សម្រង់​សង្កថា សម្តេចតេជោ ហ៊ុន សែន ក្នុង​ពិធីសម្ពោធវិទ្យាល័យ តេជោ ហ៊ុន សែន បឹងកុក

CNV: 28 ខែ​កុម្ភៈ, 2017

លោកនាយកសាលាបឹងកុក អញ្ជើញសម្តេចតាមហ្វេសប៊ុក ទៅមើលអគារសិក្សាចាស់ទ្រុឌទ្រោម

ថ្ងៃនេះ ខ្ញុំព្រះករុណាខ្ញុំ ពិតជាមានការរីករាយ ដែលបានវិលត្រឡប់មកខេត្តកំពង់ចាមសារជាថ្មីម្តងទៀត ដែល​មក​លើ​កនេះ មកប្រគល់សាលាជូន ​មិនមែនមកសម្ពោធទេ ប្រគល់តែម្តង។ ដោយសារអីរឿងនេះ? ខ្ញុំសូម​ចាប់​ផ្តើម​ពី លោក ឈឹម ប៊ុនធឿន ដែលជានាយកសាលា … ខ្ញុំព្រះករុណាខ្ញុំ បានមកធ្វើការនៅឯ ខេត្តត្បូងឃ្មុំ ពេលព្រឹកសំណេះ​​សំណាលជាមួយមន្ត្រីរាជការ កងកម្លំាងប្រដាប់អាវុធ នៅខេត្តត្បូងឃ្មុំរួច ហើយ ក៏បង្ហួសមកបាយនៅឯ​​កំពង់ចាមយើងនេះ។ ដល់ទៅអ្នកចំការលើគេបង្ហោះហ្វេសប៊ុកមួយ អំពី បញ្ហាសាលានៅចំការលើនោះ ក៏ទៅ​សាលា​នៅឯចំការលើនោះ។ ស្រាប់តែបង្ហោះហ្វេសប៊ុកឯងនោះមួយ ទៀត។ លោក ឈឹម ប៊ុនធឿន នាយក​សា​លា​នេះ ក៏បានធ្វើការ Comment ចូលថា សូមសម្តេចមកមើល សាលា អគារចាស់នៅអនុវិទ្យាល័យ បឹងកុក ផង។ … បើកមើលការ Comment ​ក៏ប្រទះ​ឃើញលោក ឈឹម ប៊ុនធឿន ថា សូមសម្តេចមកមើលសាលាបឹងកុកផង។ ចុះពីលើផ្ទះមកអត់ឲ្យពី​ណា​ដឹង​ទេ ប្រាប់ថា​ទៅ​សាលាបឹងកុក គេមិននំាទៅសាលាបឹងកុក ទៅសាលាពុទ្ធិក​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ ដល់ទៅដល់នៅឯណា សាលា​បឹង​កុក​នៅ​ឯណា? នេះសាលាពុទ្ធិកទេតើ! ត្រឡប់មកក្រោយវិញ។

អរគុណ​ណាស់​ លោក​គ្រូ អ្នកគ្រូ លោកនាយកសាលា តាមរយៈការ Comment នេះ ដែលធ្វើ​ឲ្យខ្ញុំ​បាន​មក​ដល់ទីនេះ។ ហើយ​​​គួរ​អោយភ័យខ្លាចមែន។ បានជា មាតាបិតា អាណាព្យាបាល សិស្សានុសិស្សនៅទី​នេះបារម្ភចំពោះ​កូនចៅរបស់ខ្លួន ដែលមានអគារសិក្សាចំណាស់ សឹងតែថាអាយុជិតស្មើនឹងខ្ញុំទៅ​ហើយ​។ នៅពេលមកដល់នោះ រកលោក ប៊ុនធឿន ប្រហែលជា Comment រួចហើយទុកចោល អត់បើក​មើលខ្ញុំវ៉ៃត្រឡប់មកវិញ។ ខ្ញុំថា “ខ្ញុំចេញដំណើរទៅហើយ”។ តែគាត់អត់បើកមើល។ ដល់ចូលមកដល់​ទី​នេះ ជួបអ្នកគ្រូលោកគ្រូមួយចំនួន បានទាក់ទងលោកសាស្ត្រាចារ្យ ប៊ុនធឿន ដូច​បានសញ្ញាបត្រ ពីខ្ញុំដល់​ទៅ​ពីរដង? ម្តងនៅសាកលវិទ្យាល័យភ្នំពេញ និងម្តងទៀតនៅវិទ្យាស្ថានជាតិអប់រំ សាស្ត្រា​ចារ្យ​​​បរិញ្ញាបូក​មួយ។ ថ្ងៃនេះ មានគម្រោងស្នើអីមកទៀត តាមពិតឲ្យសរសេរ​ឈ្មោះ គាត់ឲ្យវា​ច្បាស់មក …។

កោតសរសើចំពោះកងវិស្វកម្ម និងស្នើជួសជុលអគារជប៉ុន

ខ្ញុំព្រះកុរណាខ្ញុំ ពិតជាមានការរីករាយហើយ សូមកោតសរសើរ ចំពោះការខិតខំ(របស់)កងវិស្វកម្មសម្តេច តេជោ ដែល​បាន​ខិតខំទំាងយប់ទំាងថ្ងៃ ដែលធ្វើឲ្យអនុវិទ្យាល័យនេះបានកកើតជារូបរាង។ ថ្ងៃនោះ យើង បានមកសិក្សាដី​នេះ ហើយយើងរកវិធីបង្ខិតសាលាថយក្រោយ ដើម្បីទុកទីធ្លាខាងមុខនេះ បង្កើតជាតារាង ម្ខាងនេះដូចជាបាល់​បោះ ម្ខាងនោះបាល់ទះ ហើយបូកជាមួយនឹងទីចាត់ការខាងនោះមួយខ្នង។ ឯនៅខាង នេះ បើសិនជាកុំអគារ​របស់​ជប៉ុនទេ កុំអីខ្ញុំវ៉ៃចោលហើយ។ ប៉ុន្តែ វ៉ៃចោលរបស់ជប៉ុនវាអាក្រក់មើល ការពិត អគាររបស់​ជប៉ុន​នេះ​វាចាស់មែនទែនហើយ។ ស្នើសុំជួសជុលពិដានការ៉ូរបស់អគារចាស់នេះ។ កាលដែល យើងជួសជុលលាបថ្នំាខាង​ក្រៅ ដល់ឥឡូវឮថា អាហ្នឹងដូចជាមួយជាន់ទេ ព្រោះដីនៅក្នុងទីក្រុងឥឡូវថ្លៃ​ណាស់។ … ដីយើងមានតែប៉ុណ្ណឹង ខ្ញុំចង់ថែមលើសហ្នឹង ក៏ប៉ុន្តែវាមានតែប៉ុណ្ណឹងដីនោះ។ ថ្ងៃនោះ​ យើង​បានមក​សិក្សា​ជាមួយគ្នាហើយ ធ្វើប៉ុនណាល្មមអីល្មម ប៉ុន្តែយើងឥឡូវនេះ … និយាយរួម ផ្លាស់ប្តូរ​អគារ​ចាស់​ទៅកាន់អគារថ្មី ហើយអគារនេះវាសមរម្យនៅក្នុងទី​ក្រុង​របស់​យើង​នេះ។ បូកបន្ថែមដោយថា នៅ​សេសសល់អគារមួយចំនួនផ្សេងទៀតនៅសាលាគរុកោសល្យភូមិភាគ។

