សម្តេចធិបតី ហ៊ុន ម៉ាណែត៖ ទោះបីពិភពលោកស្ថិតក្នុងសភាពតានតឹងយ៉ាងណាក្តី ក៏កម្ពុជានៅតែមានភាពវិជ្ជមាន រហូតសម្រេចបានសមិទ្ធផលថ្មីៗជាច្រើន

សម្តេចធិបតី ហ៊ុន ម៉ាណែត បានថ្លែងកោតសរសើរនិងវាយតម្លៃខ្ពស់ចំពោះវឌ្ឍនភាពការងាររបស់ក្រសួងការពារជាតិ អគ្គបញ្ជាការ បណ្តាប្រភេទទ័ព និងកងទ័ពជំនាញគ្រប់កងឯកភាព និងកងយុទ្ធពលខេមរភូមិន្ទនាពេលបច្ចុប្បន្ននេះ។

នាឱកាសនោះផងដែរ សម្តេចធិបតី បានគូសបញ្ជាក់ថា ទោះបីស្ថិតនៅក្នងកាលៈទេសៈនៃពិភពលោកដែលកំពុងតានតឹង និងភាពបត់បែនយ៉ាងណាក្តី ក៏សភាពការណ៍ទូទៅក្នុងប្រទេសកម្ពុជានៅតែមានភាពវិជ្ជមាន ដែលបង្កភាពអនុគ្រោះឱ្យយើងអាចសម្រេចបាននូវសមិទ្ធផលថ្មីៗជាច្រើនបន្ថែមទៀត។

ជាមួយគ្នានោះ សម្តេចធិបតី បានថ្លែងបញ្ជាក់ថា ចំពោះការរក្សាសន្តិភាពនិងការអភិវឌ្ឍជាតិមាតុភូមិ គឺយើងនៅតែរក្សាការពារបានយ៉ាងរឹងមាំនូវសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ហើយយើងក៏អាចធានាបាននូវដំណើរការជំរុញកំណើនសេដ្ឋកិច្ច បានធ្វើការពង្រឹងប្រព័ន្ធការពារព្រំដែនគោក ព្រំដែនទឹក និងអាកាស សំដៅការពារឱ្យបូរណភាពទឹកដីនៃមាតុភូមិរបស់យើងទាំងអស់គ្នា។

សម្តេចធិបតី ហ៊ុន ម៉ាណែត ថ្លែងដូចនេះ នៅព្រឹកថ្ងៃទី១៩ មេសា ២០២៤ ក្នុងឱកាសអញ្ជើញសម្ពោធអគារសហសិក្សាអគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នៅសាកលវិទ្យាល័យការពារជាតិ៕