សម្តេចធិបតី ហ៊ុន ម៉ាណែត ៖ ទិន្នន័យប្រៀបដូចត្រីវិស័យមួយចង្អុលទិសចំគោលដៅ

សម្តេចធិបតី ហ៊ុន ម៉ាណែត បានថ្លែងថា សារៈសំខាន់នៃជំរឿនសេដ្ឋកិច្ច ត្រូវការទិន្នន័យ ប្រៀបដូចផែនទីមួយ ជាត្រីវិស័យ ហើយផែនទីគឺបង្ហាញឱ្យឃើញពីភូមិសាស្ត្រ ដែលភូមិសាស្ត្រនេះ មិនសំដៅទៅលើដីទេ អាចសំដៅទៅលើភូមិសាស្ត្រនយោបាយ សេដ្ឋកិច្ច ធុរៈកិច្ច បានឱ្យដឹងពីស្ថានភាពជុំវិញថាមានលក្ខណៈយ៉ាងណាខ្លះ។

សម្តេចធិបតី ហ៊ុន ម៉ាណែត ថ្លែងដូចនេះ នៅព្រឹកទី២៦ ខែធ្នូ ឆ្នាំ២០២៣ ក្នុងឱកាសអញ្ជើញប្រកាសផ្សព្វផ្សាយរបាយការណ៍ថ្នាក់ជាតិ ស្តីពីលទ្ធផលចុងក្រោយនៃជំរឿនសេដ្ឋកិច្ចកម្ពុជាឆ្នាំ២០២២។

សម្តេចធិបតី ហ៊ុន ម៉ាណេត បានថ្លែងបន្តថា សូម្បីតែការធ្វើធុរៈកិច្ចត្រូវដឹងពីចំណងចំណូលចិត្តអតិថិជនចង់បានអ្វីដែរ មុននឹងដាក់វិនិយោគ នេះហើយជាការវាស់ស្ទង់។ រីឯត្រីវិស័យ បានឱ្យដឹងថា នៅចំណុចណាលើត្រីវិស័យ ក្នុងផែនទីភូមិសាស្ត្រនេះ តើប៉ុន្មានគីឡូដល់ទឹក ប៉ុន្មានគីឡូដល់ជ្រោះ? ហើយគិតដើរទៅផ្លូវណាផ្សេងទៀត នេះជាកិច្ចការងារសំខាន់ណាស់។

នាឱកាសនោះ សម្តេចធិបតី ថ្លែងបញ្ជាក់ថា ការប្រើប្រាស់ទិន្នន័យនៅលើកាលវិភាគនេះ គឺប្រើនៅលើពិភពលោក អាចនិយាយបានថា បើគ្មានទិន្នន័យហាក់ស្ថិតនៅចំណុចមួយវង្វេងវង្វាន់ មិនអាចដឹងថា នៅជុំវិញយើងមានស្ថានភាពបែបណា និងមិនអាចព្យាករណ៍ទៅមុខមានអ្វី ហើយដើរដល់ចំណុចណា និងទៅណាទៀតនោះទេ។ ដូចនេះ ការគ្រប់គ្រងទិន្នន័យគឺសំខាន់ណាស់ ដែលពិភពលោក បានកំពុងប្រើប្រព័ន្ធគ្រប់គ្រងទិន្នន័យទំនើប មានទាំងក្នុងទូរស័ព្ទដៃផងដែរ៕