បន្ទាប់មកនៅព្រឹកថ្ងៃទី២៨ កញ្ញាដដែលនោះដែរ សម្តេចតេជោ នាយករដ្ឋមន្រ្តី បានអនុញ្ញាតឲ្យ ឯកឧត្តម អាឡេកសាន់ឌ័រ ហ្វេលមែន (Alexander Feldman) ប្រធាននិងជានាយកប្រតិបត្តិ ក្រុមប្រឹក្សាធុរកិច្ចសហរដ្ឋអាមេរិក-អាស៊ាន។ ឯកឧត្តម អាឡេកសាន់ឌ័រ ហ្វេលមែន ប្រធាននិងជានាយកប្រតិបត្តិ ក្រុមប្រឹក្សាធុរកិច្ចសហរដ្ឋអាមេរិក-អាស៊ាន មានប្រសាសន៍សំដែងនូវការរីករាយ ដោយបានជួបពិភាក្សាការងារជាមួយ សម្តេចតេជោនាយករដ្ឋមន្រ្តី នៅបុរីញ៉ូវយ៉ក សហរដ្ឋអាមេរិក។ ឯកឧត្តមបន្តថា អ្វីដែលរូបឯកឧត្តមជួបពិភាក្សាជាមួយសម្តេចនៅពេលនេះ គឺដូចអ្វីដែលឯកឧត្តមចង់ឃើញ គឺចង់ឲ្យកម្ពុជាបន្តនូវគោលនយោបាយសេដ្ឋកិច្ចឲ្យកាន់តែទូលំទូលាយ ថែមទៀត។ ឯកឧត្តមបន្តថា ដោយសារតែប្រទេសកម្ពុជា គឺជាសមាជិករបស់អាស៊ាន ឯកឧត្តមចង់ឲ្យកម្ពុជាបន្តការគាំទ្រធ្វើយ៉ាងណា ឲ្យមានទិដ្ឋការអាស៊ាននៅពេលខាងមុខ ដើម្បីជំរុញការកសាងសមត្ថភាព ពិសេសការបង្កើនគុណភាព នៃការអប់រំ ក្នុងក្របខណ្ឌអាស៊ាន។
ក្នុងកិច្ចពិភាក្សាគ្នានោះដែរ ឯកឧត្តមបានសំដែងនូវការវាយតម្លៃខ្ពស់ ជូនចំពោះសម្តេចតេជោ នាយករដ្ឋមន្រ្តី ដែលតែងតែគាំទ្រដល់បណ្តាក្រុមហ៊ុនសហរដ្ឋអាមេរិក ក្នុងការទៅបណ្តាក់ទុនវិនិយោគ ក្នុងប្រទេសកម្ពុជា និងបណ្តាប្រទេសក្នុងតំបន់អាស៊ាន ដែលកន្លងមកមានក្រុមហ៊ុនហ្វ័ត និងក្រុមហ៊ុនកូកាកូឡាជាដើម។ ឯកឧត្តមប្រធានក៏បានវាយតម្លៃខ្ពស់ ពីកម្លាំងនិងសមត្ថភាពយុវជនរបស់កម្ពុជា ដែលកំពុងមានការកើនឡើង ស្របទៅនិងការរីកចម្រើននៃសេដ្ឋកិច្ចឌីជីថល ដោយឯកឧត្តមរំពឹងថា សម្តេចតេជោ និងមានការចាប់អារម្មណ៍ទៅលើអនាគតដ៏ល្អ និងមានការប្រកួតប្រជែងរបស់កម្ពុជា។
តាមរយៈជំនួបពិភាក្សាគ្នានោះដែរ ឯកឧត្តមក៏បានជំរាបជូនសម្តេចតេជោ ពីការដែលឯកឧត្តមបានស្នើទៅ កាន់ឯកឧត្តមនាយករដ្ឋមន្រ្តីថៃ ក្នុងពេលដែលថៃធ្វើជាប្រធានអាស៊ានឆ្នាំ២០១៩ អោយលើកពីប្រធានបទ នៃសេដ្ឋកិច្ចឌីជីថល សម្រាប់ធ្វើការពិភាក្សាក្នុងអាស៊ាន។ ក្នុងជំនួបពិភាក្សាគ្នានោះ ឯកឧត្តមប្រធាន មានប្រសាសន៍ ចង់ឃើញសហរដ្ឋអាមេរិក និងកម្ពុជា មានទំនាក់ទំនងក្នុងភាពល្អប្រសើរឡើងវិញ ពិសេសនៅពេលដែលអាមេរិក តែងតាំងឯកអគ្គរដ្ឋទូតថ្មីរបស់ខ្លួន ប្រចាំកម្ពុជានៅពេលខាងមុខ ពោលគឺឯកឧត្តមឯកអគ្គរដ្ឋទូតថ្មីរបស់អាមេរិក គឺជាឧបការីរដ្ឋមន្រ្តីការបរទេសអាមេរិក ជាអ្នកការទូតមួយរូប ដែលយល់ច្បាស់ពីអាស៊ីបូព៌ា។
