សម្តេចតេជោនាយករដ្ឋមន្រ្តី អញ្ជើញជួបសំណេះសំណាលជាមួយមន្រ្តីរាជការ លោកគ្រូអ្នកគ្រូ និងគរុសិស្ស នៃមជ្ឈមណ្ឌល គរុកោសល្យភូមិភាគខេត្តស្ទឹងត្រែង

158

បន្ទាប់ពីបានចំណាយ​ពេលជួប​សំណេះ​សំណាល​សាកសួរសុខទុក្ខ ជាមួយបង​ប្អូន​​អាជីវករ​ផ្សារសាមគ្គី ខេត្តស្ទឹងត្រែង រួចមក សម្តេចអគ្គ​មហា​សេនាប​តីតេជោ ហ៊ុន សែន នាយករដ្ឋមន្រ្តី នៃព្រះរាជា​ណាច​ក្រកម្ពុជា អញ្ជើញបន្ត​ដំណើរជួប​សំណេះសំ​ណាល​ជាមួយ​ថ្នាក់ដឹកនាំ បុគ្គលិក មន្រ្តីរាជការ លោកគ្រូអ្នកគ្រូ និងគរុសិស្ស នៃមជ្ឈមណ្ឌល គរុ​កោស​ល្យ​ភូមិភាគ​ខេត្ត​ស្ទឹងត្រែង។

សូមបញ្ជាក់ថា កាលពីថ្ងៃទី១៦ ខែកញ្ញា ឆ្នាំ២០១៦ សម្តេចតេជោ នាយករដ្ឋ​មន្រ្តី បានអញ្ជើញចុះ​ពិនិត្យ​សមិទ្ធ​ផលជាតិ​ក្នុង​ខេត្ត​ស្ទឹងត្រែង នៅក្នុង​ពិធី​សំណេះ​សំណាល​គ្នានោះ សម្តេចតេជោ​នា​យករដ្ឋមន្រ្តី បានផ្តល់អគារ​​សិក្សាជូនដល់សាលាប​ឋមសិ​ក្សាអនុវត្ត នូវអគារសិក្សាថ្មី១ខ្នង ២ជាន់១២បន្ទប់ អគារ​ទីចាត់ការ១ខ្នង ៣បន្ទប់។​ ដោយឡែកសម្រាប់មជ្ឈ​មណ្ឌលគរុកោសល្យ សម្តេចតេជោ នាយករដ្ឋមន្រ្តី ជួយកសាង​អគារ​សិក្សាថ្មី ១ខ្នង២ជាន់ ១២​បន្ទប់ ជួសជុលអគារចាស់ៗឡើងវិញ ពិសេសបានផ្តល់ជូនគរុសិស្ស​បាន​ទៅបំពេញ​​ទស្សនកិច្ចនៅខេត្តសៀមរាប។ ជាមួយគ្នានេះក្នុងដំណើរនៃ​ការអញ្ជើញ​ចុះពិនិត្យ​សមិទ្ធផលជាតិ និងជួបប្រាស្រ័យ​​ទាក់​ទង​ដ៏ជិតស្និត​ជាមួយ​លោកគ្រូ អ្នកគ្រូ និងសិស្សានុសិស្ស នៅតាមទីកន្លែងដែល​សម្តេចជួបប្រាស្រ័យ​ការងារ សម្តេច​តេជោ នាយករដ្ឋមន្រ្តីបាន​ឧបត្ថម្ភ នូវថវិកា​មួយចំនួន​ចែកជូន​ដល់​លោកគ្រូ​អ្នកគ្រូ និងសិស្សានុសិស្ស​ទាំងអស់ ដោយក្តីស្រឡាញ់រាប់​អានដ៏ជ្រាល​ជ្រៅបំផុត ពិសេសកា​រថតរូប​សែលហ្វីបង្ហោះ​ក្នុងភាព​ស្និតស្នាល​រ៉ាក់ទាក់។ នៅក្នុង​ពិធីសំណេះ​សំណាល​គ្នានោះ​ដែរ សម្តេច​តេជោ​ នាយករដ្ឋមន្រ្តី​បានប្រកាសនៅ​ចំពោះមុខ ថ្នាក់ដឹកនាំ មន្រ្តីរាជការ លោកគ្រូអ្នកគ្រូ និងគរុសិស្ស នៃមជ្ឈ​មណ្ឌល​គរុកោសល្យ​ភូមិភាគ​ខេត្តស្ទឹងត្រែង ពីការប្រកាសផ្តល់​និងពង្រីកអគារ បន្ថែមក្នុងនោះពង្រីក​ពីអគារ១ខ្នង២ជាន់២០បន្ទប់ ទៅកាន់អគារ១ខ្នង៣ជាន់៣០បន្ទប់ អគារសិក្សាថ្មី១ខ្នង២ជាន់ ២០បន្ទប់ ពិសេសបានជួយសាងសង់ទីលានបាល់ទាត់ បាល់ទះ និងបាល់បោះ ដើម្បីប្រែក្លាយមជ្ឈមណ្ឌលនេះ ឲ្យ ក្លាយទៅជាទីកន្លែងបណ្តះបណ្តាលវិស័យកីឡា របស់ខេត្តស្ទឹងត្រែង ឲ្យមានភាពខ្លាំងក្លា និងមានការប្រកួតប្រជែងជា​មួយ និងបណ្តារាជធានី ខេត្តទូទាំងព្រះ​រាជាណា​ចក្រកម្ពុជា។