សម្តេចតេជោ ហ៊ុន សែន ក៏ដូចជា គណបក្សប្រជាជន បាននំាប្រទេសកម្ពុជាផ្លាស់ប្តូរជាបន្តបន្ទាប់

យើងនឹងបន្តធ្វើជាបន្តបន្ទាប់ ហើយបាននំាប្រទេសរបស់យើងផ្តាស់ប្តូរជាបន្ត​បន្ទាប់ មិន​ចំា​បាច់អ្នកណា និយាយផ្លាស់ប្តូរៗទេ គឺ ហ៊ុន សែន ក៏ដូចជា គណបក្សប្រជាជន បាននំាប្រទេស​នេះ​ផ្លាស់​ប្តូរ​ជា​បន្តបន្ទាប់ តំាងពីផ្លាស់ប្តូរចេញពីរបបប្រល័យ​ពូជ​សាសន៍។ ផ្តល់ឲ្យប្រជាជនមានឱកាសរស់​រាន​មាន​ជីវិត តំាងពី មនុស្សជាង ៥ លាននាក់ ដល់ជាង ១៥ លាន​នាក់ទៅហើយ កើតច្រើនណាស់។ លោកយាយ លោក​តា ញាតិញោមអើយ! ទាំងគេទំាងខ្ញុំ កើតច្រើន​ណាស់។ បើកើតច្រើនម្លឹងៗ ​តម្រូវការ​របស់​យើង​ក្នុង​ការ​ដោះ​ស្រាយ​​ស្បៀង ក្នុងការដោះស្រាយការសិក្សា គឺមាន​ជា​បន្ត​បន្ទាប់ … យើងនាំការផ្លាស់ប្តូរមួយចេញ​ពីស្ថាន​ភាព​ដ៏​លំបាក ហើយជា​ពិសេស ក្នុងរបប ប៉ុល ពត និងក្នុងដំណាក់កាលមានសង្គ្រាម ពីទីក្រុងកំពង់ចាម​អត់​មានមនុស្សនៅ ទៅជាទីក្រុង​កំពង់ចាមដែលមានការអភិឌ្ឍ។ ឥឡូវ សាលារៀនត្រូវការបន្ថែមទៀត នៅ​អគារដែលមានច្រើនជាន់ ហើយកន្លែង​ខ្លះយើងក៏មានតម្រូវការសាងសង់បន្ថែមទៀត។

ខ្ញុំព្រះករុណាខ្ញុំ ពិតជាសូមអរគុណ លោកគ្រូ អ្នកគ្រូ សាស្ត្រាចារ្យ នៅទីនេះ ដែលបានរួមគ្នាពិគ្រោះយោ បល់​នៅថ្ងៃនោះ មិនភ្លេចទេ។ នៅពេលដែលយើងពិគ្រោះគ្នា មុនពេលដែលខ្ញុំចូលទៅប្រជុំ ប៉ុន្តែចេញពី ហ្នឹងទៅៗ ចូលសាលាគរុកោសល្យខេត្ត ទៅប្រជុំ ហើយទៅបាយជាមួយកុមារគថ្លង់។ នៅទីក្រុងកំពង់ចាម​របស់​យើងនេះ ខ្ញុំព្រះករុណាខ្ញុំ នឹងមកសាជាថ្មីម្តងទៀត។ ថ្ងៃនេះគិតថាមកដេក ប៉ុន្តែទាស់​ត្រង់ជាប់កម្មវិធី​នៅ​ភ្នំ​ពេញមួយទៀត ក៏ខានមកដេកទៅ។ រួចហើយគិតស្មាន ទៅមើលដំណាំមួយចំនួន ឬក៏ចូល​ផ្សារ ប៉ុន្តែ​ឥឡូវត្រូវអាក់ខាន។ ហេតុតែពាក់អាវធំមក ត្រូវហោះចេញពីហ្នឹង ដើម្បីទៅប្រជុំគណបក្សនៅទីនេះ ហើយ​ត្រូវ​ហោះទៅបាយថ្ងៃត្រង់នៅសៀមរាប ហើយប្រជុំនៅសៀមរាប។ យប់បាយនៅសៀមរាប ព្រឹកឡើងថ្លែង​សុន្ទរកថានៅសៀមរាប ហើយហោះមកបាយនៅភ្នំពេញ ល្ងាចជួបអ្នកការទូត។ រឿងវាអញ្ចឹង។ អញ្ចឹងបាន​ថា ​ហេតុអីគេចង់ធ្វើជានាយករដ្ឋមន្ត្រី? ដណ្តើមពី ហ៊ុន សែន សម្បើមម្ល៉េះ? បើរវល់ម្លឹងៗ ប៉ុន្តែ ក្រែងលោ​អ្នកដែល​មិន​មែន ហ៊ុន សែន ធ្វើ(បាន)ដូច ហ៊ុន សែន ហ្អី? អាហ្នឹងច្បាស់ហើយ ព្រោះទម្លាប់​របស់​គេ​ខុស​ពី ហ៊ុន សែន។ មនុស្សម្នាក់ៗមានទម្លាប់មិនដូចគ្នាទេ។

