[សុន្ទរកថា]
ថ្ងៃនេះ ខ្ញុំមានសេចក្ដីរីករាយ ដោយបានចូលរួមជាថ្មីជាមួយ សម្ដេច ឯកឧត្តម លោកជំទាវ លោក លោកស្រីប្រតិភូកីឡា ក្មួយៗកីឡាករ កីឡាការិនី ក្នុងពិធីបិទការប្រកួតកីឡាជាតិ លើកទី ៣ និងកីឡាជនពិការជាតិលើកទី ១ នាពេលនេះ។ ការប្រកួតនេះបានប្រព្រឹត្តទៅដោយរលូន និងជោគជ័យក្រោមបរិយាកាសសប្បាយរីករាយ ចំពោះលទ្ធផល ដែលក្មួយៗកីឡាករ កីឡាការិនីទទួលបានផ្អែកតាមសមត្ថភាព និងទេពកោសល្យជាក់ស្តែងរៀងៗខ្លួន។ ខ្ញុំសូមអបអរសាទរដល់ជ័យលាភី ដែលបានខិតខំហ្វឹកហាត់ និងខិតខំប្រឹងប្រែងក្នុងការប្រកួតរហូតដល់ទទួលបានជ័យជំនះជាទីមោទនៈនេះ។ ជាមួយគ្នានេះដែរ ខ្ញុំក៏សូមឆ្លៀតឱកាសនេះ អបអរសាទរនូវការដាក់បញ្ចូលក្បាច់គុនល្បុក្កតោជាបេតិកភណ្ឌអរូបីរបស់មនុស្សជាតិ នៃអង្គការយូណេស្កូ កាលពីថ្ងៃទី២៩ ខែវិច្ឆិកា ឆ្នាំ២០២២។
[ចាប់ផ្តើមសេចក្តីអធិប្បាយ]
៣ ចំណុច សំខាន់ទាក់ទងជាមួយនឹងមោទនភាពជាតិ
ក្នុងឱកាសនេះ អនុញ្ញាតឱ្យខ្ញុំព្រះករុណាខ្ញុំ បានថ្លែងទៅកាន់ព្រះសង្ឃ និងប្រជាពលរដ្ឋនៅទូទាំងប្រទេស បន្ថែមទៅលើសារដែលខ្ញុំបានផ្ញើជូនប្រជាជាតិកម្ពុជា។ ក្នុងនាមរាជរដ្ឋាភិបាល នាឱកាសនេះ សូមលើកឡើង ចំណុច ៣ សំខាន់ ដែលទាក់ទងជាមួយនឹងមោទនភាពជាតិរបស់យើង។
ដំបូង (១) “ផឹកទឹក ត្រូវនឹកដល់ប្រភពទឹក”។ យើងគួរតែមានការអរគុណយ៉ាងជ្រាលជ្រៅទៅដល់ដូនតារបស់យើងគ្រប់ជំនាន់ ដែលបានខិតខំបន្សល់ស្នាដៃទុកឱ្យយើងក្មេងជំនាន់ក្រោយ។ ប្រសិនបើដូនតារបស់យើងមិនមានបន្សល់ទុកអ្វីឱ្យយើងនោះទេ យើងក៏គ្មានលទ្ធភាពឯណា ដើម្បីយកទៅដាក់(បញ្ចូល)ក្នុងបញ្ជីបេតិកភណ្ឌពិភពលោកទាំងរូបី និងអរូបីផងដែរ។ នេះជាចំណុចទី(១) ដែលខ្ញុំព្រះករុណាខ្ញុំ ចង់បញ្ជាក់ជូនទៅកាន់ព្រះសង្ឃ និងបងប្អូនជនរួមជាតិបន្ថែមទៅលើលិខិត ដែលខ្ញុំព្រះករុណាខ្ញុំទើបនឹងចេញក្នុងប្រមាណ ២ ម៉ោងមុននេះ។
