ភ្នំពេញ ថ្ងៃទី០២ ខែធ្នូ ឆ្នាំ២០១៩ — លោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបថ្មីប្រចាំកម្ពុជា បានលើកឡើងថា កម្ពុជាកំពុងមានការអភិវឌ្ឍ និងកំពុងដើរលើផ្លូវត្រូវ ក្នុងការជំរុញការអភិវឌ្ឍប្រកបដោយចីរភាព ពិសេសលើបញ្ហាប្រែប្រួលអាកាសធាតុ ការថែរក្សាគ្រប់គ្រងធនធានធម្មជាតិ និងការអភិវឌ្ឍពាណិជ្ជកម្មប្រកបដោយចីរភាព។
នេះបើយោងតាមការឱ្យដឹងរបស់ឯកឧត្ដម អ៊ាង សុផល្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ Carmen Moreno ឯកអគ្គរដ្ឋទូតសហភាពអឺរ៉ុបថ្មីប្រចាំកម្ពុជា ចូលជួបសម្ដែងការគួរសម នាព្រឹកថ្ងៃចន្ទ ៦កើត ខែមិគសិរ ឆ្នាំកុរ ឯកស័កព.ស.២៥៦៣ ត្រូវនឹងថ្ងៃទី០២ ខែធ្នូ ឆ្នាំ២០១៩ នៅវិមានសន្តិភាព។
ក្នុងជំនួបនោះដែរ លោកជំទាវ Carmen Moreno បានគូសបញ្ជាក់ថា សមិទ្ធផល ទាំងនេះ គឺទទួលបានមកពីសុខសន្តិភាព និងស្ថិរភាពដែលកម្ពុជាទទួលបាន ហើយកត្តាសុខ សន្តិភាព ស្ថិរភាពនេះទៀតសោធគឺជាមូលដ្ឋានចាំបាច់ សម្រាប់អនាគតរបស់កម្ពុជាសម្រាប់ ការអភិវឌ្ឍប្រកបដោយចីរភាព ក៏ដូចជាសម្រាប់យុវជនជំនាន់ក្រោយរបស់កម្ពុជាផងដែរ។ លោកជំទាវបានបន្ដថា លោកជំទាវពិតជាមានមោទនភាព ហើយបន្តជាដៃគូជាមួយកម្ពុជា ដើម្បីគាំទ្រដល់ការអភិវឌ្ឍកម្ពុជាប្រកបដោយចីរភាព។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានសម្តែងនូវការអបអរសាទរជូនចំពោះលោកជំទាវ Carmen Moreno ដែលត្រូវបានតែងតាំងជាអគ្គរដ្ឋទូតសហភាពអឺរ៉ុប ថ្មីប្រចាំនៅព្រះរាជាណាចក្រកម្ពុជា ហើយក៏បានថ្លែងអំណរគុណចំពោះអ្វីដែលលោកជំទាវបានលើកឡើង ព្រោះថាអ្វីដែលលោកជំទាវបានលើកឡើងនេះ គឺជាមូលដ្ឋានមួយដែលកម្ពុជា និងសហភាពអឺរុបអាចបន្តធ្វើការរួមគ្នាពង្រឹងទំនាក់ទំនងរវាងប្រទេសទាំងពីរ។ សម្ដេចតេជោក៏បានថ្លែងអំណរគុណដល់សហភាពអឺរ៉ុបផងដែរ ដែលកន្លងមកបានជួយដល់កម្ពុជាពិសេសក្នុងការផ្ដល់ជំនួយសម្រាប់ដំណើរការកាត់ទោសអតីតមេដឹកនាំជាន់ខ្ពស់ ក្នុងរបបកម្ពុជាប្រជាធិបតេយ្យ និងជួយលើវិស័យផ្សេងៗទៀត។ សម្ដេចតេជោបានបញ្ជាក់ផងដែរថា យើងគប្បីណាឈរលើមូលដ្ឋានអ្វីដែលយើងបានសហការគ្នាកន្លងមកបន្តទៅទៀត ហើយស្វែងរកនូវអ្វីដែលយើងអាចសហការធ្វើការរួមគ្នាបន្តទៀត ក្នុងន័យជាដៃគូផង និងពង្រឹងពង្រីកទំនាក់ទំនងរវាងសហភាពអឺរ៉ុប និងកម្ពុជាផងដែរ៕
ដោយ ជឹម ណារី
