(ភ្នំពេញ)៖ ថាមពល គឺជាកម្លាំងចលកររុញច្រានអរិយធម៌សម័យទំនើប។ វាផ្តល់ពន្លឺបំភ្លឺផ្ទះសម្បែងរបស់យើង ផ្តល់ថាមពលដល់វិស័យឧស្សាហកម្ម គាំទ្រដល់ប្រព័ន្ធដឹកជញ្ជូន និងជំរុញកំណើនសេដ្ឋកិច្ច។
ចាប់តាំងពីពេលដែលយើងភ្ញាក់ពីដេក រហូតដល់ពេលយើងចូលគេងវិញ ស្ទើរតែរាល់ទិដ្ឋភាពទាំងអស់នៃជីវភាពរស់នៅប្រចាំថ្ងៃរបស់យើង សុទ្ធតែពឹងផ្អែកលើថាមពល។ទោះជាយ៉ាងណាក៏ដោយ វិស័យថាមពលក៏ជាចំណុចស្នូលនៃបញ្ហាប្រឈមផ្នែកអាកាសធាតុផងដែរ។
លក្ខណៈជាសកល វិស័យថាមពលគឺជាប្រភពដ៏ធំបំផុតនៃការបញ្ចេញឧស្ម័នផ្ទះកញ្ចក់។ ការដុតធ្យូងថ្ម ប្រេង និងឧស្ម័នធម្មជាតិ ដើម្បីផលិតអគ្គិសនី ប្រើប្រាស់ក្នុងប្រព័ន្ធដឹកជញ្ជូន សង្វាក់ផលិតកម្ម និងការបង្កើតកម្តៅ បានបញ្ចេញឧស្ម័នកាបូនឌីអុកស៊ីតរាប់ពាន់លានតោនទៅក្នុងបរិយាកាសជារៀងរាល់ឆ្នាំ។
ការបញ្ចេញឧស្ម័នទាំងនេះបានស្រូប និងរក្សាកម្តៅ ដែលបណ្តាលឱ្យសីតុណ្ហភាពសកលកើនឡើង និងរួមចំណែកដល់ការប្រែប្រួលអាកាសធាតុ។ ហេតុផលនេះហើយ ទើបសកម្មភាពអាកាសធាតុដែលមានន័យពិតប្រាកដ ត្រូវតែចាប់ផ្តើមចេញពីវិស័យថាមពល។ ដំណឹងល្អគឺថា ដំណោះស្រាយសម្រាប់បញ្ហានេះមានរួចជាស្រេចទៅហើយ។
សកម្មភាពអាកាសធាតុដំបូងបង្អស់ និងមានសារៈសំខាន់បំផុត គឺការបង្កើនការប្រើប្រាស់ថាមពលស្អាត និងថាមពលកកើតឡើងវិញ។ ថាមពលពន្លឺព្រះអាទិត្យ ថាមពលខ្យល់ វារីអគ្គិសនី និងប្រភពកកើតឡើងវិញដទៃទៀត អាចបង្កើតថាមពលអគ្គិសនីដោយបញ្ចេញឧស្ម័នផ្ទះកញ្ចក់ក្នុងកម្រិតតិចតួចបំផុត ឬមិនបញ្ចេញទាល់តែសោះ។
ផ្ទុយពីឥន្ធនៈហ្វូស៊ីល ថាមពលកកើតឡើងវិញទាញយកប្រយោជន៍ពីធនធានធម្មជាតិ ដែលអាចបំពេញបន្ថែមឡើងវិញជាបន្តបន្ទាប់ដោយធម្មជាតិ។
នៅទូទាំងពិភពលោក វិស័យថាមពលកកើតឡើងវិញកំពុងរីកចម្រើនយ៉ាងឆាប់រហ័ស។
ផ្ទាំងសូឡាដើរដោយថាមពលព្រះអាទិត្យកាន់តែមានតម្លៃសមរម្យ ទួរប៊ីនខ្យល់កាន់តែមានប្រសិទ្ធភាពខ្ពស់ ហើយការរីកចម្រើននៃបច្ចេកវិទ្យាកំពុងធ្វើឱ្យថាមពលស្អាតកាន់តែងាយស្រួលទទួលបានជាងពេលណាៗទាំងអស់។ អ្វីដែលកាលពីមុនធ្លាប់ត្រូវបានចាត់ទុកថាជា «ថាមពលជំនួស» (Alternative Energy) នោះ ពេលនេះកំពុងតែក្លាយជាដំណោះស្រាយផ្ដល់ភាពជាម្ចាស់ការកាន់តែខ្លាំងឡើង។
សកម្មភាពអាកាសធាតុដ៏សំខាន់មួយទៀត គឺការកែលម្អប្រសិទ្ធភាពថាមពល (Energy Efficiency)។ ថាមពលដែលស្អាតបំផុត ជារឿយៗគឺជាថាមពលដែលយើងមិនបានខ្ជះខ្ជាយ។