ដោះស្រាយសំណូមពរ

ថ្ងៃនេះ ជាមួយនឹងការប្រគល់សាលាដែលមានទីតាំងច្រើន ខ្ញុំក៏សូមដោះស្រាយ(សំណូមពរ) លោកគ្រូ នាយក បានសុំឲ្យជួយជួសជុលពិដានប៉ារ៉ូរបស់អគារចាស់ ហើយសុំកុំព្យូទ័រ ២០ គ្រឿង សម្រាប់បង្រៀន សិស្ស និងម៉ាស៊ីនដេរ ៥០ គ្រឿង ប៉ុន្តែថ្ងៃនេះ ខ្ញុំបាននាំមកសម្រាប់ការធ្វើការរបស់​សាលា មានកុំព្យូទ័រ ១០ គ្រឿង, ព្រីនធ័រ ៥ គ្រឿង, ម៉ាស៊ីនថតចម្លង ១ គ្រឿង សម្រាប់ការងារ។ អញ្ចឹង​ សម្រាប់​ការ​បង្រៀន​សិស្ស កុំព្យូទ័រ ២០ គ្រឿង និងម៉ាស៊ីនដេរ ៥០ គ្រឿង សូមជូនតាមសំណូមពរចុះ។ អម្បាញ់មិញ​ពិភាក្សា​គ្នាថា ដាក់នៅត្រង់ណាសម្រាប់ម៉ាស៊ីនដេរ? ប៉ុន្តែ នៅខាងលើមានសាលសហសិក្សា យើងអាចដាក់​ម៉ា​ស៊ីនកាត់ដេរ និងកុំព្យូទ័រខាងលើបាន ក្រែងលោកនាយកគ្រោងអញ្ចឹងឬ? វាគ្រាន់បើជាង(ដាក់)នៅអគារ​ទ្រុឌទ្រោមរបស់យើងដែលគួរឲ្យខ្លាច។ សាលាដែលគួរឲ្យខ្លាចហ្នឹងការបាក់ គឺសាលាបឹងកុកនេះមួយ និង​សាលានៅទីរួមខេត្តក្រចេះ។ សាលានេះគួរអោយខ្លាចមែន បើសិនជាកុំមើលទាន់ ប្រហែលជាពេលណា មួយ​គ្រោះថ្នាក់ដោយសារតែបាក់ ព្រោះអាយុកាលរបស់វាល្មមដល់ពេល​បាក់។ (រួមទាំង)ដោយ(គ្មាន)ការ​ជួស​ជុលថែទាំផងទេ។ ប៉ុន្តែ នៅខេត្តក្រចេះ ឯកឧត្តម ស ចំរុង ម្សិលមិញយើងបានជួបគ្នា គួរតែដំឡើង​អនុ​វិទ្យាល័យទៅជាវិទ្យាល័យ។ អានោះវាធំជាងអានេះ ៣ ដង។ ដីកណ្តាលក្រុងវាថ្លៃ។ រាងជាអក្សរអ៊ុយ ប្រមាណជា ៤៨​ បន្ទប់ …។

បំផុសយុវជនឲ្យលេងកីឡា និងចៀសឲ្យឆ្ងាយពីគ្រឿងញៀន

ម្យ៉ាងទៀតចុះឧទ្ធម្ភាគចក្រអម្បាញ់មិញ ហេតុអីក៏កំពង់ចាមយើងយ៉ាប់ដល់ប៉ុណ្ណឹង? អាតារាងបាល់​នេះ​ មកពីចាហ្វាយខេត្តអត់ចេះទាត់បាល់? ឥឡូវ មិនបាច់ចាំអ្នកណាធ្វើទេ វិស្វកម្មតេជោចូលធ្វើភ្លាមតារាង ទាត់​បាល់នៅកំពង់ចាម ព្រោះចុះមកអម្បាញ់មិញសូម្បីស្បែកជើងខ្ញុំក៏ប្រឡាក់ដែរ។ ខេត្តនេះមិនគួរអន់ ដល់ម្ល៉ឹង។ ខេត្ត​ស្វាយរៀងគេធ្វើម្ចាស់ការប្រកួតទាត់បាល់ទាំងយប់បាន ហើយឯងខេត្តកំពង់ចាម ខេត្តល្បី ឈ្មោះ ខេត្ត​ស្រុក​កំណើតរបស់នាយករដ្ឋមន្ត្រី ចុះមកយ៉ាប់បណ្តោយ? អន់ជាងស្វាយរៀង។ ឥឡូវ រៀបចំ ឲ្យស្អាត ដាក់ភ្លើង​ដាក់អី វិស្វកម្មតេជោធ្វើតែម្តង។ អាហ្នឹងវាមិនច្រឡំឯកជនមិនឯកជនទេ ព្រោះរបស់ យើងធ្វើតើ! បើមានលុយ​ចូលរួមទៅ(ដាក់បង្គោលភ្លើង) ចូលបានប៉ុន្មានយកប៉ុណ្ណឹង។ ឥឡូវធ្វើម៉េច​ឲ្យ​កំ​ពង់ចាម ​ក្លាយជា​កន្លែងទាត់បាល់ភូមិភាគមួយឲ្យវាស្កឹមស្កៃមើល? កន្លែងជម្រើសជាតិប្រកួត កីឡាហែល​ទឹក​មាននៅទីនេះ​ស្រាប់ហើយ ទល់ខ្នងគ្នានឹងទៅអាខាងបាល់ទាត់។

ខាងជើងគោកយ៉ាប់តែម្តង ទៅជាពូកែជើងទឹក។ បើអញ្ចឹងវិស្វកម្មតេជោ ដែលកំពុងធ្វើនៅហ្នឹងស្រាប់ បុក​អា​ហ្នឹងមួយឲ្យវាស្អាត … កំពុងខ្វះហើយ បានឲ្យធ្វើអាហ្នឹង។ គេទើបឲ្យពានរង្វាន់អូឡាំពិកថ្មីៗ។ បំផុស​លេង​កី​ឡា។ ក្មួយៗ ចៅៗ លេងកីឡា កុំប្រព្រឹត្តគ្រឿងញៀន កុំដើរអីផ្តេសផ្តាស។ ក្នុងនេះមានបាល់ទាត់ បាល់បោះ បាល់ទះ ដល់បាល់ទាត់ យើងទៅលេងក្រៅ។ នាំគ្នាលេងអាហ្នឹង ប៉ុន្តែ តាមស្រុកតាម​អីគេ​មាន​តា​រាងគួរសម វាអន់តារាងសាលាខេត្ត។ ឮថាមានការខុសគ្នា ខ្លាចច្រឡំអីអញ្ចេះអញ្ចុះ។ មិនច្រឡំ​ទេ។ តេ​ជោ​ចូលធ្វើហើយ គឺថា​មិនច្រឡំទេ។ ប៉ុន្តែ កំពង់ចាមមិនដែលឈ្នះអីទេ។ បើទូកង អាហ្នឹងបានអាចៅពេជ្រ​កុមារ​ជ្រោយថ្ម។ បទុមបុប្ផាឆ្នាំនេះបាក់តែម្តង។ ដល់ពេលបាល់ទះ បាល់ទាត់ដូចជាអត់មាន។

