ពាន់ ១៦៨ ភូមិ។ មកដល់ពេលនេះ អ្នកភូមិនៅទូទាំងប្រទេស ដែល​បាន​ទទួល​ភ្លើង​រួចមកហើយមាន ១ ម៉ឺន ១ ពាន់ ១៩៤ ភូមិ។ ត្រូវជា ៧៩%។ អញ្ចឹង យើងត្រូវខិតខំ ដើម្បីធ្វើ​អោយ​ភូមិ​ទាំង​អស់​របស់​ប្រជាជនមានអគ្គិសនីទៅដល់ ហើយផ្គត់ផ្គង់ដោយតម្លៃសមរម្យ។ ឥឡូវនេះមាន ៣ លាន ៨ សែន ២ ម៉ឺន ខ្នងផ្ទះដែលមានអគ្គិសនីប្រើប្រាស់ ប៉ុន្តែ ប្រជាជនកម្ពុជាយើងមានចំនួន​ច្រើនជាង​នេះ ដែលមាន​តម្រូវ​ការ​ភ្លើង។ កន្លែងខ្លះមានការជេរអគ្គិសនីកម្ពុជា។ ជេរនោះចេះតែត្រូវហើយ ក៏ប៉ុន្តែ ដូចខ្ញុំ​បានបញ្ជាក់អញ្ចឹង នៅ​កន្លែងខ្លះ គឺមិនមែនជាកន្លែងអគ្គិសនីដែលផ្គត់ផ្គង់ដោយមានស្ថេរភាពទេ គឺជាការ​ផ្គត់ផ្គង់អោយខានតែបានសិន ដូចជានៅខាង​តំបន់ក្រចេះ ស្ទឹងត្រែង រតនគិរី មណ្ឌលគិរី មួយថ្ងៃៗ​ដាច់​ភ្លើងច្រើនដង ប៉ុន្តែ នៅពេលដែលយើងមានអគ្គិសនីគ្រប់គ្រាន់ មានបណ្តាញចែកចាយគ្រប់គ្រាន់ មានអនុ​ស្ថានីយគ្រប់គ្រាន់ វានឹងធ្វើអោយតំបន់ដែលត្រូវចែកចាយអគ្គិសនីនោះ វាមានស្ថេរភាព វាមិនដាច់ តម្លែ​របស់វាក៏វាធូរថ្លៃជាង។

តម្លៃប្រើអគ្គិសនី

កាលពីពេលមុនយើងប្រើភ្លើងមានតម្លៃខ្ពស់ ឥឡូវនេះ យើងបានស្ថិតនៅក្នុងតម្លៃមួយគួរសម ដែលយើង​អាច​ទទួល​យកបាន តាមរយៈនៃការបញ្ចុះថ្លៃ។ ពីមុននោះ(តម្លៃ) ៩៥០ (រៀល) ទៅ ១.០០០ រៀល ក្នុង​មួយគីឡូវ៉ាត់ម៉ោង ឥឡូវបានចុះមកដល់ ៧៧០ រៀល ក្នុងមួយគីឡូវ៉ាត់ម៉ោង នៅតំបន់អគ្គិសនី(​រដ្ឋ) និង ៧៩០ រៀល ក្នុងមួយគីឡូវ៉ាត់ម៉ោង នៅតំបន់ដែលផ្នែកឯកជនភ្ជាប់ជាមួយនឹងបណ្តាញជាតិ។ សម្រាប់​គ្រួសារក្រីក្រដែលប្រើតិច គ្រួសារដែល​ប្រើ​មិន​លើសពី ១០ គីឡូវ៉ាត់ម៉ោងក្នុងមួយខែ អនុគ្រោះអោយបង់តែ​ ៤៨០ ​រៀលប៉ុណ្ណោះ ហើយរដ្ឋជួយចេញទៅដល់ ៣១០​ រៀល ក្នុងមួយគីឡូវ៉ាត់ម៉ោង ហើយបើប្រើក្នុងរង្វង់ ១១ ដល់ ៥០ គីឡូវ៉ាត់ម៉ោងក្នុងមួយខែ អនុ​គ្រោះ​អោយបង់តែ ៦១០ រៀល តែប៉ុណ្ណោះ ដែលរដ្ឋជួយចេញ ១៨០ រៀល ក្នុងមួយគីឡូវ៉ាត់ម៉ោង។ សម្រាប់ខេត្តរតនគិរី គឺ​ថ្លៃ ៦៧០ រៀល ដោយសារតែកន្លែងនោះ គឺជា​កន្លែងដែលមានវារីអគ្គិសនីមុនគេ។ យើងនឹងបន្តគិតគូរ​បញ្ហា​នេះតទៅទៀត។

អគ្គិ​សនី “តម្រូវការរបស់ប្រជា​ជន​ក្នុង​ដំណាក់កាលថ្មី”

