'/%3E%3C/svg%3E){kind=small}
'/%3E%3C/svg%3E){kind=small}
AKP ភ្នំពេញ ថ្ងៃទី២៧ ខែកញ្ញា ឆ្នាំ២០១៨ -សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ចាកចេញពីកម្ពុជាហើយតាមជើងយន្តហោះពិសេស នាព្រឹកថ្ងៃព្រហស្បតិ៍ ០៣រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែកញ្ញា ឆ្នាំ២០១៨នេះ ដើម្បីទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជា ជាតិ ដែលប្រព្រឹត្តទៅក្រោមមូលបទ «ធ្វើឱ្យអង្គការសហប្រជាជាតិមានសារៈសំខាន់ពាក់ព័ន្ធ ជាមួយប្រជាជនទាំងអស់ ៖ ភាពជាអ្នកដឹកនាំសកល និងការទទួលខុសត្រូវរួមសម្រាប់សង្គម ប្រកបដោយសន្តិភាព សមធម៌ និងនិរន្តរភាព» និងកិច្ចប្រជុំពាក់ព័ន្ធផ្សេងទៀត នៅទីក្រុងញូវ យ៉ក សហរដ្ឋអាមេរិក ដែលជាការឆ្លើយតបតាមការអញ្ជើញរបស់អគ្គលេខាធិការអង្គការសហ ប្រជាជាតិ និងលោកជំទាវប្រធានមហាសន្និបាតអង្គការសហប្រជាជាតិលើកទី៧៣នោះ។
ឯកឧត្ដម ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងថា គណៈប្រតិភូជាន់ខ្ពស់ ដែលអញ្ជើញអមដំណើរសម្តេចតេជោ ហ៊ុន សែន រួមមាន ឯកឧត្ដមឧបនាយករដ្ឋមន្រ្តី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារី ព្រមទាំងឥស្សរជនសំខាន់ៗមួយចំនួនទៀត។ នៅទីក្រុងញូវយ៉ក សម្តេចតេជោនាយករដ្ឋមន្រ្តី នឹងទទួលជួបជាមួយក្រុមហ៊ុន GE ហើយក្រោយពីជំនួបនោះសម្ដេចតេជោនាយករដ្ឋមន្ត្រី នឹអញ្ជើញធ្វើជាអធិបតីក្នុងការចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុន GE។ បន្ទាប់មកសម្ដេចតេជោនឹងអនុញ្ញាតឱ្យលោកប្រធានក្រុមប្រឹក្សាធុរកិច្ចអាស៊ាន-អាម៉េរិក ចូលជួបសម្ដែងការគួរសមផងដែរ។ សម្ដេចតេជោនាយក រដ្ឋមន្ត្រី នឹងធ្វើសេចក្តីថ្លែងការណ៍មួយផ្តោតលើការវិវត្តនាពេលថ្មីៗ និងសមិទ្ធផលសំខាន់ៗ ដែលរាជរដ្ឋាភិបាលកម្ពុជាសម្រេចបាន បញ្ហាតំបន់ និងអន្តរជាតិដែលជាការព្រួយបារម្ភរួម។ ក្នុងឱកាសនៃការអញ្ជើញចូលរួមក្នុងមហាសន្និបាតអង្គការសហប្រជាជាតិ សម្តេចតេជោ នាយករដ្ឋមន្រ្តី នឹងជួបពិភាក្សាទ្វេភាគីដាច់ដោយឡែកពីគ្នា ជាមួយ ឯកឧត្ដម អង់តូនីញ៉ូ ហ្គូតេរ៉េស (António Guterres) អគ្គលេខាធិការអង្គការសហប្រជាជាតិ, ឯកឧត្ដម