អគារ គ្រឿងបរិក្ខារ គ្រឿងចក្រ និងចង្វាក់ផលិតកម្មឧស្សាហកម្មដែលប្រើប្រាស់ថាមពលប្រកបដោយប្រសិទ្ធភាព អាចកាត់បន្ថយការប្រើប្រាស់អគ្គិសនីបានយ៉ាងច្រើន ក្នុងពេលដែលរក្សាបាននូវកម្រិតផលិតភាព និងភាពងាយស្រួលដដែល។
វិធានការងាយៗ ដូចជាការបិទភ្លើងដែលមិនចាំបាច់ ការប្រើប្រាស់ម៉ាស៊ីនត្រជាក់ដែលសន្សំសំចៃថាមពល និងការកែលម្អប្រព័ន្ធការពារកម្តៅអគារ សុទ្ធតែអាចរួមគ្នាកាត់បន្ថយការបញ្ចេញឧស្ម័នផ្ទះកញ្ចក់ក្នុងទ្រង់ទ្រាយធំបាន។ សកម្មភាពអាកាសធាតុក្នុងវិស័យថាមពល ក៏រួមបញ្ចូលទាំងការធ្វើទំនើបកម្មប្រព័ន្ធដឹកជញ្ជូនផងដែរ។
ការចាប់យក និងប្រើប្រាស់យានយន្តអគ្គិសនីយ៉ាងទូលំទូលាយ អាចជួយកាត់បន្ថយការពឹងផ្អែកលើឥន្ធនៈហ្វូស៊ីល និងកាត់បន្ថយការបញ្ចេញឧស្ម័នផ្ទះកញ្ចក់។ នៅពេលដែលការផលិតថាមពលអគ្គិសនីកាន់តែមានភាពស្អាតជាងមុន ផលប្រយោជន៍បរិស្ថានដែលទទួលបានពីយានយន្តអគ្គិសនីក៏នឹងបន្តកើនឡើងទៅតាមនោះដែរ។
ប្រព័ន្ធដឹកជញ្ជូនសាធារណៈ ហេដ្ឋារចនាសម្ព័ន្ធសម្រាប់ជិះកង់ និងការរៀបចំផែនការទីក្រុងដែលបង្កលក្ខណៈងាយស្រួលដល់អ្នកថ្មើរជើង សុទ្ធតែរួមចំណែកដល់ការកាត់បន្ថយការបញ្ចេញឧស្ម័នពីវិស័យដឹកជញ្ជូន។
វិស័យធុរកិច្ច និងឧស្សាហកម្ម ក៏មានតួនាទីសំខាន់ដូចគ្នាដែរ។
រោងចក្រ និងទីតាំងផលិតកម្មអាចវិនិយោគលើបច្ចេកវិទ្យាដែលស្អាតជាងមុន កែលម្អប្រសិទ្ធភាពថាមពល និងអន្តរកាលទៅរកការប្រើប្រាស់ប្រភពថាមពលកកើតឡើងវិញ។ ក្រុមហ៊ុនជាច្រើននៅជុំវិញពិភពលោកកំពុងរកឃើញថា ការកាត់បន្ថយការបញ្ចេញឧស្ម័នមិនត្រឹមតែល្អសម្រាប់បរិស្ថានប៉ុណ្ណោះទេ ប៉ុន្តែថែមទាំងផ្តល់ផលចំណេញដល់អាជីវកម្ម តាមរយៈការកាត់បន្ថយការចំណាយលើថាមពល និងការលើកកម្ពស់សមត្ថភាពប្រកួតប្រជែង។
សម្រាប់ប្រទេសកំពុងអភិវឌ្ឍន៍ សកម្មភាពអាកាសធាតុក្នុងវិស័យថាមពលបង្កជាបញ្ហាបែបប្រឈមផង និងជាឱកាសផង។
កំណើនសេដ្ឋកិច្ចពិតជាទាមទារថាមពល។ ទោះជាយ៉ាងណាក៏ដោយ កំណើនមិនចាំបាច់ត្រូវដើរតាមគន្លងនៃការបញ្ចេញឧស្ម័នកម្រិតខ្ពស់ ដូចដែលបណ្តាប្រទេសឧស្សាហកម្មជាច្រើនធ្លាប់បានធ្វើកាលពីអតីតកាលនោះឡើយ។
តាមរយៈការវិនិយោគលើហេដ្ឋារចនាសម្ព័ន្ធថាមពលស្អាតនៅថ្ងៃនេះ ប្រទេសកំពុងអភិវឌ្ឍន៍អាចសម្រេចបាននូវការអភិវឌ្ឍសេដ្ឋកិច្ច ក្នុងពេលដែលជៀសវាងបាននូវការខូចខាតបរិស្ថានជាច្រើន ដែលផ្សារភ្ជាប់នឹងការពឹងផ្អែកលើឥន្ធនៈហ្វូស៊ីល។