ខ្ញុំគិតថា មកដល់ទីនេះ អ្វីដែលខ្ញុំគួរនិយាយខ្ញុំបាននិយាយហើយ បញ្ហាតម្រូវការរបស់ប្រទេសរបស់យើង គឺមានតម្រូវការកាន់តែខ្ពស់ទៅៗ សូម្បីតែប្រជាជននៅក្នុងខេត្តស្ទឹងត្រែងរបស់យើងនេះ ដែលពីមុននេះ គឺជាអ្នកផលិតចន្លុះ ជាអ្នកដើររកជ័រទឹក ជ័រចុង និងក៏ជាអ្នកដែលធ្លាប់ប្រើប្រាស់នូវចន្លុះ នូវជ័រ នូវខ្លាញ់ត្រី ដើម្បីប្រើប្រាស់។ ឥឡូវនេះ លែងប្រើប្រាស់ បើទោះបីយ៉ាងណាក៏គង់ប្រើប្រាស់អាគុយដែរ។ ប៉ុន្តែ ដើម្បី​អាច​នឹង​បញ្ចូលអាគុយបាន ទាមទារអោយមានអគ្គិសនី។ ដូច្នេះ សង្ឃឹមថា អ្នកស្ទឹងត្រែងរបស់យើង រួមជាមួយ​អ្នកក្រចេះ អ្នករតនគិរី (អ្នក)មណ្ឌលគិរី និងទទួលបាននូវផ្លែផ្កាពីការអភិវឌ្ឍនៅក្នុងតំបន់នេះ។ ខ្ញុំសុំយក ឱកាសនេះ ថ្លែងអំណរគុណ ចំពោះប្រជាពលរដ្ឋដែលស្ម័គ្រចិត្តចាកចេញទៅកាន់តំបន់ផ្សេង បើកឱកាស អោយរាជរដ្ឋាភិបាល តាមរយៈការអភិវឌ្ឍរបស់ក្រុមហ៊ុននេះ ដើម្បីមានលទ្ធភាពវិនិយោគ សម្រាប់អគ្គិសនី ផ្គត់ផ្គង់នៅតំបន់នេះផង និងផ្គត់ផ្គង់នៅក្នុងក្របខណ្ឌទូទាំងប្រទេសរបស់យើងផង ដែលវាជម្រុញទៅដល់ វិស័យឧស្សាហកម្ម វិស័យសេវា​ វិស័យកសិកម្ម និងការផ្គត់ផ្គង់សម្រាប់លំនៅដ្ឋានរបស់ប្រជាជន ដែលជា​តម្រូវការចាំបាច់មិនអាចខ្វះបានរបស់ប្រជាជនក្នុងដំណាក់កាលថ្មី។ ខ្ញុំប្រើពាក្យថា “ជាតម្រូវការរបស់ប្រជា​ជន​ក្នុង​ដំណាក់កាលថ្មី” ព្រោះដំណាក់កាលចាស់ គឺជាដំណាក់កាលដែលប្រជាជនត្រូវការចន្លុះ ត្រូវការ​ប្រេង​​កាតតែប៉ុណ្ណោះ ក៏ប៉ុន្តែ ដំណាក់កាលថ្មី ប្រជាពលរដ្ឋត្រូវការអគ្គិសនី ដើម្បីប្រើប្រាស់។

រឿងជួបអ្នកការទូត

មានរឿងមួយដែលខ្ញុំគួរតែនិយាយ ហើយការនិយាយនេះ មិនមែនបន្តុះបង្អាប់ និងចង់ដាក់ផ្លែផ្កាអោយអ្នក​ណាទេ។ ប្រហែលជា ៥ ឆ្នាំមុន មានអគ្គរដ្ឋទូតមួយបានទៅជួបជាមួយ ជារឿងគួរអោយភ្ញាក់ផ្អើល​ខ្លាំង​ណាស់ ដែលអ្នកការទូតរបៀបនេះ មកនិយាយជាមួយយើងទៅរួច គាត់ថា​ វារីអគ្គិសនីសេសានធ្វើអោយ​ប៉ះពាល់​ដល់ត្រីចំនួន ៧០%។ បានខ្ញុំសួរថា គួរអោយភ្ញាក់ផ្អើលខ្លាំងណាស់ ​ព្រោះត្រីនៅប្រទេស​របស់​យើង​ខ្ញុំចេះ​ឡើង​ដើមឈើ ហើយចេះឡើងភ្នំ បើសិនជាត្រីរបស់យើងខ្ញុំឆ្លាតដល់ប៉ុណ្ណឹង គឺថា ប្រទេសរបស់​យើង​ខ្ញុំមិន​ពិបាកទេរឿងត្រីនោះ។ ព្រោះត្រីរបស់យើងខ្ញុំវានៅនឹងទន្លេសាប វានៅនឹងទន្លេមេគង្គ វាមិន​មក​នៅទន្លេសេ​សាន​នេះទេ។ គាត់ថា អាហ្នឹងប៉ះពាល់ត្រីដល់ទៅ ៧០% បានខ្ញុំប្រាប់គាត់ថា បើឯកឧត្តម​មិន​ស្គាល់កម្ពុជាផង​ ហើយមកនិយាយជាមួយខ្ញុំអញ្ចឹង មិនខ្មាសគេទេអី? ខ្ញុំថាអោយត្រង់អញ្ចឹងតែម្តង។ ចេះនិយាយទៅរួច។