ចំណុចទី(២) យើងអរគុណចំពោះកីឡាករ/ការិនីទាំងអស់ ដែលបានខិតខំងើបឈរឡើងប្រមូលដើមទុន ចាប់ផ្ដើមតាំងពីក្រោយរំដោះឆ្នាំ ១៩៧៩។ អ្នកទាំងនោះបានខិតខំងើបឈរឡើងដើម្បីប្រមូលទុន ព្រោះថាអ្វីៗ ត្រូវបានបំផ្លាញក្នុងជំនាន់ ប៉ុល ពត គ្មានវិធីណាល្អជាងក្រៅពីការប្រមូលដើមទុនមកវិញគ្រប់ផ្នែកទាំងអស់ សិល្បៈ កីឡា និងផ្នែកដទទៃទៀត សុទ្ធតែត្រូវការប្រមូលដើមទុនមកវិញ។ មួយចំនួនក៏បានរស់រានមានជីវិតមកដល់ពេលនេះ និងមួយចំនួនទៀតក៏បានទទួលមរណកាលទៅហើយ ដែលខ្ញុំសូមយកឱកាសនេះ ថ្លែងនូវការ គោរពវិញ្ញាណក្ខន្ធ ចំពោះអ្នកដែលបានស្លាប់ទៅ ហើយក៏សូមកោតសរសើរ ចំពោះកីឡាករ/ការិនី ទាំងគ្រូបង្ហាត់ ដែលបានខិតខំព្យាយាមរក្សានូវអត្តសញ្ញាណជាតិមួយនេះ តាមរយៈការរុញជាបណ្ដើរៗ រហូតទៅដល់ យើងយកក្បាច់គុណ(ល្បុក្កតោ)នេះដាក់ចូលជាក្បាច់គុណ នៃកងយោធពលខេមរភូមិន្ទ ដែលជាមោទនភាពដ៏ សំខាន់របស់យើង។
វត្តមានកីឡាល្បុក្កតោនៅអង្គរសង្ក្រាន្តជារៀងរាល់ឆ្នាំកាលពីពេលមុននេះ គឺពិតជាបានបង្ហាញឱ្យយើងជំរុញល្បឿននៃការដាក់(បញ្ជូល)ក្បាច់គុណនេះចូលទៅ(ក្នុងបញ្ជីបេតិកភណ្ឌពិភពលោក) ឱ្យមានការទទួលស្គាល់ពីអង្គការយូណេស្កូ។ ខ្ញុំក៏សូមបញ្ជាក់ជូន ចំពោះបងប្អូនជនរួមជាតិនៅទូទាំងប្រទេសឱ្យបានជ្រាបថា នៅ(ពេល)ចូលឆ្នាំខ្មែរ (នា)ខែមេសា ឆ្នាំ២០២៣ ខាងមុខនេះ យើងនឹងធ្វើអង្គរសង្ក្រាន្តសាជាថ្មីម្ដងទៀត។ ពេលនោះសង្ឃឹមថាកីឡាល្បុក្កតោនឹងក្លាយទៅជានិមិត្តរូបដ៏សំខាន់នៃការជួបជុំនៅអង្គរសង្ក្រាន្តនៅពេលនោះ។
ចំណុចទី(៣) ខ្ញុំក៏សូមយកឱកាសនេះ អរគុណចំពោះក្រសួងវប្បធម៌និងវិចិត្រសិល្បៈ ក៏ដូចជាគណៈកម្មាធិការជាតិអូឡាំពិកកម្ពុជា ដែលបានខិតខំជំរុញកិច្ចការងារនេះរហូតបានសម្រេច។ មុនពេលប្រជុំអាស៊ាន ខ្ញុំទទួលបានរបាយការណ៍រួចជាស្រេចទៅហើយអំពីការអនុម័តដោយអង្គការយូណេស្កូនៅឯទីក្រុងប៉ារីស ក៏ប៉ុន្តែ យើងមិនអាចបំពានទៅនឹងនីតិវិធីបានទេ។ យើងត្រូវរង់ចាំរយៈពេលប្រមាណ ៣ អាទិត្យ។ ទើបតែ ២០ ម៉ោងមុននេះ ដែលគណៈកម្មការបានគោះជួងទទួលយកនូវកីឡាក្បាច់គុណល្បុក្កតោរបស់យើងជាបេតិកភណ្ឌអរូបីរបស់មនុស្សជាតិ។