សូមបញ្ជាក់ដែរថា ថ្លែង​សុន្ទរ​កថាគន្លឹៈ​ ក្នុង​ពិធី​បិទ​​សន្និបាត​បូក​សរុប​លទ្ធ​ផល​ការងារ​​អប់រំ​យុវជន ​និង​កីឡា ឆ្នាំសិក្សា​២០១៤-២០១៥ និងទិសដៅ​​ការ​ងារ​ឆ្នាំ២០១៥-២០១៦ សម្តេច​អគ្គមហា​សេនាបតីតេជោ ហ៊ុន សែន បានផ្តល់​នូវអនុសាសន៍​​មួយចំនួន​​ជូន​ដល់ថ្នា​ក់ដឹកនាំ និងមន្រ្តី​គ្រប់លំ​ដាប់ថ្នាក់ នៃក្រសួងអប់រំ យុវជន និង​កីឡា សម្រាប់ជាមូលដ្ឋាន​​អនុវត្ត​​ក្នុងនោះរួមមាន

ទី១- ត្រូវបន្ត​អនុវត្ត​​ឲ្យ​បានស៊ីជម្រៅ​គ្រប់​ជ្រុងជ្រោយពិតប្រាកដ នៃ​គោល​នយោបាយ​ដែល​ធានាលទ្ធភាពទទួលបានសេវាអប់រំ ប្រកប​ដោយ​សមធម៌

ទី២​- អនុវត្តឲ្យសកម្ម​​ខ្លាំង​​ក្លាលើ​​គោល​នយោបាយ​​លើកកម្ពស់គុ​ណភាព និងប្រសិទ្ធភាព​​សេវាអប់រំនៅ​​កម្រិត​ឧត្តមសិក្សា ដោយ​ត្រូវយក​ចិត្តទុក​ដាក់​លើ​ការ​​បណ្តុះ​បណ្តាល និងអភិវឌ្ឍ​សមត្ថភាព​គ្រូបង្រៀន ការសិក្សាមុខ​​ជំនាញ​វិស្វកម្ម ឧស្សាហកម្ម កសិកម្ម វិទ្យា​សាស្រ្តនិង​បច្ចេកវិទ្យា ជាពិសេស​ត្រូវជំរុញ​កិច្ចការស្រាវជ្រាវរ​បស់និស្សិត ឲ្យ​មាន​​លក្ខណៈ​​វិទ្យាសាស្រ្ត​កាន់​តែ​ស៊ី​ជម្រៅ ស្របតាមបរិការណ៍​នៃការ អភិវឌ្ឍសេដ្ឋកិច្ច​និងសង្គមបែបថ្មី។