អញ្ចឹង ត្រីរបស់យើងវាចេះឡើងដើមឈើ វាចេះឡើងភ្នំ ព្រោះស្ថានភាពនៅទីនេះវានៅលើភ្នំ។ អញ្ចឹង​ រឿងអី​ត្រី​វា​នៅ​ហ្នឹង។ ទាល់តែពេលទំនប់នេះធ្វើរួច នាំគ្នាលែងកូនត្រីអោយច្រើនទៅ ច្បាស់ជាសំបូរត្រីហើយ ហើយត្រីវាអត់​ទៅ​ណាទេ វានៅហ្នឹង វាមានទៅណា អាតួប៊ីនហ្នឹងវាមានកិនត្រីងាប់ឯណា? សូម្បីតែដន​សាហុង​របស់​ខាង​ឡាវ ក៏វាមិនកិនត្រីងាប់ដែរ? វានៅឃ្លាតពីព្រំដែនកម្ពុជា និងឡាវ ត្រឹមតែពីរគីឡូម៉ែត្រ​ជាងតែប៉ុណ្ណោះ។ ខ្ញុំទៅ​មើល​ដោយផ្ទាល់ហើយ។ ក្នុងដៃទន្លេប្រាំមួយហ្នឹង គឺទៅចន្លោះទន្លេតែមួយ ដូច្នេះ វាមិនប៉ះពាល់អីទេ ប៉ុន្តែ យើងរកវិធីយ៉ាងម៉េចបើសិនជាមានប៉ះពាល់ ក៏អោយប៉ះពាល់កម្រិតតិច។

ដើម្បីជម្រុញអោយយើងបញ្ឈប់គម្រោងការទាក់ទងជាមួយនឹងសេសាន មកបន្លាចយើង។ ក្នុងឋានៈយើង​ជា​អ្នកស្គាល់ភូមិសាស្ត្រស្រុកខ្មែរថា តាមអ្នកសិក្សាស្រាវជ្រាវបានបង្ហាញថា សេសាន ២ ប៉ះពាល់ត្រីដល់ ៧០% តើជឿបានទេ? អញ្ចឹង មានតែត្រីស្រុកខ្មែរវាចេះឡើងដើមឈើ? ហើយអគ្គរដ្ឋទូតហ្នឹង មិនមែន​តំណាងអោយ​ប្រ​ទេស​មួយទេ ប្រទេសច្រើនទៅទៀត? ចេះមកនិយាយទៅរួច។ ខ្ញុំខំស្តាប់គាត់ ក្រែង​លោ​គេបកប្រែ​មក​ជា​ខ្មែរ​ វា​ខុស។ ប៉ុន្តែ ដល់ខ្ញុំស្តាប់ជាភាសាអង់គ្លេស គឺគាត់និយាយថា ៧០% អញ្ចឹង។

ខ្ញុំថា សំណាងហើយ​ត្រីខ្ញុំ​ចេះ​ឡើង​ដើមឈើ។ ហើយបង្កើតឡើងនូវអង្គការទន្លេបី ហើយអាអង្គការទន្លេបី អាហ្នឹងដូចជាសាខាមាតាធម្មជាតិ។ មានអ្នកណាបង្កើតមាតាធម្មជាតិទេ? បើបង្កើតនៅស្រុកឯង​បង្កើត​ទៅ? ឥឡូវ ក្រសួងមហាផ្ទៃរំលាយចោលហើយ។ អាហ្នឹងដើររករឿងគ្រប់តែរឿង។ រួចអញ្ចឹងយើងអភិវឌ្ឍ​យ៉ាងម៉េចទៅ? ធ្វើ​នេះ​ក៏មិនបាន ធ្វើនោះក៏មិនបាន ផលិតធ្យូងថ្ម វាថាអាហ្នឹងផ្សែង ផលិតប្រេងកាត វាថាផ្សែង ផលិតវារីអគ្គិសនី វាថា​អា​ហ្នឹងប៉ះពាល់បរិស្ថាន ផលិតបរមាណូ វាថាអាហ្នឹង​ក្រែងផ្ទុះទៅ​ងាប់​ទាំងអស់គ្នា។ យកប្រេងកាតមកក៏នៅ​តែ​ប៉ះ​ពាល់ដល់បរិស្ថានដែរ ព្រោះអាហ្នឹងវាចេញបរិស្ថានទាំងអស់ …។