កម្ពុជាមានលក្ខណៈសម្បត្តិគ្រប់គ្រាន់ក្នុងការរួមចំណែកដល់អន្តរកាលសកលនេះ។ ខណៈពេលដែលប្រទេសជាតិកំពុងឆ្ពោះទៅរកចក្ខុវិស័យនៃការអភិវឌ្ឍប្រកបដោយភាពស្អាត បៃតង និងចីរភាព ថាមពលស្អាតអាចគាំទ្រដល់កំណើនសេដ្ឋកិច្ច លើកកម្ពស់សន្តិសុខថាមពល បង្កើតការងារបៃតង និងពង្រឹងភាពធន់នឹងអាកាសធាតុ។
សកម្មភាពអាកាសធាតុក្នុងវិស័យថាមពល មិនមែនជាការទទួលខុសត្រូវផ្តាច់មុខរបស់រដ្ឋាភិបាលនោះឡើយ។ ប្រជាពលរដ្ឋម្នាក់ៗសុទ្ធតែមានតួនាទីត្រូវចូលរួម ដូចជា៖
*ការជ្រើសរើសគ្រឿងបរិក្ខារដែលសន្សំសំចៃថាមពល
*ការកាត់បន្ថយការប្រើប្រាស់អគ្គិសនីដែលមិនចាំបាច់
*ការគាំទ្របច្ចេកវិទ្យាស្អាត
*ការពិចារណាប្រើប្រាស់យានយន្តអគ្គិសនី
*ការប្រើប្រាស់ថាមពលដោយការទទួលខុសត្រូវខ្ពស់នៅផ្ទះ និងនៅកន្លែងធ្វើការ។
សកម្មភាពបុគ្គលទាំងនេះអាចមើលទៅដូចជាតូចតាច ប៉ុន្តែនៅពេលដែលវាត្រូវបានអនុវត្តដោយប្រជាជនរាប់លាននាក់ វានឹងក្លាយជាកម្លាំងចលករដ៏មានឥទ្ធិពលសម្រាប់ការផ្លាស់ប្តូរ។
អន្តរកាលទៅរកថាមពលស្អាត មិនមែនគ្រាន់តែជាភាពចាំបាច់ផ្នែកបរិស្ថានប៉ុណ្ណោះទេ។ វាគឺជាឱកាសសេដ្ឋកិច្ច ការវិនិយោគលើសុខភាពសាធារណៈ និងជាវិថីឆ្ពោះទៅកាន់អនាគតដែលមានចីរភាពជាងមុន។
ការប្រែប្រួលអាកាសធាតុ គឺជាបញ្ហាប្រឈមដ៏ធំបំផុតមួយនៃមនុស្សជំនាន់យើង ប៉ុន្តែវាក៏ជាឱកាសមួយដើម្បីគិតគូរឡើងវិញអំពីរបៀបដែលយើងផលិត និងប្រើប្រាស់ថាមពល។ ការសម្រេចចិត្តដែលយើងធ្វើនៅថ្ងៃនេះ នឹងកំណត់ពីគុណភាពជីវិតរបស់មនុស្សជំនាន់ក្រោយ។ វិស័យថាមពលបានជួយកសាងពិភពលោកសម័យទំនើប។ នៅពេលនេះ វិស័យនេះមានឱកាសក្នុងការជួយការពារពិភពលោកវិញម្តង។
តាមរយៈការចាប់យកថាមពលកកើតឡើងវិញ ការកែលម្អប្រសិទ្ធភាពថាមពល ការប្រើប្រាស់បច្ចេកវិទ្យាដែលស្អាតជាងមុន និងការលើកទឹកចិត្តឱ្យមានការប្រើប្រាស់ថាមពលប្រកបដោយការទទួលខុសត្រូវ យើងអាចជំរុញកំណើនសេដ្ឋកិច្ច ក្នុងពេលដែលកាត់បន្ថយការបញ្ចេញឧស្ម័នផ្ទះកញ្ចក់។
អនាគតពិតជាត្រូវការថាមពល។
បញ្ហាប្រឈមចំពោះមុខយើងគឺ ធ្វើដូចម្តេចដើម្បីធានាថា ថាមពលដែលផ្តល់កម្លាំងចលករសម្រាប់ថ្ងៃស្អែក មិនបំផ្លាញភពផែនដីដែលកំពុងទ្រទ្រង់ជីវិតយើងទាំងអស់គ្នានោះឡើយ៕
