សម្តេចធិបតី ហ៊ុន ម៉ាណែត ថ្លែងថា បុគ្គលជ្រុលនិយមមួយចំនួន បានប្រែក្លាយកង្វល់របស់ប្រជាពលរដ្ឋទៅជាសកម្មភាពផ្តួលរំលំរាជរដ្ឋាភិបាល

ក្នុងពិធីប្រគល់វិញ្ញាបនបត្រជូនសិស្សមេធាវី និងសិក្ខាកាមមេធាវី នៃគណៈមេធាវីនៃព្រះរាជាណាចក្រកម្ពុជា ដែលប្រារព្ធនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ ព្រឹកថ្ងៃទី៥ ខែកញ្ញា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា ប្រជាពលរដ្ឋមានកង្វល់ចំពោះកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម CLV-DTA ប៉ុន្តែមានបុគ្គលជ្រុលនិយមមួយចំនួននៅក្រៅប្រទេស បានបង្វែរកង្វល់នេះទៅជាចេតនាទុច្ចរិតដើម្បីធ្វើបាតុកម្មផ្តួលរំលំរាជរដ្ឋាភិបាលតែម្តង។

សម្តេចធិបតី ហ៊ុន ម៉ាណែត បានគូសបញ្ជាក់ថា ឆ្លើយតបទៅនឹងកង្វល់របស់ប្រជាពលរដ្ឋ រាជរដ្ឋាភិបាល បានដាក់ចេញវិធានការជាច្រើនដើម្បីធានានូវអធិបតេយ្យភាព បូរណភាពទឹកដី និងការអភិវឌ្ឍ ប៉ុន្តែមានបុគ្គលជ្រុលនិយមមួយចំនួន បានបង្វែរកង្វល់នោះទៅជារឿងផ្សេងខុសពីគោលគំនិតដើម៕