នឹងមានការចែកចាយសៀវភៅរបស់ ក្រម ង៉ុយ និងបណ្ឌិត អ៊ូ ចុង

ខ្ញុំព្រះករុណាខ្ញុំ អត់មានអីថែមប៉ុន្មានទេ ប៉ុន្តែមានការជូនដំណឹងមួយចំនួន។ ទី ១ នៅប៉ុន្មានថ្ងៃខាងមុខ នេះ ​នឹងមានការចែកជូននូវការប្រៀនប្រដៅរបស់ ក្រម ង៉ុយ ទៅតាមបណ្តាវិទ្យាល័យនៅទូទាំងប្រទេស ដែលខ្ញុំព្រះករុណាខ្ញុំ ឥឡូវកំពុងតែចូលរោងពុម្ព ព្រោះចូលរោងពុម្ពបាន ២ ពាន់ច្បាប់ហើយ ក្របរាងមិន សូវល្អ។ ម្សិលមិញចូលរោងពុម្ពហើយ។ អញ្ចឹងទេ គឺ ១ ម៉ឺន ៥ ពាន់ច្បាប់ ហ្នឹងបន្តក្នុងការចែកចាយ។ សូមឲ្យក្មួយៗ សិស្សានុសិស្ស សូម្បីតែលោកគ្រូ អ្នកគ្រូ ក៏គួរតែត្រូវអានដែរ។ ខ្ញុំព្រះករុណាខ្ញុំ មានខ្លួនឯង ២ ច្បាប់ របស់ ក្រម ង៉ុយ ផង របស់ បណ្ឌិត អ៊ូ ចុង ផង នៅជាប់នឹងក្បាលដំណេកហ្នឹង។ ត្រូវការមើលៗ ភ្លាម អត់ចាំបាច់វៃអ៊ីនធើណែតអីទេ ព្រោះជាច្បាប់ការអប់រំ។

រៀបចំផលិតឡើងវិញនូវសាស្ត្រាស្លឹករឹត ដែលជិតផុតពូជ

រឿងមួយដែល ខ្ញុំព្រះករុណាខ្ញុំ មានការព្រួយបារម្ភ ដែលវានឹងបាត់បង់ជីវិតរបស់វាទៅហើយនោះ បែរជា ចាប់កំណើតឡើងវិញ ដោយថ្ងៃអាទិត្យ ម្សិលម្ង៉ៃនេះ គឺ CNC បានផលិតនូវខ្សែភាពយន្តជីវិត។ អញ្ចឹង គឺ​ទាក់ទិនជាមួយនឹងជីវិតរបស់អ្នកផលិតនូវសាស្ត្រាស្លឹករឹតនេះឯង។ អញ្ចឹងទេ ក៏ហៅទូរស័ព្ទឲ្យ កេង សាមេត មើល។ អញ្ចឹង អ្នកហ្នឹងនៅសៀមរាបតែម្តង។ ល្ងាចនេះ ខ្ញុំព្រះករុណាខ្ញុំ ទៅសៀមរាប រៀបចំឲ្យ គាត់ ផលិត​ឡើង​វិញ ព្រោះកន្លងទៅអត់មានទីផ្សារ។ ចង់ដាច់ពូជហើយ។ ខ្ញុំព្រះករុណាខ្ញុំ តែងតែខ្ចីពីវត្ត ប្រើស​ នៅបា​ធាយ យកទៅអាន។ ដូចជាសុបិន្តកុមារស្អីៗ យកទៅអានមួយចំនួនទៅ។ ប៉ុន្តែ​ យើងថែទាំ បានតែរបស់​ចាស់​ទេ តែផលិតថ្មី គឺអត់មាន។ ដូច្នេះ យើងបានរកឃើញជាមួយនឹង​អ្នកដែលបាន​ផលិត​សាស្ត្រា​ស្លឹក​រឹក​នេះ។ គាត់ចារឲ្យមើល។ ជាស្រ្តីទេ ក៏ប៉ុន្តែ គាត់មានកូនសិស្សគាត់មួយចំនួនទៀត។ ច្បាប់ ល្បើកថ្មីនេះ អ្នកព្រះភិរម្យ ភាសាអ៊ូខ្ញុំ បង្គំនឹកគុណ ព្រះពុទ្ធព្រះធម៌ ព្រះសង្ឃជាមុន គុណគាប់មហាធ្ងន់ មាតាបិតា ឧបឈាជាធំ កាលចាប់ដៃខ្ញុំ ឲ្យកោរកេសា … ដូច្នេះ យើងថ្ងៃក្រោយបើទោះបីថា អានឬមិន អាន គួរតែ​ដាក់​ជា​ការកំណត់មួយថា ​ធ្វើម៉េចឲ្យស្គាល់របស់ខ្មែរ។ ខ្មែរពីដើមប្រើយ៉ាងម៉េច? ឥឡូវទាន់នៅ មានអ្នកហ្នឹង ថាគាត់ផលិតបានប៉ុន្មាន គឺយើងទិញយកទាំងអស់។ ពីដើមថ្លៃមួយ ឥឡូវឲ្យថ្លៃពីរ ឬថ្លៃបី ប៉ុន្តែ ល្ងាចនេះ យើង​ចាប់ពិភាក្សាជាមួយគាត់ផ្ទាល់តែម្តង តើមួយសៀវភៅរបស់ ក្រម ង៉ុយ, របស់បណ្ឌិត អ៊ូ ចុង។ អញ្ចឹង យើងត្រូវធ្វើប៉ុន្មានច្បាប់? ហើយមួយច្បាប់មានប៉ុន្មានទំព័រ? មានប៉ុន្មានសន្លឹក? ប៉ុន្តែ ធ្វើទាំងសងខាង។ នេះជាការគិតគូរមួយ ដើម្បីថែទាំទំនៀមទម្លាប់ខ្មែររបស់យើង ដែលស្ទើរតែបាត់បង់  ហើយបាត់បង់ជាង​គេ​ជំ​នាន់ ប៉ុល ពត … ឥឡូវមានអ្នកផលិតហើយ មិនគួរត្រូវឲ្យបាត់បង់បន្ថែមទេ …។

ដំឡើងបៀវត្សរ៍ជូន គ្រូបង្រៀន មន្ត្រីរាជការ កងកម្លាំងប្រដាប់អាវុធ នៅមុនចូលឆ្នាំខ្មែរ

