នៅវិមានសន្តិភាព នាព្រឹកថ្ងៃទី២១ខែកញ្ញានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម ថាច់ យឺ ឯកអគ្គរដ្ឋទូតនៃសាធារណរដ្ឋសង្គមនិយមវៀតណាម ចូលជួបជំរាបលាពេលបញ្ចប់អាណត្តិបេសកកម្មការទូតនៅកម្ពុជា។
ឯកឧត្តម ថាច់ យឺ បានគោរពថ្លែងអំណរគុណចំពោះ សម្តេចតេជោ និងថ្នាក់ដឹកនាំកម្ពុជា មន្ត្រីរាជការ ប្រជាជនកម្ពុជាទាំងអស់ដែលបានជួយសម្រួលធ្វើឱ្យបេសកកម្មការទូតរបស់ ឯកឧត្តម នៅកម្ពុជា បានទទួលជោគជ័យ។ ឯកឧត្តម ថាច់ យឺ បានជំរាបជូនសម្តេចដែរថា ក្នុងបេសកកម្មការទូតនៅកម្ពុជា គឺបានជំរុញឱ្យមានទំនាក់ទំនងរវាងប្រទេសទាំងពីរកាន់តែល្អប្រសើរឡើង ជាពិសេសលើវិស័យវិនិយោគ, ទេសចរណ៍, ពាណិជ្ជកម្ម, អប់រំ, និងវិស័យសុខាភិបាលជាដើម។ ឯកឧត្តម ក៏បានបញ្ជាក់ផងដែរថា ទំនាក់ទំនងបេសកកម្មការទូតដ៏ល្អនេះ គឺដោយសារមានការជួយជ្រោមជ្រែង និងយកចិត្តទុកដាក់ ពីថ្នាក់ដឹកនាំកម្ពុជា ជាពិសេសពីសំណាក់សម្តេចតេជោនាយករដ្ឋមន្រ្តី។
សម្តេចតេជោ ហ៊ុន សែន បានថ្លែងអំណរគុណជូនចំពោះ ឯកឧត្តម ថាច់ យឺ ដែលបានប្រឹងប្រែងយ៉ាងពេញទំហឹង នៅក្នុងបេសកកម្មការទូតរបស់លោកនៅកម្ពុជា ហើយសម្តេចក៏បានជូនពរឱ្យឯកឧត្តម ថាច់ យឺ បានទទួលជោគជ័យជាបន្តទៀត នៅលើរាល់កិច្ចការរបស់ឯកឧត្តមទៅថ្ងៃអនាគត។ ទន្ទឹមនឹងនោះ សម្តេចតេជោ នាយករដ្ឋមន្រ្តី បានផ្តាំផ្ញើសួរសុខទុក្ខដល់ ឯកឧត្តមប្រធានាធិបតីវៀតណាម និងលោកនាយករដ្ឋមន្រ្តីវៀតណាម ផងដែរ ហើយសង្ឃឹមយ៉ាងមុតមាំថា ទំនាក់ទំនង មិត្តភាព និងកិច្ចសហប្រតិបត្តិការរវាងកម្ពុជាវៀតណាម នឹងកាន់តែរឹងមាំល្អប្រសើរជានិច្ច៕