អរគុណរដ្ឋាភិបាលចិន ដែលជម្រុញក្រុមហ៊ុនចិនអោយមកវិនិយោគនៅកម្ពុជា

ខ្ញុំសុំយកឱកាសនេះ ថ្លែងនូវការកោតសរសើរ (និង)អរគុណជាមួយនឹងការគាំទ្រ​ទាំងឡាយរបស់រដ្ឋាភិ​បាលសាធារ​ណ​រដ្ឋប្រជាមានិតចិន ដែលជម្រុញក្រុមហ៊ុនចិន អោយមកវិនិយោគនៅព្រះរាជាណាចក្រ​កម្ពុជា។ វារីអគ្គិសនីស្ទើរ​តែ​ទាំង​អស់ គឺជាគម្រោងវិនិយោគ ដែលផ្តល់ទុនដោយសារធារណរដ្ឋប្រជាមានិត​ចិន។ ប្រទេសខ្លះបានត្រឹមមកចែចង់ ក៏ប៉ុន្តែមិនដឹងថាឆ្នាំណាទេ? ខ្ញុំសុំស្នើអោយអ្នកដែលបានមកសិក្សា បើគេមិនអនុវត្តទៅតាមគម្រោងទេ គ្មាន​ជម្រើស​ណាក្រៅតែពីយើងដកហូត ដើម្បីប្រគល់អោយក្រុមហ៊ុនថ្មី សម្រាប់ការវិនិយោគនោះទេ។ នៅតាមដង​ស្ទឹង​ពោធិ៍​សាត់ក៏មាន តែវាមិនដឹងថា ដល់ពេលហើយឬនៅ? ព្រោះតម្រូវការរបស់យើង បើសិនជាដល់​ដំណាក់​កាល​ណាមួយដែលផ្គត់ផ្គង់ភ្លើងមិនគ្រប់ វាមាន​ផលប៉ះ​ពាល់ទៅលើការអភិវឌ្ឍ។

អគ្គិសនី នៅតែជាបញ្ហាអាទិភាព ក្នុងចំណោមអាទិភាព ៤

អគ្គិសនី នៅតែជាអាទិភាពក្នុងចំណោមអាទិភាព ៤ ដែលមុននេះយើងហៅ ទឹក ផ្លូវ ភ្លើង មនុស្ស ឥឡូវ​យើង​ហៅ មនុស្ស ទឹក ផ្លូវ ភ្លើង ដែលត្រូវការវិនិយោគបន្ថែមទៀត។ ប្រទេសចិន​អនុវត្តនូវគម្រោងការ​មានការ​គាំ​ទ្រ​យ៉ាងជាក់លាក់ ពីសំណាក់រដ្ឋាភិបាលសាធារណរដ្ឋប្រជាមានិតចិន តាមរយៈការគាំទ្រនោះ​ហើយ ដែលធនា​គារចិន​បានផ្តល់ទុន សម្រាប់ការវិនិយោគនៅទីនេះ។ ប៉ុន្តែ មានក្រុមហ៊ុនខ្លះក៏មានទុន​វិនិយោគផ្ទាល់របស់​ខ្លួន ឯក្រុមហ៊ុនខ្លះទៀតក៏មានតម្រូវការ នៃការផ្តល់ឥណទានដោយធនាគារចិន​ណា​មួយនោះ។

កោតសរសើរ និងអរគុណ ដល់គ្រប់ភាគីពាក់ព័ន្ធ ព្រមទាំងប្រជាពលរដ្ឋក្នុងខេត្តស្ទឹងត្រែង

ខ្ញុំក៏សូមកោតសរសើរចំពោះ លោកឧកញ៉ា គិត ម៉េង នៃក្រុមហ៊ុនរ៉ូយ៉ាល់គ្រុប ដែលបានប្រឹងប្រែងក្នុងការ ធ្វើជាដៃគូជាមួយនឹងក្រុមហ៊ុនចិន ហើយនិងក្រុមហ៊ុនរបស់វៀតណាម តាមរយៈនៃការសម្របសម្រួល ដែលភាគី​ក្នុងស្រុកជាអ្នកទទួលខុសត្រូវទៅលើការសម្របសម្រួលនេះ ជាមួយនឹងក្រសួងរ៉ែ និងថាមពល ក៏​ដូច​ជា​ជាមួយ​នឹងគណៈអភិបាលខេត្ត។ សុំកោតសរសើរ និងអរគុណដល់កងកម្លាំង​ប្រដាប់អាវុធគ្រប់​ប្រភេទ អាជ្ញាធរគ្រប់លំដាប់ថ្នាក់ និងប្រជាពលរដ្ឋដែលបានគាំទ្រ ចំពោះដំណើរការអភិវឌ្ឍប្រទេសរបស់​យើងតាមរយៈ​ការកសាងនូវវារីអគ្គិសនីសេសាន ២ នេះ។ ខ្ញុំមកដល់ទីនេះ មិនភ្លេចជាមួយនឹងការអរគុណ ចំពោះ​ប្រជា​ពលរដ្ឋនៅខេត្តស្ទឹងត្រែងរបស់យើង ដែលរយៈពេលកន្លងទៅតែងតែផ្ដល់នូវការគាំទ្រទាំង​ឡាយ​សម្រាប់​គណបក្សប្រជាជនកម្ពុជា ហើយនិងគាំទ្រចំពោះដំណើរការអភិវឌ្ឍប្រទេសរបស់​រាជរដ្ឋា​ភិ​បាល។