បូយកូ បូរីស្សូវ (Boyko Borissov) នាយករដ្ឋមន្រ្តីប៊ុលហ្គារី និង ឯកឧត្ដម ខាដហ្កា ប៉្រាសាទ ស្សាម៉ា អូលី (Khadga Prasad Sharma Oli) នាយករដ្ឋមន្រ្តីនេប៉ាល់ផងដែរ។ក្នុងអំឡុងពេលស្នាក់នៅ ទីក្រុងញូវយ៉ក សម្តេចតេជោនាយករដ្ឋមន្រ្តីក៏នឹងជួបជាមួយសហគមន៍ខ្មែរដែលរស់នៅសហ រដ្ឋអាមេរិក ផងដែរ។
ដោយឡែកនៅលើបណ្ដាញទំនាក់ទំនាក់សង្គមហ្វេសប៊ុក ថ្ងៃទី២៧ ខែកញ្ញា ឆ្នាំ២០១៨នេះដែរ សម្ដេចតេជោបានសរសេរថា ខ្មែរស្ទើរគ្រប់គ្នាស្គាល់បទដ៏ពេញនិយមមួយដែលមានចំណងជើងថា លាទៅបម្រើជាតិ ។ តែសម័យនោះគឺទៅច្បាំងដោយប្រដាប់អាវុធសុទ្ធសាធយកជីវិតធ្វើដើមទុន មករំដោះជាតិ យកដើមទ្រូងមកពាំងគ្រាប់ដើម្បីការពារជាតិ។ ខ្ញុំធ្លាប់ស្គាល់រស់ជាតិនេះច្បាស់ជាងគេ អីចឹងហើយខ្ញុំមិនចង់ឱ្យកូនខ្មែរជំនាន់ក្រោយត្រូវទទួលភ្លក់រសជាតិនេះទៀតឡើយ។ ថ្ងៃនេះខ្ញុំសូមលាទៅបម្រើជាតិជាថ្មីម្តងទៀតដោយប្រើនយោបាយការទូតនៅលើឆាកអន្តរជាតិ។ កម្ពុជាមិនអាចឱ្យគេបង្ខូច ជាន់ឈ្លីទោះបីក្នុងរូបភាពណាមួយក៏ដោយ ។ ខ្ញុំចេញទៅលើកនេះក៏នឹងចូលរួមផងដែរនូវការងារជាកិច្ចការតំបន់ និងអន្តរជាតិដែលកំពុងវិវត្តន៍យ៉ាងតានតឹង និងស្មុគស្មាញ។ ចំពោះជនរួមជាតិដែលគាំទ្រខ្ញុំ និងគាំទ្រកម្ពុជានៅក្រៅប្រទេស ខ្ញុំនឹងទៅជួបបងប្អូនក្នុងពេលដ៏ខ្លីខាងមុខ។ យើងនឹងអាចសន្ទនាផ្លាស់ប្ដូរសេចក្តីនឹករលឹកជាមួយគ្នា ខ្ញុំនឹងអាចរាយការណ៍ជូនពីសភាពការណ៍ទូទៅ ការវិវឌ្ឍ និងការអភិវឌ្ឍនានាលើមាតុភូមិកម្ពុជានាពេលបច្ចុប្បន្ន។ ចំពោះជនរួមជាតិនៅក្រៅប្រទេសដែលមិនចូលចិត្តខ្ញុំ ក៏សូម ចែកឱ្យដាច់នូវអ្វីជាផលប្រយោជន៍ មុខមាត់ ហ៊ុន សែន ពីអ្វីជាមុខមាត់ និងផលប្រយោជន៍ជាតិខ្មែរទាំងមូល ដោយសម្បជញ្ញៈ វិចារណញាណ និងមនសិការផ្ទាល់រៀងៗខ្លួនទៅចុះ។ខ្ញុំត្រូវស្ថិតនៅលើយន្តហោះជាង១៧ម៉ោងក្នុងដំណើរផ្លូវពីភ្នំពេញទៅកាន់ញូវយ៉ក។ សង្ឃឹមថានឹងបានសម្រាកលក់លើយន្តហោះបន្ទាប់ពីហត់នឿយនៃការងារក្នុងប្រទេស។ ជូនពរបងប្អូនជនរួមជាតិជួបតែសេចក្តីសុខ។
គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា គ្រោងនឹងធ្វើមាតុភូមិនិវត្តន៍មកកាន់កម្ពុជា វិញ នៅរសៀលថ្ងៃទី០១ ខែតុលា ឆ្នាំ២០១៨៕
ដោយ ជឹម ណារី