ឯមួយទៀត ក៏សូមជម្រាបជូន លោកគ្រូ អ្នកគ្រូ ឲ្យបានជ្រាបដែរ ប្រាក់ខែបានឡើងមួយដំណាក់ហើយ រំកិល​វាបន្តិច មិនត្រឹមតែលោកគ្រូ អ្នកគ្រូទេ ទាំងមន្ត្រីរាជការនៅទូទាំងប្រទេស កងកម្លាំងប្រដាប់អាវុធ នៅ​ទូទាំងប្រទេស នៅបាំងតែមួយខែទៀតទេ ប្រាក់ខែឡើងហើយ ហើយឡើងហ្នឹងបើកមុនចូលឆ្នាំទៀត។ គ្រូ​បង្រៀន និងគ្រូពេទ្យ ដែល(ប្រាក់ខែ)ទាបបំផុត គឺជាង ៩៥ ម៉ឺនរៀល អាហ្នឹងប្រាក់អប្បបរមា នៅបន្ថែម ប្រាក់តំបន់អីរបស់គេដែលមាន ៨ ម៉ឺន(រៀល), ១០ ម៉ឺន(រៀល) និង​ ១២ ម៉ឺន(រៀល) ប្រាក់តំបន់នៅឆ្ងាយៗ ដូ​ច្នេះ អ្នកទាំងនោះប្រាក់ខែសុទ្ធតែលើសពី ១ លាន(រៀល)។ រឿងមួយទៀត ក៏សុំជូនដំណឹងដែរ ដើម្បីឲ្យ​ឃើញ​ថា ការគិតមួយថ្ងៃៗ មិនមែនរឿងលេងរឿងសើចទេ អ្នកខ្លះគិតដូចជាស្រួលណាស់ ហើយសន្យា​នោះគឺសន្យាពេកហើយ។ ពេលចូលឆ្នាំខ្មែរនេះ ត្រូវឧបត្ថម្ភម្នាក់តែ ៥ ម៉ឺនរៀលទេ លើប្រាក់ខែ​ដែលទើប​នឹង​ឡើង​ ប៉ុន្តែ គ្រាន់តែ ៥ ម៉ឺនរៀល ក្នុងម្នាក់ ត្រូវការ ៣០ ​ពាន់លានរៀល។ ឆ្នាំទៅឧបត្ថម្ភម្នាក់បាន ៤ ម៉ឺន​(រៀល) សម្រាប់ចូលឆ្នាំ។ ឆ្នាំនេះ ទ​ន្ទឹមនឹងឡើងប្រាក់ខែ ថែមឧបត្ថម្ភបាន ៥ ម៉ឺន(រៀល)ទៀត ដើម្បីឲ្យបាន​ចូល​ឆ្នាំ។

គ្រាន់តែឧបត្ថម្ភម្នាក់ ៥ ម៉ឺនរៀល ត្រូវការលុយ ប្រមាណ ៣០​ ពាន់លាន(រៀល) ដូចជាប្រហែលជាង ៧ លាន​ដុល្លារ(អាមេរិក) ចុះទម្រាំអ្នកខ្លះទៅសន្យាថា អាយុ ៦០ (ឆ្នាំ) ឡើង ឲ្យលុយប៉ុណ្ណេះ លុយប៉ុណ្ណោះ មួយ​នគរប្រហែលជា ២ លាននាក់ វាមិនស្លាប់ទៅ​ហើយ? … បងប្អូនសួរថា ម៉េចមិនឡើងពីខែ មករា(មក) ឲ្យវាតែមួយតង់ ម៉េចចាំបាច់ឡើងពីរតង់? ការបញ្ចេញសាច់ប្រាក់ត្រូវមានក្រឹត្យក្រមរបស់វា។ ឥឡូវ​ អត្រា​ប្តូរ​ប្រាក់នៅ ៤.០១០ (រៀលប្លាយ/១ ដុល្លារ)។ អញ្ចឹងទេ យើងធានាថា នៅពេលដែលយើង​បញ្ចេញ​សាច់​ប្រាក់​ដ៏ធំនៅមុនចូលឆ្នាំខ្មែរ និងមិនមានប្រាក់រៀលចុះថ្លៃទេ។ អាហ្នឹងយើងសង្ឃឹមយ៉ាងដូច្នេះ។ បញ្ចេញ​ទៅ គឺគាត់ចាយ ដល់គាត់ចាយ​ អាលុយហ្នឹង វាវិលត្រឡប់មកវិញក្នុងការដែលយើងប្រមូលចំណូល។ ដល់​ទៅពេល ខែ ឧសភា យើងមិនអាចដល់អាទិត្យទី ៤ ទេ បានបើកបៀវត្សរ៍ទេ តែអាទិត្យទី​ ៣ បើកបៀ​វត្សរ៍​ហើយ ដើម្បីកុំឲ្យវាឃ្លាតគ្នាពេក ព្រោះបើកមុនចូលឆ្នាំយកទៅចាយអស់ហើយ។ ត្រូវគិតដល់ប៉ុណ្ណឹង មិនមែនគិតទៅតាមរបៀបខ្យល់ …។ យើងធ្លាប់បានរួមរស់ជាមួយគ្នាតាំងពីក្រលំបាកវេទនាខ្លាំងណាស់ លោកតា លោកយាយ មកថ្ងៃនេះ ការពិតទៅព្រះជន្មមិនជាច្រើនជាងខ្ញុំប៉ុន្មានទេ ខ្លះត្រឹមតែជាង ៧០(ឆ្នាំ) ទេ ខ្ញុំជាង ៦០(ឆ្នាំ) ដែរ ប៉ុន្តែ កាលដែលយើងរំដោះនោះ សុទ្ធតែនៅក្មេងៗតើ! នៅជំនាន់នោះមាន​ស្លៀក​ស​ពាក់​សឯណា? ទើបតែស្លៀកសពាក់សជំនាន់ហ្នឹង …។

ការរៀបចំកែលម្អតារាងបាល់ទាត់ខេត្តឡើងវិញ

ប៉ុន្តែយ៉ាងណាក៏ដោយ មកថ្ងៃនេះ ក៏មិនអត់ប្រយោជន៍ … បានសេចក្តីថា ដោះស្រាយបញ្ហានេះបន្ថែម បូក​ជា​មួយនឹងធ្វើតារាងបាល់មួយ។ … សួរ Pilot ថាយើងទៅចុះនៅត្រង់ណា? ថាចុះ(នៅ)តារាងបាល់ គិត​ស្មាន​ថាតារាងបាល់កំពង់ចាមស្អាតណាស់។ ម៉ែអើយ! ភក់សុទ្ធ។ ឥឡូវ សូមស្តារវាឲ្យស្អាត។ រៀបចំឲ្យ​វា​ស្អាត​ទៅ ហើយស្តង់ដារប្រធានសហព័ន្ធកីឡាបាល់ទាត់នៅត្រង់នេះស្រាប់ហើយ។ យើងដឹងតែធ្វើតាម​ក្បួន​តាមខ្នាត។ ធ្វើឲ្យវាស្អាតបន្តិចទៅ។ នាំគ្នាទាត់ទៅ​ ហើយដាក់ភ្លើងទាត់(ពេល)យប់ទៀត ជួនកាលគេ​ទាត់ថ្ងៃមួយក្រុមទៅ។ ម៉ោង ៣ ឬ ៣ កន្លះអី គេទាត់មួយក្រុមទៅ។ ដល់ពេលយប់ម៉ោង ៧ គេទាត់មួយ​ក្រុម​ទៀតទៅ។ យើងធ្វើតែតារាង ហើយនិងកន្លែងអង្គុយ។ ឯកន្លែងសហព័ន្ធ គឺអ្នកចេញ​បង្គោលភ្លើង​សម្រាប់​ទាត់យប់។ ចែកគ្នាចេញឲ្យដាច់អញ្ចឹងទៅ។ ខ្ញុំអ្នកជួយខាងផ្នែកតារាង និងអាកន្លែងអង្គុយកន្លែង​អីនោះ។ ហើយខាងណោះគេធ្វើសម្រាប់អាទាត់យប់ ព្រោះឥឡូវគេមានទាត់យប់។

