នាព្រឹកថ្ងៃទី២០ ខែកញ្ញា ឆ្នាំ២០១៧នេះ ឯកឧត្តម លីវ យុនសាន (Liu Yunshan) សមាជិកគណៈអចិន្រ្តៃយ៌ការិយាល័យនយោបាយ នៃគណៈកម្មាធិការមជ្ឈិមបក្សកុំម្មុយនីសចិន បានចូលជួបសម្តែងការគួរសម និងពិភាក្សាការងារ ជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាព ។ 
នៅក្នុងជំនួបនេះ ឯកឧត្តម លីវ យុនសាន បានបញ្ជាក់ថា ប្រទេសចិន នៅតែគាំទ្រពេញទំហឹង ដល់រាជរដ្ឋាភិបាលកម្ពុជា និងគណបក្សប្រជាជនកម្ពុជា ដើម្បីបន្តការអភិវឌ្ឍជាតិនិងជម្រុញជីវភាពរបស់ប្រជាជនកម្ពុជាអោយកាន់តែប្រសើរឡើង។ ជាក់ស្តែងការធ្វើទស្សនកិច្ចរបស់ឯកឧត្តម ជាលើកទី៣នៅក្នុងប្រទេសកម្ពុជាពេលនេះ គឺជាការឆ្លុះបញ្ចាំងដល់មជ្ឈដ្ឋានអន្តរជាតិឃើញថា ប្រទេសកម្ពុជា ជាមិត្តល្អ និងជាសមាជិកមហាគ្រួសាររបស់ប្រទេសចិន។ ឯកឧត្តម លីវ យុនសាន បានជំរាបជូនសម្តេចតេជោថា បើទោះបីជាស្ថិតក្នុងភាពមមាញឹក ដោយសារប្រទេសចិន នឹងរៀបចំ មហាសន្និបាតលើកទី១៩ នាថ្ងៃទី៨ ខែតុលា ខាងមុខនេះយ៉ាងណា ក៏គណៈប្រតិភូចិន នៅតែឆ្លៀតពេល មកបំពេញទស្សនកិច្ចនៅប្រទេសកម្ពុជា ព្រោះដំណើរទស្សនកិច្ចពេលនេះ នឹងជួយជម្រុញការអនុវត្តការងារនានា ដែលថ្នាក់ដឹកនាំ នៃប្រទេសទាំងពីរបានឯកភាពគ្នា នាពេលកន្លងមក ក្នុងនោះ មានដូចជា ការនាំចេញអង្កររបស់កម្ពុជាទៅកាន់ប្រទេសចិននាឆ្នាំ២០១៨! ការកសាងផ្លូវល្បឿនលឿនពីរាជធានីភ្នំពេញ ទៅក្រុងព្រះសីហនុ! និងគម្រោងកសាងអាកាសយានដ្ឋានក្នុងខេត្តសៀមរាបតែម្តង។
នៅក្នុងជំនួបនេះដែរ សម្តេចតេជោ នាយករដ្ឋមន្ត្រី បានថ្លែងការអរគុណដល់មិត្តចិនដែលបន្តគាំទ្រដល់កម្ពុជា និងបន្តផ្តល់ជំនួយសម្រាប់ការអភិវឌ្ឍរបស់កម្ពុជា។ ជាការឆ្លើយតបចំពោះការអញ្ជើញរបស់រដ្ឋាភិបាលចិនតាមរយៈ ឯកឧត្តម លីវ យុនសាន សម្តេចតេជោ ក៏បានជំរាបជូនថា សម្តេចនឹងធ្វើដំណើរទស្សនកិច្ចទៅកាន់ប្រទេសចិននាពេលខាងមុខនេះ ដើម្បីចូលរួមក្នុង វេទិកាកិច្ចសន្ទនាបណ្តាគណបក្សនយោបាយនៅប្រទេសចិនផងដែរ។
បន្ទាប់ពីបញ្ចប់ជំនួបទ្វេភាគីនេះ ភាគីកម្ពុជា និងចិន បានចុះហត្ថលេខា លើអនុស្សរណៈនៃការយោគយល់ ចំនួន៦ចំនុច រួមមាន៖ ទី១. អនុស្សរណៈ នៃការយោគយល់ ស្តីពី «ការផ្លាស់ប្តូទស្សនកិច្ចសិក្សា និង សហប្រតិបត្តិការ» រវាងគណបក្សកុំម្មុយនីស្តចិន និង គណបក្សប្រជាជនកម្ពុជា ដែលចុះហត្ថលេខារវាង ឯកឧត្តម យស់ សុន និង ឯកឧត្តម សុង ថោ រដ្ឋមន្ត្រីក្រសួងទំនាក់ទំនងអន្តរជាតិចិន ។ ទី២. អនុស្សរណៈ នៃការយោគយល់ ស្តីពី «ការជំរុញទំនាក់ទំនងនិងសហប្រតិបត្តិការរវាងអង្គការមិនមែនរដ្ឋាភិបាល នៃសាធារណៈរដ្ឋប្រជាមានិតចិន និងព្រះរាជាណាចក្រកម្ពុជា»! រវាងបណ្តាញអង្គការមិនមែនរដ្ឋាភិបាលចិនដើម្បីទំនាក់ទំនងអន្តរជាតិ និង វេទិកាសម្ព័ន្ធសង្គមស៊ីវិលរបស់កម្ពុជា ដែលចុះហត្ថលេខារវាង ឯកឧត្តម កឹម រ័ត្នវិសិដ្ឋ ប្រធានក្រុមប្រឹក្សាភិបាល នៃវេទិកាសម្ព័ន្ធសង្គមស៊ីវិល ជាមួយ ឯកឧត្តម លីវ កាយយ៉ាង (Liu Kaiyang) អគ្គលេខាធិការរងបណ្តាញអង្គការមិនមែនរដ្ឋាភិបាលចិនដើម្បីទំនាក់ទំនងអន្តរជាតិ! ទី៣. អនុស្សរណៈនៃការយោគយល់ ស្តីពី «ការអនុវត្តគំរោងលើកកំពស់ជីវភាព» សម្រាប់ឆ្នាំ ២០១៧- ២០១៩ រវាង ក្រសួងសុខាភិបាល នៃព្រះរាជាណាចក្រកម្ពុជា និងមូលនិធិចិនដើម្បីសន្តិភាព និងការអភិវឌ្ឍន៍ ដែលចុះហត្ថលេខា រវាង ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ជាមួយ ឯកឧត្តម លីវ កាយយ៉ាង (Liu Kaiyang) អគ្គលេខាធិការរងបណ្តាញអង្គការមិនមែនរដ្ឋាភិបាលចិនដើម្បីទំនាក់ទំនងអន្តរជាតិ! ទី៤. អនុស្សរណៈនៃការយោគយល់ ស្តីពី «ការអនុវត្តគំរោងលើកកំពស់ជីវភាព» សម្រាប់ឆ្នាំ ២០១៧-២០១៩ រវាង ក្រសួងអប់រំ យុវជន និងកីឡានៃព្រះរាជាណាចក្រកម្ពុជា និង មូលនិធិចិនដើម្បីសន្តិភាព និងការអភិវឌ្ឍន៍ ដែលចុះហត្ថលេខា រវាង ឯកឧត្តម ហង្ស ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ជាមួយ ឯកឧត្តម លីវ កាយយ៉ាង (Liu Kaiyang) អគ្គលេខាធិការរងបណ្តាញអង្គការមិនមែនរដ្ឋាភិបាលចិនដើម្បីទំនាក់ទំនងអន្តរជាតិ! ទី៥. អនុស្សរណៈនៃការយោគយល់គ្នា ស្តីពី «កិច្ចសហការថតភាពយន្តឯកសារ» រវាងស្ថានីយទូរទស្សន៍មជ្ឈឹមចិន CCTV និង ស្ថានីយទូរទស្សន៍ជាតិកម្ពុជា ដែលចុះហត្ថលេខារវាង ឯកឧត្តម ឃឹម វុទ្ធី អគ្គនាយកនៃទូរទស្សន៌ជាតិកម្ពុជា ជាមួយ ឯកឧត្តម ហ្ស៊ូ ថុង (Zhu Thong) និពន្ធនាយករងនៃទូរទស្សន៌មជ្ឈឹមចិន។ និងទី៦. អនុស្សរណៈនៃការយោគយល់គ្នា ស្តីពី «សហប្រតិបត្តិការសិក្សាលើគំរោងសាងសង់បណ្តាញទូរទស្សន៍ឌីជីថលទូទាំងប្រទេសកម្ពុជា» រវាងក្រសួងព័ត៌មានកម្ពុជា និង ទូទស្សន៍យុនណាន នៃសាធារណរដ្ឋប្រជាមានិតចិន ដែលចុះហត្ថលេខារវាង ឯកឧត្តម ផុស សុវណ្ណ អគ្គនាយកព័ត៌មាននិងសោតទស្សន៌ នៃក្រសួងព័ត៌មាន ជាមួយ ឯកឧត្តម លីន ស៊ីយីង (Lin Siying) តំណាងទូរទស្សន៌យុនណាន៕