ទី៣- អនុវត្តឲ្យ​សកម្ម​លើ​គោលនយោ​បាយ​អភិ​វឌ្ឍ​ស្ថាប័ននិងអភិវឌ្ឍ សមត្ថភាពរបស់មន្រ្តីអប់រំ​សម្រាប់ធ្វើ​វិមជ្ឈការ ដោយ​ក្នុង​នោះ​ត្រូវ ១​-បង្កើន​​ប្រសិទ្ធភាពនៃការ​ប្រើ​ប្រាស់ហិរញ្ញប្បទាននៅថ្នាក់ជាតិ និងថ្នាក់ក្រោម​ជាតិ សំដៅធានា​ប្រសិទ្ធ​ភាព​នៃ​កម្មវិធី​កែទម្រង់​ស៊ីជម្រៅ​នៃវិស័យ​អប់រំ ២-ពង្រឹងប្រព័ន្ធការងារផែនការ​ស្ថិតិ​អប់រំ ការកសាងផែនការ​សកម្មភាពនៅថ្នាក់​​ក្រោម​ជាតិ​ឲ្យកាន់តែមានភាព​​ច្បាស់លាស់ និងឆ្លើយតបតម្រូវ​ការ​ប្រើប្រាស់ ៣-ពង្រាយ​គ្រូបង្រៀនឲ្យបាន​​ដល់មូល​ដ្ឋាន គឺ​ជាការ​ងារអាទិភាព​​ដែល​ត្រូវ​ធ្វើ​ដើម្បី​ធានា​​សេវា​​អប់រំ ឲ្យកាន់​តែគ្រប់​​ដណ្តប់​​បាន​ដល់​មូលដ្ឋានដាច់​ស្រយាល ពិសេស​តំបន់​ដែលខ្វះគ្រូ​ ៤-បន្ត​អភិវឌ្ឍ​សមត្ថ​ភាព​របស់នាយក​សាលា គ្រឹៈស្ថានបណ្តុះបណ្តាលគ្រូ មន្រ្តី​គ្រប់គ្រង​​នៅ​គ្រប់​លំដាប់ថ្នាក់ និងការងារ​អធិ​ការ​កិច្ច។

ទី៤- អនុវត្ត​ឲ្យសកម្មលើការងារយុវជន

ទី៥- អនុវត្តឲ្យសកម្មលើការងារកីឡា

ទី៦- បង្កើនប្រសិទ្ធភាព​ នៃ​ការប្រើប្រាស់​ហិរញ្ញប្បទាន​សហប្រតិបត្តិការ ដោយក្នុងនោះត្រូវ ១ផ្សារភ្ជាប់នឹងការ​អប់រំ​វប្បធម៌ ទំនៀម​ទម្លាប់ ប្រពៃ​ណី វប្បធម៌សន្តិភាព ការងារគោរពសិទ្ធសេចក្តីថ្លៃថ្នូររបស់មនុស្ស ការគោលរពគោល​ការណ៍​សេរីភាព ប្រជា​ធិប​តេយ្យ និង​យុត្តិធម៌ ២ផ្សារភ្ជាប់ការប្រយុទ្ធប្រឆាំងអំពើហឹង្សា ការទប់ស្កាត់ការរីករាល​ដាល​នៃ​​មេរោគ​អេដស៏​និងជំងឺអេដស៏ ការ​លុបបំបាត់ការប្រើ​ប្រាស់គ្រឿងញៀន ការជួញដូរស្រ្តីនិង​ការលុប​បំបាត់​រាល់​ទម្រង់ នៃ​ការរើសអើង​គ្រប់ប្រភេទ​ក្នុង​សង្គម និង៣បន្តពង្រឹងការអនុវត្តគោលការណ៍​ប្រសិទ្ធ​ភាព​ហិរញ្ញប្បទាន សហ​ប្រតិបត្តិការប្រកបដោយ​គណនេយ្យ​ភាព តម្លាភាព ប្រសិទ្ធភាពខ្ពស់ តាមរយៈការ​ពង្រឹងការអនុវត្ត​អភិ​ក្រម​គ្រប់គ្រង​ទូទាំងកម្មវិធី៕