ភ្នំពេញ ថ្ងៃទី២៨ ខែសីហា ឆ្នាំ២០១៩ -ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតជោ ហ៊ុន សែន នឹងផ្ដល់នូវ ទស្សនវិស័យ និងចក្ខុវិស័យមួយចំនួន សម្រាប់ការអនុវត្តការងាររបស់ឧត្តមក្រុមប្រឹក្សាពិគ្រោះ និងផ្តល់យោបល់ ក៏ដូចជា ផ្តល់ឱកាសឱ្យសមាជិកទាំងអស់ចូលរួមជាយោបល់ស្ថាបនា និងសំណូមពរមួយចំនួនផងដែរ។សម្ដេចតេជោបានផ្ដលអនុសាសន៍បែបនេះ នៅក្នុងកិច្ចប្រជុំនា ព្រឹកថ្ងៃពុធ ១៣រោច ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៨ ខែសីហា ឆ្នាំ២០១៩នេះ នៅវិមានសន្តិភាព។ នេះបើយោងតាមសេចក្ដីប្រកាសព័ត៌មានរបស់ឧត្តមក្រុម ប្រឹក្សាពិគ្រោះ និងផ្តល់យោបល់។
កិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់នេះ ធ្វើឡើងក្នុងគោលបំណង ដើម្បីពិនិត្យការងាររយៈពេលមួយឆ្នាំ ក្នុងការរកចំណុចកែលម្អ និងជំរុញប្រសិទ្ធភាពការងាររបស់ឧត្តមក្រុមប្រឹក្សាពិគ្រោះនិងផ្តល់យោបល់។ ឧត្ដមក្រុមប្រឹក្សាពិគ្រោះនិងផ្ដល់ យោបល់នេះ គឺជាគំនិតផ្ដួចផ្ដើមផ្ទាល់របស់សម្ដេចតេជោនាយករដ្ឋមន្ត្រី ក្នុងគោលបំណងលើកស្ទួយនយោបាយ ប្រជាធិបតេយ្យសេរីពហុបក្ស ក្នុងកិច្ចប្រមូល៖ ធាតុចូល ទស្សនៈ ពហុគំនិត ជាប្រយោជន៍ដល់ការស្ថាបនាជាតិ ដោយមានការចូលរួមពីគណបក្សនយោបាយដែលគ្មានអាសនៈក្នុងរដ្ឋសភា និងដោយបានចូលរួមយ៉ាងសកម្ម ក្នុងការបោះឆ្នោតសកល ជ្រើសតាំង តំណាងរាស្ត្រ នីតិកាលទី៦ នៃរដ្ឋសភា។ ការផ្ដួចផ្ដើមគំនិតទស្សនទាននយោបាយមិនមាន ការរើសអើងនេះ ជាប្រវត្តិសាស្ត្រគ្មានពីររបស់សម្ដេចតេជោនាយករដ្ឋមន្ត្រី ក្នុងកិច្ចបង្កើតបាន ឧត្ដមក្រុមប្រឹក្សាពិគ្រោះ និងផ្ដល់យោបល់នេះ។ គឺជាហេតុផលនយោបាយមួយ នៃការលើក តម្កើងក្របខ័ណ្ឌ ប្រជាធិបតេយ្យ សេរីពហុបក្ស ជាមួយតម្លៃលេចធ្លោរបស់កម្ពុជាសុទ្ធសាទ ដោយធានា និងរក្សាបាននូវរាល់សំឡេង និងនិន្នាការនយោបាយគ្រប់ភាគី ក្នុងកិច្ចចូលរួម កសាង ការពារឯករាជ្យ និងអធិបតេយ្យជាតិ ប្រាសចាកការជ្រៀតជ្រែកពីបរទេសជិតឆ្ងាយណាមួយ។
គួរបញ្ជាក់ដែរថា ឧត្តមក្រុមប្រឹក្សាពិគ្រោះ និងផ្តល់យោបល់ត្រូវបានបង្កើតឡើងនៅថ្ងៃ ទី០៦ ខែកញ្ញា ឆ្នាំ២០១៨ តាមគំនិតផ្តួចផ្តើមរបស់សម្តេចតេជោ ហ៊ុន សែន ក្រោយពេលបោះឆ្នោតជាតិអាណត្តិទី៦។ ឧត្តមក្រុមប្រឹក្សាពិគ្រោះ និងផ្តល់យោបល់ មានសមាសភាពមកពី គណបក្សនយោបាយចំនួន ១៦ ក្នុងចំណោមគណបក្សនយោបាយចំនួន ២០ ដែលបានចូល រួមការបោះឆ្នោតជាតិ ៕
ដោយជឹម ណារី