ចាប់តាំងពីឆ្នាំ ២០០៨ រហូតមកដល់ពេលនេះ (គឺ)ជាងមួយទសវត្សរ៍កន្លះរួចមកហើយ ដែលយើងបាន(ដាក់)បញ្ជូលជាបន្តបន្ទាប់ជា(សម្បត្តិ)បេតិកភណ្ឌ សម្រាប់មនុស្សជាតិ ទាំងរូបីនិងអរូបី។ ខ្ញុំសូមយកឱកាសនេះ ថ្លែងនូវការកើតសរសើរចំពោះក្រសួងវប្បធម៌និងវិចិត្រសិល្បៈ និងតួអង្គពាក់ព័ន្ធទាំងអស់ ដែលបានខិតខំធ្វើកិច្ចការដ៏ល្អសម្រាប់ប្រទេសជាតិរបស់យើង។ សង្ឃឹមថា យើងនឹង(ដាក់)បញ្ជូលតទៅទៀតនូវទ្រព្យសម្បត្តិដូនតារបស់យើង។
[បញ្ចប់សេចក្តីអធិប្បាយ]
ខ្ញុំពិតជាមានមោទនភាព ចំពោះការរៀបចំពិធី និងដំណើរការ នៃការប្រកួតដ៏ល្អនេះ ដែលបានទាក់ទាញអ្នកទស្សនាផ្ទាល់ជាង ៤ ម៉ឺននាក់ និងអ្នកទស្សនាតាមប្រព័ន្ធផ្សព្វផ្សាយសង្គមរាប់លាននាក់ផងដែរ។ ឆ្លៀតក្នុងឱកាសនេះ ខ្ញុំសូមកោតសរសើរដល់ថ្នាក់ដឹកនាំ និងគណៈកម្មាធិការរៀបចំការប្រកួត ជាពិសេស សិល្បករ សិល្បការិនី និងយោធិនបញ្ជាការដ្ឋានអង្គរក្ស ចំពោះកិច្ចខិតខំប្រឹងប្រែងហ្វឹកហាត់ និងការសម្ដែង ប្រកបដោយទេពកោសល្យ ដែលនេះបង្ហាញនូវកិច្ចសហការល្អ ក្នុងស្មារតីសាមគ្គីភាព និងការទទួលខុសត្រូវខ្ពស់។
តាមរបាយការណ៍ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា ការដណ្ដើមបានជ័យលាភីជាបន្តបន្ទាប់ក្នុងការប្រកួតជាអន្តរជាតិ វិស័យកីឡាកម្ពុជាមានការរីកចម្រើនគួរឱ្យកត់សម្គាល់ និងមានវឌ្ឍនភាព ល្អប្រសើរ ទាក់ទិននឹងគុណភាពកីឡាករ កីឡាការិនី។ ក្នុងការប្រកួត សម្រាប់រយៈពេលជាង ១០ ថ្ងៃនេះ កីឡាករ កីឡាការិនីមកពីតាមបណ្ដារាជធានី-ខេត្ត និងក្រសួងស្ថាប័ន បានចូលរួមប្រកួតយ៉ាងសកម្ម ដោយបានប្រកាន់ខ្ជាប់នូវការគោរពបទបញ្ជា នៃការប្រកួត និងក្រមសីលធម៌វិជ្ជាជីវៈកីឡា ពិសេសចៀសវាងបាននូវការមិនប្រើសារធាតុជំនួយកម្លាំង និងសារធាតុញៀនក្នុងអំឡុងពេលប្រកួត។
ទន្ទឹមនឹងនេះ ខ្ញុំសូមរំលឹកដល់ក្មួយៗកីឡាករ កីឡាការិនីថា ការឈ្នះចាញ់ពីការប្រកួតកីឡា គឺជាមេរៀន និងបទពិសោធន៍ សម្រាប់ក្មួយៗ ក្នុងការពង្រឹងសមត្ថភាពរបស់ខ្លួនឱ្យកាន់តែប្រសើរ ដើម្បីលើកកម្ពស់ជំនាញវិជ្ជាជីវៈកីឡាបន្ថែមទៀត។ ផ្ទុយទៅវិញ ការអាក់អន់ចិត្ត ឬការបាក់ទឹកចិត្តដោយសារការចាញ់ក្នុងការប្រកួតអាចធ្វើឱ្យក្មួយៗបាត់បង់នូវការតស៊ូ និងការខិតខំប្រឹងប្រែងបន្ត ដើម្បីយកឈ្នះក្នុងការប្រកួតនៅពេលអនាគត។ ចំពោះអ្នកឈ្នះ ត្រូវបន្តការខិតខំប្រឹងប្រែងបន្ថែមទៀត ដើម្បីរក្សាគុណផលកីឡារបស់ខ្លួន សម្រាប់ឈានដល់ការដណ្តើមបានជ័យជំនះជូនជាតិមាតុភូមិ ក្នុងការប្រកួតកម្រិតអន្តរជាតិ។