សម្តេចតេជោ នាយករដ្ឋមន្រ្តីមានប្រសាសន៍ស្វាគមន៍ និងបានលើកឡើងពីចំណុចមួយចំនួន ពិសេសកំណើនសេដ្ឋកិច្ចរបស់ប្រទេសកម្ពុជា ពោលគឺកម្ពុជានៅរក្សាកំណើនសេដ្ឋកិច្ច ក្នុងអាត្រាជាង៧% ទៅតាមយន្តការអាស៊ានបូក៣ ដែលបានព្យាករណ៍ថា កំណើនសេដ្ឋកិច្ចក្នុងឆ្នាំ២០១៨នេះ កម្ពុជានិងមានកំណើនសេដ្ឋកិច្ចប្រមាណ៧,២%។ សម្តេចតេជោបន្តថា កំណើនសេដ្ឋកិច្ចរបស់ប្រទេសកម្ពុជាគឺទទួលបានជោគជ័យ បើទោះបីជាមានសម្ពាធពីសេដ្ឋកិច្ចពិភពលោកក៏ដោយ។ សម្តេចតេជោបន្តថា អ្វីដែលរូបសម្តេចចង់ឃើញគឺការអនុវត្តរូបមន្ត មួយបូកមួយ ពោលគឺបណ្តាក្រុមហ៊ុនបរទេស ដែលកំពុងវិនិយោគក្នុងប្រទេសអាស៊ាន ក្នុងនោះរួមទាំងក្រុមហ៊ុនមកពីសហរដ្ឋអាមេរិកផងដែរនោះ មានលទ្ធភាពអាចទៅបង្កើតរោងចក្រ នៅប្រទេសកម្ពុជា ឧទាហរណ៍ប្រទេសថៃបូកមួយ មានន័យថាក្រុមហ៊ុនសហរដ្ឋអាមេរិក ដែលកំពុងប្រតិបត្តិការក្នុងប្រទេសថៃ អាចមកបើករោងចក្រក្នុងប្រទេសកម្ពុជា។ សម្តេចតេជោនាយករដ្ឋមន្រ្តីបន្តថា នៅក្នុងគោលនយោបាយបដិវត្តន៍ឧស្សាហកម្ម២០១៥-២០២៥ របស់ប្រទេសកម្ពុជា គឺផ្តោតសំខាន់ទៅលើវិស័យបីសំខាន់ៗ គឺទី១វិស័យកសិកម្ម ទី២វិស័យឧស្សាហកម្ម និងទី៣ វិស័យសេវាកម្ម។ សម្តេចតេជោបន្តថា សេដ្ឋកិច្ចកម្ពុជាមានការវិវត្តន៍ ដោយមិនពឹងផ្អែកតែទៅលើវិស័យណាមួយនោះទេ ពោលគឺការរីកចម្រើនលើពហុវិស័យក្នុងភាពរឹងមាំ ពិសេសលើផ្នែកឧស្សាហកម្ម ដែលមានលក្ខណៈទ្រង់ទ្រាយជាសកល ពោលគឺការផលិតក្នុងប្រទេសកម្ពុជា រួចធ្វើការចែកចាយជាសកល តាមតម្រូវការ នៃសេដ្ឋកិច្ចពិភពលោក។ ទាក់ទិនទៅនិងទំនាក់ទំនងរវាងកម្ពុជា និងសហរដ្ឋអាមេរិក សម្តេចតេជោមានប្រសាសន៍ថា សម្តេចទេគឺជាអ្នកជំរុញការកសាង នូវទំនាក់ទំនងរវាង កម្ពុជាជាមួយនិងសហរដ្ឋអាមេរិក កម្ពុជាចង់ធ្វើមិត្តដ៏ល្អជាមួយសហរដ្ឋអាមេរិក។ សម្តេចបន្តថា នៅពេលខាងមុខ អ្វីដែលសម្តេចចង់ឃើញនោះគឺ ការទំនាក់ទំនងនៃប្រទេសទាំងពីរ មានភាពកាន់តែល្អប្រសើរឡើង ពិសេសរវាងរដ្ឋាភិបាលនិងរដ្ឋាភិបាល ដូចអ្វីដែលផ្នែកធុរកិច្ចសហរដ្ឋអាមេរិកចង់បានដែរនោះ។ សម្តេចតេជោសង្កត់ធ្ងន់ថា ប្រសិនបើសហរដ្ឋអាមេរិក បើកទិដ្ឋការជូនដល់ប្រជាជនកម្ពុជាដូចដើមឡើងវិញនោះ ការបន្តរុករកអដ្ឋិធាតុទាហានបាត់ខ្លួនអាមេរិក នឹងបន្តឡើងវិញដូចអ្វីដែលយើងធ្លាប់បានអនុវត្តរួមគ្នាកាលពីពេលមុន។ សម្តេចតេជោមានប្រសាសន៍ថា សម្តេចនិងបន្តជួបជាមួយប្រតិភូក្រុមប្រឹក្សាធុរកិច្ចអាមេរិក អាស៊ាន នៅពេលដែលគណៈប្រតិភូនេះអញ្ជើញទៅកាន់ប្រទេសកម្ពុជា។