កម្ពុជាពីស្ថានភាពដ៏លំបាកលំបិន បានផ្លាស់ប្តូរមកកាន់ស្ថានភាពមួយដែលល្អប្រសើរជាងមុន

ហើយខ្ញុំព្រះករុណាខ្ញុំ អរព្រះគុណចំពោះព្រះតេជព្រះគុណ ដែលបាននិមន្តចូលរួមក្នុងពិធីសម្ពោធ និង ប្រគល់សាលាជូន ចំពោះលោកគ្រូ អ្នកគ្រូ សិស្សានុសិស្ស និងមាតាបិតា អាណាព្យាបាល ដែលនៅជុំវិញ ទីនេះ។ អរគុណ ឯកឧត្តម លោកជំទាវ អស់លោក លោកស្រី ដែលបានអញ្ជើញចូលរួមជាមួយនឹង លោកគ្រូ អ្នកគ្រូ សិស្សានុសិស្ស នៅក្នុងទីរួមខេត្តកំពង់ចាមរបស់យើងនេះ។ ហើយសង្ឃឹមសាលានេះ នឹង ផ្តល់ជាផលប្រយោជន៍ដ៏ធំ​ សម្រាប់ការបណ្តុះបណ្តាលធនធានមនុស្ស ដែលកម្ពុជាសម័យនេះ គឺកម្ពុជា ដើរបានឆ្លងនូវចម្ងាយមួយដ៏វែង ពីស្ថានភាពដ៏លំបាកលំបិន បានផ្លាស់ប្តូរមកកាន់ស្ថានភាពមួយដែលល្អ ប្រសើរជាងមុន។ អម្បាញ់មិញនេះ ខ្ញុំព្រះករុណាខ្ញុំ ក៏បានហោះមើលពីលើ​ស្ពានឆ្លងកាត់ដៃទន្លេ ​ឆ្លងកាត់ ទៅកោះកំពង់ត្រុំ។ ហើយសង្ឃឹមថា ឆ្នាំនេះនឹងអាចមានលទ្ធភាព​ ​ដើម្បីឲ្យមានការឆ្លងកាត់បានខ្លះ សម្រាប់សិស្សានុសិស្ស ដែលជិះកង់ ជិះម៉ូតូអីជាដើម។

ឆ្នាំនេះអកុសលថែមទៀត ដោយសារនៅត្រង់ថា ទឹកវាស្រកយឺត ដល់ទឹកស្រកយឺត ពិបាកធ្វើ។ អញ្ចឹង អម្បាញ់មិញ ឃើញគាត់កាយ (និង)បូមខ្សាច់យកទៅចាក់ ដើម្បីទ្រសម្រាប់ការធ្វើ។ អញ្ចឹង នៅសល់តែ ប៉ុន្មានប្រឡោះទៀត ហើយនឹងអាចតភ្ជាប់ស្ពាននេះបាន ដើម្បីឆ្លងកាត់ទៅកោះកំពង់ត្រុំនេះ។ តើមានបាន គិតទេថា វាមានស្ពានគីហ្ស៊ូណានៅហ្នឹងទេ? បឹងកុករបស់យើងនេះ នៅតំបន់កំពង់ចាមរបស់យើង កន្លែង​នេះ គឺជាកន្លែងវ៉ៃប្រហារគ្នាធ្ងន់ណាស់។ ឆ្នាំ ១៩៧៣ ខែ សីហា ពេលនោះ ផ្លាស់ប្តូរ ស្រី យ៉ា ចេញពីចៅ​ហ្វាយ​ខេត្តកំពង់ចាម ដាក់ ស ហោ ចូលមកដល់ភ្លាម យកគ្រាប់បែកណាប៉ាល់(Napalm) ទម្លាក់​ផ្តាច់​ទំនប់បឹងកុក បង្ហូរទឹកចូលស្លាប់មនុស្ស ស្លាប់អីមិនតិចទេ។ បន្ទាប់ទៅទីក្រុងកំពង់ចាមនេះគ្មានមនុស្ស​នៅ​ទេ ប៉ុន្តែឥឡូវ ទីក្រុងកំពង់ចាមក្លាយទៅជាទីក្រុងមួយដូចគេដូចឯងដែរ។

សង្ឃឹមថា យើងនឹងបន្តធ្វើកិច្ចការងារនេះតទៅទៀត។ មិនទាន់ចប់ទេប៉ុណ្ណេះ មនុស្សមិនទាន់ស្កប់ទេ អាច​និយាយ​បានថា ទន្លេដប់មិនស្កប់សមុទ្រមួយទេ។ បំណងប្រាថ្នា និងសេចក្តីត្រូវការរបស់មនុស្សនៅតែ មាន។ ដូច្នេះ យើងយើងត្រូវតែមានការខិតខំ ដើម្បីនាំមកនូវការផ្លាស់ប្តូរជាវិជ្ជមាន សម្រាប់អនាគតរបស់ ប្រ​​ទេសកម្ពុជា ហើយការផ្លាស់ប្តូរនោះ គឺយើងបានធ្វើឲ្យមានការផ្លាស់ប្តូររួចស្រេចទៅហើយ និងបន្តឲ្យ មានការផ្លាស់ប្តូរតទៅទៀត រាប់ទាំងទីកន្លែងនេះកាលពីប៉ុន្មានខែមុន គឺអគារចាស់មួយដែលរៀបតែហ្នឹង បាក់ ប៉ុន្តែបានផ្លាស់ប្តូរទៅជាអគារថ្មីមួយដ៏ល្អ។

