នៅក្នុងជំនួបពិភាក្សាការងារ និងសម្តែងការគួរសម ជាមួយសម្តេចតេជោ នាយករដ្ឋមន្ត្រី ហ៊ុនសែន នៅវិមានសន្តិភាព នាព្រឹកទី២៣ ខែវិច្ឆិកានេះ លោក ចន រ៉ាយ (Jonh E. Rice) អនុប្រធានក្រុមហ៊ុន GE (General Electric) របស់សហរដ្ឋអាមេរិក បានជំរាបជូនថា លោក ចនរ៉ាយ បានជម្រាបជូនថា ក្រុមហ៊ុន GE កំពុងសហការលើការផលិតថាមពលអគ្គសនីដើរដោយធ្យូងថ្ម ក្នុងខេត្តព្រះសីហនុ។ ទន្ទឹមនេះ ក្រុមហ៊ុន ក៏កំពុងសិក្សាលើបណ្តាញអគ្គិសនី និងការបែងចែកអគ្គសនី ទៅកាន់ប្រជាពលរដ្ឋកម្ពុជាផងដែរ ដែលគម្រោងនេះនឹងបញ្ចប់នាចុងឆ្នាំ២០១៧នេះ។ 
សម្តេចតេជោ បានថ្លែងថា កម្ពុជាកំពុងមានតម្រូវការអគ្គិសនីចម្រុះ គ្រប់ទីកន្លែង គឺទាំងវារីអគ្គិសនី និង ថាមពលអគ្គិសនីប្រើដោយធ្យូងថ្ម។
នេះបើតាមការបញ្ជាក់របស់ ឯកឧត្តមបណ្ឌិត កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ក្រោយជំនួបពិភាក្សាការងារនិងសម្តែងការគួរសមនេះ បានអោយដឹងថា បច្ចុប្បន្នក្រុមហ៊ុន GE មានគម្រោងលើវិស័យសំខាន់ៗចំនួន២ គឺវិស័យអគ្គិសនី និងវិស័យសុខាភិបាល ដែលទាក់ទងនឹងឧបករណ៍ពេទ្យ ដែលកន្លងមកត្រូវបាន ប្រើក្នុងមន្ទីរពេទ្យជាច្រើនមកហើយ។ ដោយឡែក ក្រុមហ៊ុន GE នៅជំហ៊ានទី១នេះ បានជួយក្នុងការជម្រុញការប្រើប្រាស់ទឹកស្អាតនៅតាមមន្ទីរពេទ្យចំនួន១២រួចមកហើយនៅកម្ពុជា ។ ក្រុមហ៊ុន GE នឹងបន្តជំហានទី២ ក្នុងការប្រើប្រាស់ទឹកស្អាតនេះ នៅតាមមន្ទីរពេទ្យចំនួន១២ផ្សេងទៀតនៅកម្ពុជា។
ជាចំនុចសំខាន់មួយទៀតក្នុងជំនួបពិភាក្សាការងារនេះ សម្តេចតេជោ បានថ្លែងបញ្ជាក់ថា នឹងស្នើសុំដល់ព្រះមហាក្សត្រ អោយលោក ចនរ៉ាយ មានតួនាទីជាទីប្រឹក្សារាជរដ្ឋាភិបាលកម្ពុជា ដោយសារ លោក មានបទពិសោធន៍ច្រើនក្នុងកិច្ចការអភិវឌ្ឍន៍នៅកម្ពុជា និងដោយសារលោក ចនរ៉ាយ នឹងត្រូវចូលនិវត្តន៍ពីការងារនៃក្រុមហ៊ុន GE ផងនោះ។
ជាការឆ្លើយតប លោក ចនរ៉ាយ បានសម្តែងនូវមោទនភាពក្នុងការទទួលយកតួនាទីនេះ ដោយលោកសន្យាថា នឹងខិតខំចូលរួមបំរើដល់ការអភិវឌ្ឍរបស់កម្ពុជា។
គួរបញ្ជាក់ថា នេះជាលើកទី៥ហើយ ដែល លោក ចនរ៉ាយ បានជួបសម្តែងការគួរសមជាមួយសម្តេចតេជោ។ ដោយ លោក ចនរ៉ាយ ធ្លាប់បានមកកាន់កម្ពុជាជាច្រើនលើកមកហើយ ក្នុងរយៈពេល២០ឆ្នាំមកនេះ៕
