សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នឹងដឹកនាំគណៈប្រតិភូទៅចូលរួមកិច្ចប្រជុំកំពូលអាស៊ានលើកទី៣០ ក្រោមមូលបទ «រួមគ្នាជាដៃគូដើម្បីធ្វើការផ្លាស់ប្តូរ រួមចំណែកជាមួយពិភពលោក» ដែលនឹងប្រព្រឹត្តទៅនៅថ្ងៃទី ២៩ ខែមេសា ឆ្នាំ២០១៧ នៅទីក្រុងម៉ានីល សាធារណរដ្ឋហ្វីលីពីន តបតាមការអញ្ជើញរបស់ឯកឧត្តម រ៉ូឌ្រីហ្គោ រ៉ូ ឌូតឺតេ ប្រធានាធិបតីនៃសាធារណរដ្ឋហ្វីលីពីន។
ឥស្សរៈជនអមដំណើរសម្តេចតេជោ ហ៊ុន សែន រួមមានៈ
– ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ
– ឯកឧត្តម ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា
– ឯកឧត្តម ប៉ាន់ សូរស័ក្តិ រដ្ឋមន្រ្តី ក្រសួងពាណិជ្ជកម្ម និង
សមាជិករាជរដ្ឋាភិបាលកម្ពុជាដ៏ទៃទៀត។
ក្នុងក្របខ័ណ្ឌកិច្ចប្រជុំកំពូលអាស៊ានលើកទី៣០នេះ សម្តេចតេជោក៏នឹងចូលរួមក្នុងជំនួបរវាងថ្នាក់ដឹកនាំអាស៊ានជាមួយតំណាងអន្តរសភាអាស៊ាន និងជំនួបរវាងថ្នាក់ដឹកនាំអាស៊ានជាមួយតំណាងយុវជនអាស៊ានផងដែរ។
ក្នុងពេលដែលអាស៊ានកំពុងប្រារព្ធខួបលើកទី៥០នៅឆ្នាំ២០១៧នេះ នៅក្នុងឱកាសកិច្ចប្រជុំកំពូលអាស៊ានលើកទី៣០ ថ្នាក់ដឹកនាំអាស៊ាននឹងធ្វើការពិភាក្សា និងផ្លាស់ប្តូរទស្សនៈលើបញ្ហាជាសារវ័ន្តនានា ដែលអាស៊ាន និងពិភពលោកកំពុងប្រឈមមុខ ដើម្បីលើកដំកើងសន្តិភាព សន្តិសុខ និងវិបុលភាពថែមទៀតសម្រាប់តំបន់ និងពិភពលោក។ ការកំណត់អាទិភាពកិច្ចប្រឹងប្រែងរបស់អាស៊ានក្នុងដំណើរវិវត្តន៍និម្មាបនកម្មតំបន់ គឺជារបៀបវារៈរបស់អាស៊ាន ហើយក្នុងពេលជាមួយគ្នានេះដែរ ថ្នាក់ដឹកនាំអាស៊ាននឹងផ្តោតការយកចិត្តទុកដាក់ផងដែរដល់បញ្ហាដែលទើបកើតមានឡើងមួយចំនួន ដូចជាស្ថានភាពសេដ្ឋកិច្ច និងនយោបាយពិភពលោក ដែលមានភាពមិនច្បាស់លាស់។
ក្នុងការត្រៀមរៀបចំកិច្ចប្រជុំកំពូលអាស៊ានលើកទី៣០ នេះ ឯកឧត្តមទេសរដ្ឋមន្រ្តី ប្រាក់ សុខុន នឹងអញ្ជើញចូលរួមកិច្ចប្រជុំរដ្ឋមន្រ្តីការបរទេសអាស៊ាន កិច្ចប្រជុំលើកទី១៥របស់ក្រុមប្រឹក្សាសហគមន៍
នយោបាយ-សន្តិសុខអាស៊ាន និងកិច្ចប្រជុំលើកទី៩របស់ក្រុមប្រឹក្សាសម្របសម្រួលអាស៊ាន ដែលនឹងប្រព្រឹត្តទៅនៅមុនកិច្ចប្រជុំកំពូលអាស៊ាន។
ក្នុងឋានៈជាអង្គការតំបន់ដ៏មានជោគជ័យ តួនាទី និងការទទួលខុសត្រូវរបស់អាស៊ានបានបន្ត រីកធំឡើងជាលំដាប់ទៅលើបញ្ហាផ្សេងទៀតដែលស្ថិតនៅក្រៅតំបន់ផងដែរ។ សភាពការណ៍នៅមជ្ឈឹមបូព៌ា និងនៅឧបទ្វីបកូរ៉េ ក៏ដូចជានៅលើពិភពលោក រួមទាំងសុខភាពសេដ្ឋកិច្ចពិភពលោក គឺជាការព្រួយបារម្ភខ្លាំងបំផុតរបស់អាស៊ាន។
នៅចុងបញ្ចប់នៃកិច្ចប្រជុំកំពូលនេះ នឹងមានចេញផ្សាយសេចក្តីថ្លែងការណ៍របស់ប្រធានកិច្ចប្រជុំ ហើយឯកសារមួយចំនួនក៏រំពឹងថានឹងត្រូវបានចុះហត្ថលេខា/អនុម័ត និងកត់សំគាល់ផងដែរ។
ភ្នំពេញ, ថ្ងៃទី ២៤ ខែ មេសា ឆ្នាំ ២០១៧