ការតភ្ជាប់បណ្តាញ/ការផ្គត់ផ្គង់អគ្គិសនីនៅតាមបណ្តាខេត្តមួយចំនួន

បន្តិចទៀត កន្លែងមួយចំនួនផ្សេងទៀតនឹងមានការផ្លាស់ប្តូរជាបន្ត រាប់ទាំងតារាងបាល់ទាត់កំពង់ចាមផង​ដែរ។ ភ្លើងរុញពីភ្នំពេញ។ ឥឡូវ កំពុងតខ្សែចេញពីកំពង់ចាម ភ្ជាប់ជាមួយក្រចេះ ភ្ជាប់ជាមួយ​ស្ទឹង​ត្រែង។ ខែ កញ្ញា នេះ នឹងបិទឲ្យដំណើរការទូប៊ីនមួយ ទម្លាក់ភ្លើងពីទន្លេសេសាន ពីស្ទឹងត្រែងមកក្រចេះ ពី​ក្រចេះ​មកកំពង់ចាម​ ហើយរុញពីកំពង់ចាមយើងទៅផ្គត់ផ្គង់ឲ្យភ្នំពេញវិញ ដោយសារនៅទន្លេសេសាន​ ២​ នោះ ដល់ទៅ ៤០០ មេហ្គាវ៉ាត់ឯណោះ។ អ្នកកំពង់ចាម អ្នកក្រចេះ មិនអាចប្រើអស់ទេ យកទៅប្រើនៅ​ភ្នំ​ពេញ ហើយអាចរុញមួយផ្នែកទៅកាន់ខេត្តដទៃទៀតផង។

ការចុះតម្លៃអគ្គិសនីថែមមួយកម្រិតទៀត

នេះគឺជាសេចក្តីត្រូវការ នៃការអភិវឌ្ឍប្រទេសមួយ។ ក្មេងបច្ចុប្បន្នលែងស្គាល់ហើយរបស់ដែលហៅថា ដុត​ចន្លុះនោះ មិនទាំងស្គាល់ចន្លុះនោះរបៀបណាផង? ចៅៗជានិស្សិតពេទ្យ ជាគ្រូបង្រៀននេះ អត់ស្គាល់ទេ? សិស្សគរុកោសល្យនេះអត់​ស្គាល់ចន្លុះយ៉ាងម៉េចទេ? បើគ្រូរបស់គ្រូ ឬក៏ជីដូនជីតា ត្រឹមតែឪពុកម្តាយ សិស្សា​នុសិស្សខ្លះ អត់ទាន់ស្គាល់ចន្លុះហ្នឹងយ៉ាងម៉េចទេ? បន្ទាប់មកសម័យដុតចង្កៀងប្រេងកាត តែឥឡូវ នេះ លែង(មាន)ចង្កៀងប្រេងកាត សូម្បីទូរស័ព្ទហ្នឹងក៏មានពិលដែរ។ រួចហើយតម្លៃភ្លើងក៏សុំជម្រាបជូនដែរ ថ្ងៃទី ១ ខែ មេសា ឆ្នាំ ២០១៧ នេះ ទន្ទឹមនឹងប្រាក់ខែឡើង ថ្លៃភ្លើងចុះ។ អ្នកដែលប្រើប្រាស់ ៥០ គីឡូវ៉ាត់​ចុះក្រោម តម្លៃ ៦១០ រៀល។ អ្នកដែលប្រើប្រាស់ ១០ គីឡូវ៉ាត់ចុះក្រោម តម្លៃ ៤៨០ រៀល។ អញ្ចឹង បើ​យើងពិនិត្យអ្នកដែលប្រើប្រាស់ ៥០ គីឡូវ៉ាត់ចុះក្រោម គឺមានគ្របដណ្តប់ប្រជាជនជាង ៧០ ភាគរយ នៃ​ចំនួនប្រជាពល(សរុប)។ អ្នកដែលមានចំណូលខ្ពស់ គេប្រើប្រាស់លើសពី ៥០ គីឡូវ៉ាត់ទៅ តែជាមួយនឹង បណ្តាញជាតិ ដែលឥឡូវប្រើប្រាស់ ៨០០ (រៀ) ឬ ៩០០ (រៀល) ឬ ១.០០០ (រៀល) ក៏នៅត្រឹមតែ ៧៧០ រៀលទេ។ ​

ហើយបើភ្ជាប់ជាមួយនឹងបណ្តាញរបស់ឯកជន គឺតម្លៃដូចគ្នា ដែលឯកជនយកភ្លើងរបស់រដ្ឋទៅប្រើ ដោយ​ប្រើ​បណ្តាញឯកជន ក៏នៅ ៤៨០ រៀលដែរ ប្រើក្រោម ១០ គីឡូវ៉ាត់ចុះក្រោម។ ៦១០​ រៀល ប្រើ ៥០ គីឡូ​វ៉ាត់​ចុះក្រោម ប៉ុន្តែ ដល់ទៅ ៥០ គីឡូវ៉ាត់ឡើងលើ គឺខុសត្រូវគ្នា ២០ រៀល។ ភ្ជាប់បណ្តាញជាតិទាំងស្រុង គឺ ៧៧០ (រៀល) និងភ្ជាប់ជាមួយបណ្តាញឯកជន ៧៩០ (រៀល) ដូច្នេះខុសត្រូវគ្នាបន្តិច ប៉ុន្តែ ដាច់​ដោយ​ឡែក​ ចំពោះកន្លែងណាដែលមិនទាន់ភ្ជាប់ អាហ្នឹងគឺជាតម្លែឯកជន ដែលអាជ្ញាធរអគ្គិសនីកំពុងធ្វើការ​ជាមួយ​អ្នកទាំងនោះ ដោយសារតម្លៃប្រេងក៏មានការធ្លាក់ចុះ គេក៏គួរតែទម្លាក់ថ្លៃភ្លើងចុះផងដែរ ឲ្យទាប​បន្តិច ហើយយើងក៏កំពុងប្រឹងប្រែង ដើម្បីរកថវិកាជម្រុញការតភ្ជាប់អគ្គិសនីទៅឲ្យប្រជាជនប្រើប្រាស់។

