នាព្រឹកថ្ងៃទី៣០ ខែសីហានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាឆ្នាំ២០១៧នេះ បានបន្តចុះជួបសំណេះសំណាលដោយផ្ទាល់ ជាមួយកម្មករ កម្មការិនីជាង ១ម៉ឺន៣ពាន់នាក់ នៅក្នុងតំបន់សួនឧស្សាហកម្មវឌ្ឍនៈទី២ ស្ថិតនៅតាមបណ្តោយផ្លូវជាតិលេខ៣ ក្នុងសង្កាត់ក្រាំងពង្រ និងសង្កាត់ប្រទះឡាង ខណ្ឌដង្កោ រាជធានីភ្នំពេញ។
ការជួបសំណេះសំណាល និងផ្សព្វផ្សាយពីគោលនយោបាយថ្មីៗរបស់រាជរដ្ឋាភិបាល សម្រាប់កម្មករនិយោជិតនៅតាមបណ្តារោងចក្រនានានេះផងដែរ គឹជាការអនុវត្តគោលនយោបាយជាតិស្តីពីការអភិវឌ្ឍវិស័យឧស្សាហកម្មឆ្នាំ ២០១៥-២០២៥ ដើម្បីអភិវឌ្ឍសេដ្ឋកិច្ចជាតិ បង្កើតការងារ និងលើកកម្ពស់នូវលក្ខខណ្ឌការងារ បង្កើនជីវភាពរស់នៅ ជូនកម្មករនិយោជិតទូទាំងប្រទេស។
ដូចគ្នានេះ តាមរយៈការដាក់ចេញនូវគោលនយោបាយ និងរបបសន្តិសុខសង្គមកាន់តែប្រសើររបស់រាជរដ្ឋាភិបាល សម្រាប់កម្មករនិយោជិតតាមបណ្តារោងចក្រទាំងអស់ គឺជាការអនុវត្តដ៏មានប្រសិទ្ធភាព ស្របតាមគោលនយោបាយជាតិស្តីពីមុខរបរ និងការងារ! គោលនយោបាយស្តីពីការអប់រំ បណ្តុះបណ្តាលវិជ្ជាជីវៈ និងក្របខណ្ឌគោលនយោបាយជាតិគាំពារសង្គម ដែលនឹងជួយបង្កើនប្រសិទ្ធភាពការងារ និងជម្រុញអោយមានការវិនិយោគបន្ថែមទៀតក្នុងវិស័យវាយនភ័ណ្ឌ និងវិស័យនានា។
សម្តេចតេជោ ហ៊ុន សែន បានពន្យល់ពីដំណាក់កាលចំនួន៣ខុសគ្នា ដែលកម្ពុជាបាន ឆ្លងកាត់ គឺនីក្នុងដំណាក់កាលប្រទេសមាន សន្តិភាពផង សង្រ្គាមផង! ដំណាក់កាលដែលកម្ពុជាជំរុញការអភិវឌ្ឍន៍លើវិស័យកសិកម្ម! និងដំណាក់កាលចុងក្រោយនេះ គឺដំណាក់កាលជំរុញវិស័យឧស្សាហកម្មតែម្តង។
សម្តេចតេជោ ថ្លែងបានបញ្ជាក់ថា ដើម្បីបង្កើតការងារ និងជួយសម្រួលដល់ជីវភាពរបស់កម្មករនិយោជិតអោយកាន់ប្រសើរថែមទៀតនោះ គឺគ្រប់ភាគីពាក់ព័ន្ធត្រូវរួមគ្នាបន្ត ជំរុញបរិយាកាសវិនិយោគនៅកម្ពុជា ។ ស្របទៅនឹងគោលនយោបាយជាតិអភិវឌ្ឍន៌វិស័យឧស្សាហកម្មរបស់រាជរដ្ឋាភិបាលកម្ពុជានេះដែរ កម្មករកម្មការិនី នៃរោងចក្រមហាហ្គាមិនក្នុងសួនឧស្សាហកម្មវឌ្ឍនៈ២ បានសម្តែងការគាំទ្រនូវគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជាដែលកំពុងអនុវត្ត និងស្នើសូមកុំអោយមានការធ្វើបាតុកម្មក្នុងរោងចក្រតែម្តង ព្រោះនឹងធ្វើអោយមានការខាតបង់សម្រាប់កម្មករនិយោជិត ។
សូមបញ្ជាក់ថា តំបន់សួនឧស្សាហកម្មវឌ្ឍនៈ២ ត្រូវបានបង្កើតឡើងក្នុងឆ្នាំ២០០៧ លើផ្ទៃដីវិនិយោគប្រមាណជា៨០ហិចតា ដោយមានរោងចក្រចំនួន៨ កំពុងដំណើរការ និងមានកម្មករនិយោជិត ជាង១ម៉ឺន៣ពាន់នាក់។ ក្នុងចំណោមរោងចក្រទាំង៨ ក្នុងតំបន់សួនឧស្សាហកម្មវឌ្ឍនៈ២នេះ មានរោងចក្រកាត់ដេរសម្លៀកបំពាក់ចំនួន៧ និងរោងចក្រផលិតកាបូបចំនួន១។ ផលិតផលដែលផលិតបានក្នុងរោងចក្រទាំងនេះ ត្រូវបាននាំចេញទៅកាន់ប្រទេសជាសមាជិកអាស៊ាន ប្រទេសកូរ៉េ ជប៉ុន ចិន ឥណ្ឌា អូស្រ្តាលី សហគមន៌អឺរ៉ុប សហរដ្ឋអាមេរិក អាហ្រិកខាងត្បូង និងកាណាដា៕