ខេត្តស្ទឹងត្រែងទទួលបានសមិទ្ធផលជាច្រើន ក្នុងដំណើរការអភិវឌ្ឍន៍ជាតិរបស់រាជរដ្ឋាភិបាលកម្ពុជា

ទឹកដីនៃខេត្តស្ទឹងត្រែង គឺជាទឹកដីដែលទទួលបានការអភិវឌ្ឍយ៉ាងច្រើន គ្រាន់តែស្ពានស្ទឹងត្រែងទទួល​បានស្ពាន​ ២ ​ម្នាក់ឯងពីសំណាក់រាជរដ្ឋាភិបាល តាមរយៈនៃហិរញ្ញប្បទាន​ពីសាធារណរដ្ឋប្រជា​មានិត​ចិន​ ស្ពានមិត្តភាព​កម្ពុជា-ចិនសេកុង។ ស្ពានមិត្តភាពកម្ពុជា-ចិនស្ទឹងត្រែងនៅទន្លេមេគង្គ ដែលអនុញ្ញាត​អោយ​យើងតភ្ជាប់ រវាង​ស្ទឹង​ត្រែងទៅខេត្តព្រះវិហារ តាមរយៈផ្លូវជាតិលេខ ៩ គឺបានសេចក្ដីថា ស្ទឹងត្រែងទទួល​បាន​ហេដ្ឋារចនា​សម្ព័ន្ធ​យ៉ាងច្រើន។ ផ្លូវជាតិលេខ ៧។ ផ្លូវជាតិលេខ ៧៨។ ផ្លូវជាតិលេខ ៧ តភ្ជាប់​ទៅ​ព្រំដែនឡាវ។​ ស្ពានសេកុង។  ស្ពានមិត្តភាពកម្ពុជា-ចិនស្ទឹងត្រែង និងផ្លូវជាតិលេខ ៩ តភ្ជាប់ទៅខេត្ត​ព្រះ​វិហារ ធ្វើអោយប្រជាពលរដ្ឋ​ដែល​រស់​នៅ​ខេត្ត​ស្ទឹងត្រែងនេះ ទទួលបានកាន់តែច្រើនទៅៗនូវសមិទ្ធផល ហើយក៏ទទួលប្រជាពលរដ្ឋអោយមក​ស្នាក់នៅទីនេះ​កាន់​តែច្រើនផងដែរ។ ខែមុន ខ្ញុំបានមកកាន់ខេត្ត​ស្ទឹង​ត្រែងនេះ ដើម្បីបង្កើតនូវកងពលលេខ ១២៨ សម្រាប់​ឈរ​ជើងការពារអធិបតេយ្យភាព និងសន្តិសុខជាតិ សម្រាប់ខេត្តស្ទឹងត្រែង និងខេត្តនៅ​តំបន់ឦសានរបស់យើងនេះ សម្រាប់វិស័យសន្ដិសុខជាតិរបស់យើង។

ឈរបេក្ខភាពនាយករដ្ឋមន្រ្ដីក្នុងអាណត្តិទី ៦ បន្តរួមដំណើរអភិវឌ្ឍន៍ជាតិជាមួយ​ប្រជាពលរដ្ឋកម្ពុជា

អរគុណចំពោះការគាំទ្រទាំងឡាយ ហើយសង្ឃឹមថា ប្រជាពលរដ្ឋនឹងបន្តបោះឆ្នោតជូនគណបក្សប្រជាជន​តទៅទៀត ដើម្បីការអភិវឌ្ឍប្រទេស។ ការបោះឆ្នោតកន្លងទៅ ខេត្តស្ទឹងត្រែងបានបោះជូន​គណ​បក្ស​ប្រជា​ជន​យ៉ាងច្រើនលើសលប់ ​ក្នុងអត្រាមួយដ៏​ខ្ពស់។ ឆ្នាំ ២០១៨ គឺនៅថ្ងៃទី ២៩ ខែ កក្កដា ឆ្នាំ ២០១៨ នឹង​មានកា​រ​​បោះឆ្នោត​ថ្នាក់ជាតិ​សាជាថ្មីម្ដងទៀត ហើយពេលនោះ ខ្ញុំនឹងបន្តឈរឈ្មោះជាបេក្ខជន​នាយករដ្ឋ​មន្រ្ដី ដែលខ្ញុំ​ប្រកាសថានឹងឈរពីរអាណត្តិតទៅទៀត។ ពីរអាណត្តិយ៉ាងតិច? អញ្ចឹងសង្ឃឹមថា ប្រជាពល​រដ្ឋរបស់យើងនឹង​បន្ដបោះឆ្នោតអោយគណបក្សប្រជាជនកម្ពុជាតទៅទៀត ដើម្បីខ្លួនខ្ញុំមានលទ្ធភាព មាន​ឱកាស ដើម្បីបន្ត​រួម​ដំ​​ណើរ​ជាមួយនឹងប្រជាពលរដ្ឋរបស់យើង តាំងពីការស៊ីអត់ស៊ីឃ្លានជាមួយគ្នានាឆ្នាំ ១៩៧៩ បន្តដំណើររួម​គ្នាត​ទៅ​​ទៀត។ ខ្ញុំជឿជាក់លើខ្លួនឯងថា យ៉ាងតិចណាស់ខ្ញុំរស់នៅបាន ៣០ ឆ្នាំទៀត​ដែរ។ អញ្ចឹង ការបន្តធ្វើ​នាយក​រដ្ឋ​មន្ត្រី ១០ ឆ្នាំទៀត មិនមែនជាបញ្ហាលំបាកសម្រាប់ខ្ញុំទេ។ ខ្ញុំសុំអរគុណ ហើយសង្ឃឹម​ជឿជាក់ទៅលើ​ការគាំទ្រ​របស់​ប្រជាពលរដ្ឋ ព្រោះគ្មានការធ្វើដំណើរណាមួយ ដោយគ្មាន​ការ​គាំទ្ររបស់​​ប្រជាពលរដ្ឋទេ (ការ)ដែល​ខ្ញុំ​រស់​នៅទី​នេះ។