ខ្ញុំមានសុទិដ្ឋិនិយម និងសូមអបអរសាទរ ចំពោះក្រុមកីឡាករ កីឡាការិនីក្រសួងស្ថាប័ន និងរាជធានី-ខេត្ត ដែលបានទទួលចំណាត់ថ្នាក់ល្អ និងមេដាយច្រើនជាងគេ។ ខ្ញុំសូមលើកទឹកចិត្តឱ្យបន្តយកចិត្តទុកដាក់ពង្រឹងសមត្ថភាពជំនាញកីឡា និងបំផុសចលនាកីឡា ក្នុងដែនសមត្ថកិច្ចគ្រប់គ្រងរបស់ខ្លួនឱ្យកាន់តែរីកចម្រើនថែមទៀត។ ចំពោះក្រសួងស្ថាប័ន រាជធានី-ខេត្ត ដែលទទួលបានលទ្ធផលមិនល្អ សូមបន្តយកចិត្តទុកដាក់កែលម្អ និងខិតខំប្រឹងប្រែងបន្ថែម ដើម្បីសម្រេចបានលទ្ធផលល្អក្នុងការប្រកួតកីឡាជាតិលើកទី ៤ និងកីឡាជាតិជនពិការលើកទី ២ នៅឆ្នាំ ២០២៤ ខាងមុខ។
[ចាប់ផ្តើមសេចក្តីអធិប្បាយ]
ខ្ញុំក៏សូមបញ្ជាក់ថា ឆ្នាំ ២០២៤ ខាងមុខនេះ ខ្ញុំនឹងចូលរួមប្រកួតក្នុងឋានៈជាកីឡាអុក (ឬ)ចត្រង្គផងដែរ។ សូមចុះឈ្មោះទុកពីឥឡូវ បើទោះបីចាញ់ឬឈ្នះ ក៏បានមកអង្គុយកំដរ សម្រាប់កីឡាជើងចាស់មួយនេះ។
[បញ្ចប់សេចក្តីអធិប្បាយ]
ដូចខ្ញុំបានលើកឡើងជាញឹកញាប់នៅក្នុងព្រិត្តិការណ៍កីឡា វិស័យកីឡាដើរតួនាទីយ៉ាងសំខាន់ ក្នុងការពង្រឹងទំនាក់ទំនង ការបង្កើនសាមគ្គីភាព និងការលើកកម្ពស់មូលធនសង្គម ដែលទាំងនេះ គឺជាកត្តាកំណត់ដ៏សំខាន់ក្នុងការអនុវត្តការងារប្រកបដោយប្រសិទ្ធផលខ្ពស់។ ការរៀបចំ និងការចូលរួមក្នុងការប្រកួតកីឡា បង្កើនការរឹតចំណងមិត្តភាព និងកិច្ចសហប្រតិបត្តិការកាន់តែជិតស្និទ្ធ រវាងកីឡាករ កីឡាការិនី ក៏ដូចជា ក្រសួងស្ថាប័ន និងរាជធានី-ខេត្ត ដែលបានចូលរួមក្នុងការប្រកួតទាំងអស់។