ភាពខុសគ្នា​ រវាងអ្នកសន្យា និងអ្នកធ្វើ

បន្តិចទៀតដល់ពេលវេលាគេដេញថ្លៃហើយ ដេញថ្លៃយ៉ាងម៉េច? ប្រាក់ខែយើងឡើងត្រឹមតែ ៩៥ ម៉ឺនរៀល ទេ បូកនឹងអត្ថប្រយោជន៍ដទៃទៀត ដូចជាប្រាក់តំបន់​ អាចបានលើស ១ លាន(រៀល)។ បន្តិចទៀតគេនឹង មកសន្យាថានឹងឲ្យ ៣ លាន(រៀល)។ អគ្គិសនីគេសន្យាថា ១ គីឡូវ៉ាត់ ២០០ (រៀល)។ ហើយនៅសន្យា ដទៃទៀត ចាស់ៗឲ្យ ៥ ម៉ឺន(រៀល), ២០ ម៉ឺន(រៀល), ៣០ ម៉ឺន(រៀល) ដេញថ្លៃគ្នាព្រាត។ លោកយាយ លោកតាអើយ! យកអាពិតទៅ អាមាននៅក្នុងដៃមិនពិបាករត់ ប្រយ័ត្នមែនទែនអាសន្យាហើយស្រាប់តែ អន្តរាយដល់ជីវិត ប្រទេសច្របូកច្របល់។ ចាំបានទេ? ដូរពី សម្តេចព្រះ នរោត្តម សីហនុ ព្រះបរម​រតន​កោដ្ឋ ទៅកាន់ លន់ នល់​ សង្គ្រាមផ្ទុះភឹង។ ​ស្លាប់អស់មនុស្សប៉ុន្មាន? កើតមានរបប ប៉ុល ពត សង្គ្រាម ល្មម​តែបញ្ចប់បាន។ ពីមុនមាន ហ៊ុន សែន សម្រាប់បញ្ចប់ ប៉ុន្តែឥឡូវអត់មាន ហ៊ុន សែន បញ្ចប់ទេ ព្រោះ​ចាស់​ដែរហើយ។ គ្មានកម្លាំងឯណាទៅធ្វើទៀត(ទេ)។ និយាយគ្នាមិនស្តាប់ ឲ្យសាកល្បងរសជាតិ​ហ្នឹង​ទៀត​ទៅ។ ប៉ុន្តែមិនទុកដល់ថ្នាក់ប៉ុណ្ណឹងពេកទេ។

ដោយតម្លៃណាក៏ដោយ អ្នកត្រូវយល់ឲ្យបានថា សន្តិភាពនេះពិបាករកណាស់ ទម្រាំរកបានប្រើមនុស្សរាប់​ជំ​នាន់ ហើយស្លាប់មនុស្សអស់ច្រើនណាស់។ ជំនាន់អាមេរិកកាំងអស់មនុស្សជិតកន្លះលាននាក់ ដែល​ស្លាប់ របួស និងពិការ។ ជំនាន់ ប៉ុល ពត ៣ លាននាក់(ស្លាប់)។ ទម្រាំមានសន្តិភាពប៉ុណ្ណេះ មិនមែន​ឲ្យ​អ្នក​បំផ្លាញលេងៗទេ។ មើលនៅប្រទេសលីប៊ី, ស៊ីរី, អឺរ៉ាក់ លទ្ធផលបានមកស្អី? គឺការស្លាប់រាល់ថ្ងៃ។​ ហ្នឹង​ហើយ​ការសន្យា។ ចង់សម្លាប់ សាដាម ហ៊ូសេន មួយ ​តើបានកើត សាដាម ហ៊ូសេន ប៉ុន្មាន ហើយនៅ​ទូទាំង​ប្រទេសអឺរ៉ាក់? ចង់សម្លាប់ ហ្កាដាហ្វី មួយ​ តើកើត ហ្កាដាហ្វី ប៉ុន្មាន? ហើយស្លាប់មនុស្សអស់​ប៉ុន្មាន? ចង់ផ្តួលរបប អាសាដ មួយ តើឥឡូវប្រជាជនស៊ីរីស្លាប់ប៉ុន្មាន? ឥឡូវ ចង់សម្លាប់ ហ៊ុន សែន មួយ ចង់​ផ្តួល ហ៊ុន សែន មួយ តើនឹងមានស្អីនោពេលខាងមុខ? នេះជាសញ្ញាសួរមួយ … បើមួយថ្ងៃៗ អង្គុយ​ញេញ​ធ្មេញ​ចាំតែថា ឲ្យតែព្រឹប អញរឹតពីអ្នកមានឲ្យអ្នកក្រ។ អាហ្នឹង អាពត​ សុទ្ធហើយ។ មានស្អីទៀត។

គរុកោសល្យនៅខេត្តកំពង់ចាមនៅពេលខាងមុខឈានទៅដល់ ១២+៤

លោកគ្រូ អ្នកគ្រូ សាស្ត្រាចារ្យ ទាំងឡាយកុំភ្លេចឲ្យសោះ គេបានថា​ សញ្ញាបត្រក្នុងប្រទេសខ្មែរយើងអត់ មានតម្លៃទេ ប៉ុន្តែ​ គេបង្អាប់យ៉ាងម៉េចក៏ដោយ យើងមានកូនសិស្សរៀននៅសាលារបស់យើងត្រឹមត្រូវ។ ឥឡូវនេះ យើងមានស្តង់ដានៃសិស្សតទៅទៀត។ ខាងមុខប្រហែលជានៅខេត្តកំពង់ចាមនេះ គរុកោសល្យ​មិនមែន​ ១២+២ ទៀតទេ និងឈានទៅដល់​ ១២+៤ ដើម្បីឲ្យគុណគ្រូកាន់តែខ្ពស់ទៅៗ។ ចំណុចនេះ​ ជាចំ ណុចសំខាន់ ហើយសិស្សានុស្សិសរបស់យើងរហូតទៅដល់ជាង ៣ លានកន្លះ មិនមែនតិចទេ ដើម្បីធ្វើ កិច្ចការងារមួយនេះ។ ហើយខ្ញុំព្រះករុណាខ្ញុំ ប៉ុណ្ណឹងទៅចុះ។ បន្តិចទៀត ទៅស្រោចទឹកឲ្យចៅហ្វាយខេត្ត ចៅ​ហ្វាយស្រុកអីជាដើម ។ល។ រួចហើយបន្ទាប់ពីហ្នឹងទៅស៊ីបាយទេ …

ចុងបញ្ចប់ ជាមួយនឹងការ​ប្រ​កាស​សម្ពោធដាក់អោយប្រើប្រាស់ នូវវិទ្យាល័យនៅបឹងកុករបស់យើងនេះ ដែលមានអគារថ្មីថ្មោងទើប​នឹង​សាង​សង់ ខ្ញុំព្រះករុណាខ្ញុំ​ សូមប្រគេនពរ ចំពោះព្រះតេជព្រះគុណ ព្រះសង្ឃគ្រប់ព្រះអង្គ ជូនពរចំពោះ ឯកឧត្តម លោកជំទាវ អស់លោក លោកស្រី បងប្អូនជនរួមជាតិ ជាពិសេស លោកគ្រូ អ្នកគ្រូ និស្សិត សិស្សានុសិស្ស សូមប្រកបដោយពុទ្ធពរទាំងបួនប្រការ៖​ អាយុ វណ្ណៈ សុខៈ​ ពលៈ កុំបីឃ្លៀងឃ្លាត​ឡើយ៕

ពត៌មានទាក់ទង

ពត៌មានផ្សេងៗ