អ្នកវិភាគមិនមានសិទ្ធិបកស្រាយរដ្ឋធម្មនុញ្ញទេ ព្រោះវាជាសិទ្ធិផ្ដាច់មុខរបស់ក្រុមប្រឹក្សាធម្មនុញ្ញ

ខ្ញុំជឿជាក់ថា ម្សិលមិញ គឺជាថ្ងៃប្រកាសអោយប្រើរដ្ឋធម្មនុញ្ញ នៃ​ព្រះរាជាណាចក្រកម្ពុជា ហើយសង្ឃឹមថា​អ្នកវិភាគ​ទាំង​ឡាយគួរតែសិក្សា អំពីរដ្ឋធម្មនុញ្ញអោយបានច្បាស់បន្តិច។ មានអ្នកខ្លះ សូម្បីតែខ្ញុំប្រតិកម្ម​ជាមួយ​ស្ថានទូត​បរទេសមួយ ដែលមើលងាយកម្ពុជា ក៏គេថា យើងមិនទាន់​ប្រជុំសភាទៅនិយាយ។ ឱអ្នក​វិភាគ​អើយ! ហើយ​បណ្ឌិត​ទៀត។ ខ្លួនឯងធ្វើជាអ្នកវិភាគ ធ្វើជាអ្នកច្បាប់ ប៉ុន្តែ ហ៊ានបកស្រាយរដ្ឋធម្មនុញ្ញ ដែលជាសិទ្ធិផ្ដាច់​មុខរបស់​ក្រុម​ប្រឹក្សាធម្មនុញ្ញទៅវិញ។ អញ្ចឹងខ្លួនឯងហ្នឹងជា​អ្វី​ទៅ? ​កំពុងតែធ្វើខុស ហើយខ្លួនឯងចាត់ទុកថាជាអ្នកត្រឹមត្រូវ។ ការបកស្រាយរដ្ឋធម្មនុញ្ញ គឺជាសិទ្ធិផ្ដាច់មុខ​របស់ក្រុមប្រឹក្សា​ធម្ម​នុញ្ញ​ មិនមែនសិទ្ធិរបស់អ្នកវិភាគទេ ក៏ប៉ុន្តែ អ្នកវិភាគបែរជាគិតថា នៅពេលដែលខ្ញុំឆ្លើយតប​ជាមួយនឹង​ស្ថានទូត​បរទេស ដែលជ្រៀតជ្រែកកិច្ចការផ្ទៃក្នុងរបស់​កម្ពុជា ដូចជាសំណួរសួរថា តើអ្នកឯងមានព័ត៌មាន​អំពីការវាយ​ភេរវកម្ម ហើយមិនបានចែករំលែកមកខ្ញុំ ក្នុង​ឋានៈ​ជាដៃគូសហប្រតិបត្តិការប្រឆាំងភេរវកម្ម ឬ​អ្នកឯងត្រៀមវាយ​ប្រហារមកលើប្រទេសរបស់ខ្ញុំ បានអ្នកឯងប្រកាស​អោយ​ប្រជាជនអ្នកឯងប្រុងប្រយ័ត្ន​ក្នុងពេលភ្ជុំកន្លងទៅ? និងសំណួរ​មួយចំនួនទៀត។