ជាងនេះទៀត កីឡាក៏រួមចំណែកដល់ការកាត់បន្ថយភាពតានតឹងក្នុងអារម្មណ៍ បញ្ចៀសបាននូវការប្រព្រឹត្តិបញ្ហាសង្គមនានា ដូចជាការប្រើប្រាស់ថ្នាំញៀន និងអំពើហិង្សា រក្សាបាននូវកម្លាំងកាយរឹងមាំ និងការលើកកម្ពស់សុខភាពល្អ ដែលជាកត្តាកំណត់ដ៏សំខាន់ សម្រាប់បង្កើនផលិតភាពពលកម្ម និងភាពរឹងមាំ នៃសេដ្ឋកិច្ចជាតិ។ ជារួម កីឡាជួយពង្រឹងសុខភាពផ្លូវកាយរឹងមាំ លើកកម្ពស់សុខភាពផ្លូវចិត្ត បង្កើនផលិតភាពការងារ បង្កើនបញ្ញាឈ្លាសវៃ លើកកម្ពស់គុណភាពជីវិត និងមានសុភមង្គលក្នុងក្រុមគ្រួសារ ព្រមទាំងលើកកម្ពស់សុខដុមនីយកម្មក្នុងសង្គមទាំងមូល។
ដើម្បីជំរុញលើកកម្ពស់វិស័យកីឡាកម្ពុជា និងត្រៀមខ្លួន សម្រាប់ការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ខ្ញុំសូមផ្តល់នូវទស្សនៈ និងចំណុចគន្លឹះមួយចំនួន ដូចខាងក្រោម៖
១. ក្រសួងស្ថាប័ន និងអាជ្ញាធររាជធានី-ខេត្ត ដែលមិនទាន់មានក្រុមកីឡាចូលរួមប្រកួត ត្រូវបង្កើតអង្គភាពកីឡា ឬសមាគមកីឡាប្រចាំក្រសួងស្ថាប័ន អាជ្ញាធររាជធានី-ខេត្តរបស់ខ្លួន ដោយមានយន្តការគ្រប់គ្រងដឹកនាំច្បាស់លាស់ មានតម្លាភាពក្នុងការគ្រប់គ្រង និងបង្កើនសមត្ថភាពកីឡាករ កីឡាការិនីរបស់ខ្លួនជាប្រចាំ សម្រាប់ចូលរួមក្នុងការប្រកួតថ្នាក់ជាតិ និងអន្តរជាតិ។
២. ក្រសួងស្ថាប័ន និងអាជ្ញាធររាជធានី-ខេត្ត ត្រូវយកចិត្តទុកដាក់ក្នុងការបង្កើតក្រុមកីឡា ដែលខ្លួនមានឧត្តមភាព និងត្រូវរៀបចំការប្រកួតក្នុងក្របខ័ណ្ឌផ្ទៃក្នុងតាមពេលវេលាសមស្រប សម្រាប់ពង្រឹងសមត្ថភាពកីឡាករ កីឡាការិនី ដើម្បីចូលរួមក្នុងការប្រកួតកីឡាជាតិលើកទី ៤ និងកីឡាជាតិជនពិការលើកទី ២ ឱ្យបានកាន់តែច្រើន។
៣. គណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ត្រូវជំរុញល្បឿន នៃការត្រៀមខ្លួនឱ្យបានគ្រប់ជ្រុងជ្រោយជាស្រេច ដើម្បីធានាបាននូវជោគជ័យខ្ពស់ ក្នុងការធ្វើជាម្ចាស់ផ្ទះរៀបចំការប្រកួតកីឡាកម្រិតអន្តរជាតិដ៏ធំជាប្រវត្តិសាស្ត្រនេះ។
៤. គ្រប់ក្រសួងស្ថាប័នពាក់ព័ន្ធ និងអាជ្ញាធររាជធានី-ខេត្ត ត្រូវពង្រីកកិច្ចសហការឱ្យបានជិតស្និទ្ធប្រកបដោយស្មារតីទទួលខុសត្រូវខ្ពស់ និងស្របតាមអភិក្រម “ជវភាព នៃប្រព័ន្ធតួអង្គតែមួយ” ដើម្បីដោះស្រាយនូវរាល់បញ្ហាប្រឈមនានាជាបន្ទាន់ សំដៅធានាបានប្រសិទ្ធភាពក្នុងការដឹកនាំ ការគ្រប់គ្រង និងការរៀបចំព្រឹត្តិការណ៍ប្រកួតកីឡាដ៏ធំនៅឆ្នាំ ២០២៣។