បែរជាអ្នកនេះលើកថា​ ងើបពីដេកឡើងមកនិយាយ។ សិទ្ធិនេះជាសិទ្ធិរបស់នាយករដ្ឋមន្រ្ដី សិទ្ធិរបស់រដ្ឋ​មន្រ្ដី​ការ​បរទេសក៏ធ្វើបានដែរ សិទ្ធិអ្នកនាំពាក្យក៏ធ្វើបានដែរ អត់ចាំបាច់ប្រជុំសភា … ប្រជុំសភាដែលត្រូវ​អនុ​ម័ត គឺ​ត្រូវសម្រេចចិត្តធ្វើសង្រ្គាម ឬអត់? អាហ្នឹងដែលត្រូវទាក់ទងនឹង​សមត្ថកិច្ចរបស់សភា ដែលត្រូវដាក់​ប្រទេស​ក្នុង​គ្រា​មាន​អាសន្ន … ហើយដែលត្រូវព្រះមហាក្សត្រជាអ្នកឡាយហត្ថលេខាបន្ទាប់ពីសភា​អនុម័ត​។ ខ្ញុំមិន​​ចង់​បក​ស្រាយរដ្ឋធម្មនុញ្ញ តែខ្ញុំចង់ចង្អុលបង្ហាញអ្នកវិភាគ ដែលតាំងខ្លួនមានងារជាបណ្ឌិត គួរតែ​យល់ ខ្លួនមិនដែល​បាន​​ធ្វើជានាយករដ្ឋមន្រ្ដី កុំថាធ្វើនាយករដ្ឋមន្រ្ដី ធ្វើតែលេខានាយករដ្ឋមន្រ្ដីមិនដែល​ធ្វើ​ផង ហើយតាំងខ្លួន​ជាអ្នក​មក​ប្រដៅនាយករដ្ឋមន្រ្ដី ថាគួរតែត្រូវប្រជុំសភាសិន ហើយបានមកនិយាយ។ រវល់តែប្រជុំ​សភាធ្វើម៉េចទៅ?

ក្នុងករណីគេឈ្លានពាន​ កុំថាឡើយដល់ទៅបើគេឈ្លានពាន អត់មានត្រូវការប្រជុំសភា ផ្អាក​ការប្រជុំសភា​ទាំង​អស់។ វាយគ្នាសិន គ្មានត្រូវការទៅប្រជុំសភាទេ។ ស្គាល់មុខងារសភាអោយច្បាស់ ហើយក៏ត្រូវ​ស្គាល់​មុខ​ងារ​របស់​រាជរដ្ឋាភិបាលអោយច្បាស់ដែរ។ នាយករដ្ឋមន្រ្ដីទទួលខុសត្រូវ ចំពោះការអនុវត្តទាំង​នយោ​បាយក្នុងប្រទេស និងក្រៅប្រទេស។ អ្វីខ្លះដែលនាយករដ្ឋមន្រ្ដីត្រូវសុំពីសភា គឺសុំសច្ចាប័ន។ ចុះហត្ថ​លេខា​មុន សុំសច្ចាប័ន​ក្រោយ ទើបកិច្ចព្រមព្រៀងចូលជាធរមាន។ សមត្ថភាពប៉ុនលោក​មិនបានស្មើកូនរបស់ខ្ញុំ​ទេ។ បណ្ឌិតរបស់អស់​លោក​មិនទាន់បានស្មើរបស់កូនរបស់ខ្ញុំទេ។  អស់​លោកពូកែហើយ តែលោកអត់​មានបណ្ឌិតខាងយោធាទេ។ ខុសគ្នាត្រង់កន្លែងហ្នឹង។ បណ្ឌិតខ្វះអីគគោក។ ស្មើៗគ្នា ប៉ុន្តែ លោកខ្វះមួយ​ដែលមិនអាចរកឃើញ គឺលោក​គ្មាន​បណ្ឌិតយោធា​ដូច​កូន​ប្រុស​របស់ខ្ញុំទេ …។​

ម្សិលមិញទិវាប្រកាសអោយ​ប្រើរដ្ឋធម្មនុញ្ញ។  ខ្លួនឯងចេះមកបកស្រាយរដ្ឋធម្មនុញ្ញ ក្នុងពេលដែល​ការបក​ស្រាយ​រដ្ឋធម្មនុញ្ញ គឺជាសមត្ថកិច្ច​ផ្ដាច់មុខ​របស់ក្រុមប្រឹក្សាធម្មនុញ្ញ។ អញ្ចឹង ខ្លួនឯងកំពុងធ្វើខុស មក​តាំង​ខ្លួន​ប្រ​ដៅគេ​។ ប្រដៅដល់​នាយករដ្ឋមន្ត្រី​ទៅ​ទៀត។ ប៉ុន្តែ ខ្ញុំបានស្តាប់គាត់និយាយតាមច្រកមួយទេ។ ម្សិលមិញ​ មិនដឹង​ថាមាន​ផ្សាយ​តាម​វិទ្យុ ​ឬអត់ អំពីបញ្ហាទាក់ទងនឹងរឿងហ្នឹង។ វាមិនដែលអ្នកណាគ្រាន់​តែទៅប្រតិកម្ម​ជាមួយ​បរ​ទេស​ជ្រៀតជ្រែកចូលកិច្ចការខ្មែរ អោយទៅសុំសភាទេ …​ ធ្វើតែបក្សខ្លួនឯងដែល​ទើបបង្កើត​ថ្មីថ្មោង​អោយ​តែ​ឈ្នះ​ទៅ។ ​ខ្លួនកាន់បក្សនយោបាយ ហើយខ្លួនដើរធ្វើវិភាគ ពេលណា​ក៏វិភាគ​មិន​ដែលត្រូវដែរ វិភាគអវិជ្ជមាន​រហូត។ ខ្ញុំគ្រាន់តែឆ្លៀតថ្លែងតែបន្តិចទេ ព្រោះម្សិលមិញ គឺខួបនៃការប្រកាស​អោយប្រើរដ្ឋធម្មនុញ្ញ ២៤ កញ្ញា ១៩៩៣ (ដល់) ២៤ កញ្ញា ២០១៨ ដូចនេះគិតទៅប៉ុន្មានឆ្នាំហើយ? ២៤ ឆ្នាំហើយ។ ខ្ញុំធ្វើ​នាយករដ្ឋមន្ត្រីតាំង​ពី(ពេល)ហ្នឹ​ង … ពិបាកណាស់​​ប្រទេសរបស់យើងអ្នកកាច់ចង្កូត កាច់​ខុសតែបន្តិចរលាយប្រទេសសាជាថ្មី ដូច​នេះ​ប្រយ័ត្ន​ប្រយែង​ទៅលើការជ្រើសរើសមេដឹកនាំប្រទេស។