៥. ខ្ញុំសូមអំពាវនាវដល់វិស័យឯកជន ក្រុមហ៊ុន សហគ្រាស និងសប្បុរសជនទាំងអស់ សូមចូលរួមដល់មូលនិធិ កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ដើម្បីរួមចំណែកដល់ភាពជោគជ័យ នៃការរៀបចំការប្រកួតកីឡាកម្រិតអន្តរជាតិនេះ។
៦. ខ្ញុំសូមអំពាវនាវដល់ប្រជាជនទាំងអស់ សូមប្រកាន់ខ្ជាប់នូវស្មារតី “ប្រជាជនម្នាក់ជាម្ចាស់ផ្ទះម្នាក់” ពិសេសប្រជាជននៅតាមរាជធានី-ខេត្ត ដែលត្រូវត្រៀមទទួលរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ សូមរៀបចំអនាម័យ ថែរក្សាបរិស្ថានឱ្យបានល្អ និងរៀបចំតុបតែងលម្អ ដើម្បីលើកកម្ពស់សោភ័ណភាពមូលដ្ឋានរបស់ខ្លួន សំដៅលើកមុខមាត់កម្ពុជា និងទាក់ទាញការចាប់អារម្មណ៍របស់ប្រតិភូកីឡា និងភ្ញៀវអន្តរជាតិទាំងអស់ ដែលនឹងអញ្ជើញមកចូលរួមការប្រកួតនៅកម្ពុជានៅឆ្នាំ ២០២៣ ខាងមុខនេះ។
៧. ខ្ញុំសូមលើកទឹកចិត្តឱ្យបន្តរៀបចំកម្មវិធីយុទ្ធនាការអប់រំសង្គម “មានអ្វីលើសពីការប្រកួតកីឡា” (Beyond the Games) របស់សហភាពសហព័ន្ធយុវជនកម្ពុជា ដើម្បីបង្កើនការយល់ដឹង អំពីបច្ច័យជាវិជ្ជមាន នៃការធ្វើជាម្ចាស់ផ្ទះរៀបចំព្រឹត្តិការណ៍កីឡាដ៏ធំជាប្រវត្តិសាស្ត្រនេះ សម្រាប់ព្រះរាជាណាចក្រកម្ពុជា។
មុននឹងបញ្ចប់ ជាថ្មីម្តងទៀត ខ្ញុំសូមកោតសរសើរ និងអបអរសាទរដល់ជ័យលាភីទាំងអស់ និងសូមវាយតម្លៃខ្ពស់ ចំពោះក្រសួងអប់រំ យុវជន និងកីឡា គណៈកម្មាធិការអូឡាំពិកកម្ពុជា និងស្ថាប័នពាក់ព័ន្ធ ដែលបានសហការរៀបចំការប្រកួតកីឡាជាតិលើកទី ៣ និងកីឡាជាតិជនពិការលើកទី ១ នេះ ឱ្យប្រព្រឹត្តទៅដោយរលូន និងទទួលបានជោគជ័យខ្ពស់។
ជាទីបញ្ចប់ ខ្ញុំសូមជូនពរ សម្ដេច ឯកឧត្តម លោកជំទាវ លោក លោកស្រី ប្រតិភូកីឡា និងកីឡាករ កីឡាការិនីទាំងអស់ សូមប្រកបដោយពុទ្ធពរ និងពរទាំង ៥ ប្រការ គឺអាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ។
ខ្ញុំសូមប្រកាសបិទជាផ្លូវការនូវការប្រកួតកីឡាជាតិលើកទី ៣ និងកីឡាជាតិជនពិការលើកទី ១ ចាប់ពីពេលនេះតទៅ៕