ថ្ងៃនេះ បានពាំនាំមកកាន់លោកយាយ លោកតា ២០០ នាក់ ម្នាក់ៗ ក្រណាត់ស ១ ដុំ ថវិកា ២ ម៉ឺនរៀល។ ជូន​ក្រុម​​កាយរិទ្ធិ និងកាកបាទក្រហម ២០០ នាក់ ម្នាក់ៗ ថវិកា ២ ម៉ឺនរៀល។ ជូនសិស្សា​នុសិស្ស ១.០៧៥ នាក់ ម្នាក់ៗ សៀវភៅ ២ ក្បាល ប៊ិច ១ ដើម ថវិកា ១ ម៉ឺនរៀល។ ជូនលោកគ្រូ អ្នកគ្រូ ៧២ នាក់ ម្នាក់ៗថវិកា ៥ ម៉ឺនរៀល។ ជូនបុគ្គលិក កម្មករ ចំនួន ១.៧៨០ នាក់ ម្នាក់ៗ ថវិកា ២ ម៉ឺនរៀល។ ជូន​វិទ្យា​ល័យ ហ៊ុន សែន ប៊ុន រ៉ានី អូរពងមាន់ក្រុងស្ទឹងត្រែង ថវិកា ២ លានរៀល។ ជូនវិទ្យាល័យសេសាន​សុវត្ថិ​ភាព ថវិកា ២ លានរៀល។ ជូនមណ្ឌលសុខភាពក្បាលរមាស ថវិកា ២ លានរៀល។ ជូនសាលាស្រុក​សេសានថវិកា ២ លានរៀល។ ជូនក្រុមតន្ត្រីសម័យ ថវិកា ២ លានរៀល។

អរគុណណាស់ ថ្ងៃនេះ​ ពេលលោកយាយ លោកតា ត្រឡប់ទៅវិញ​ភ្លៀង​ក៏មិនដឹង ប៉ុន្មានថ្ងៃនេះភ្លៀងជាប់ ហើយភ្លៀងដល់ថ្ងៃ ២៧។ កាលណាភ្ជុំហើយ ទឹកស្រក។ ឥឡូវទឹកស្រក។ តែប្រហែលមួយអាទិត្យខាងមុខ ទឹកអាចឡើងវិញទៀត។ ឆ្នាំនេះល្អត្រង់ថា ទឹកឡើងលើកទី ១ បានភាគខាងលើ តែខាងក្រោមឡើងមិន​បានដល់ ៩ ម៉ែត្រទេ សំរាប់ក្រុងភ្នំពេញ។ យើងចង់អោយឡើងពីខាងលើ រួចហើយទៅខាងក្រោម ហើយ​បន្ទាប់​ទៅ​ទឹក​ធ្លាក់​មក​ល្ម​មដល់ដំណាក់កាលបុណ្យអុំទូកតែម្តង។ មិនដឹងខេត្តស្ទឹងត្រែងឆ្នាំនេះមានទូក​ទៅ​អុំដែរឬអត់? ធម្មតាដូច​ភូមិភាគ​ទី ១ មានទូកទៅអុំនឹងគេតើ។ ជាមួយនឹងការប្រកាសបិទទ្វារទឹក​ទំនប់​វារីអគ្គិសនី​សេ​សាន​ក្រោម ២ ដែលមានអនុភាព ៤០០ មេហ្គាវ៉ាត់ នៅខេត្តស្ទឹងត្រែង ខ្ញុំសូមជូនពរដល់ សម្តេច ឯកឧត្តម លោក​ជំទាវ អស់លោក លោកស្រី និងបងប្អូនជនរួមជាតិទាំងអស់ សូមប្រកបតែ​ពុទ្ធពរ​ទាំង ៥ ប្រការ គឺ អាយុ វណ្ណៈ សុខៈ ពលៈ និងបដិភានៈ កុំបីឃ្លៀងឃ្លាតឡើយ៕