ប្រសាសន៍​សំខាន់​ៗរបស់​សម្តេច​តេជោ ហ៊ុន សែន ថ្លែងក្នុង​ពិធី​អបអរ​សាទរ ទិវាជាតិទីក្រុង​ស្អាត​ឆ្នាំ​២០១៧ ក្រោមប្រធាន​ប​ទ «ទីក្រុង​ស្អាត៖ ទីក្រុងផ្តល់​ភាពកក់​ក្តៅដល់​ប្រជា​ពលរដ្ឋ និងភ្ញៀ​វទេសចរ»

នៅព្រឹកថ្ងៃទី២៧ ខែកុម្ភៈ ឆ្នាំ២០១៧នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា អញ្ជើញ​ជា​អធិ​បតី​ភាព​ប្រារព្ធទិវាជាតិ ទីក្រុងស្អាត លើកទី៥ ឆ្នាំ២០១៧ ក្រោមប្រធានបទ ទីក្រុង​ស្អាត​ផ្តល់​ភាព​កក់​ក្តៅ​ដល់​ប្រជាពលរដ្ឋ និងភ្ញៀវទេសចរ និងប្រគល់រង្វាន់​ជ័យលាភី សម្តេចនា​យករដ្ឋមន្រ្តី សម្រាប់​ធុរកិច្ច​បៃតង ក្នុងវិស័យ​ទេសចរណ៍ លើកទី២ អមដោយ​ជ័យលាភី​បដិ​សណ្ឋារ​កិច្ចល្អ សេវាសាធារណៈ​របស់​ក្រុង-ខណ្ឌ។

ខាងក្រោមនេះជាប្រសាសន៍សំខាន់ៗរបស់សម្តេចតេជោ ហ៊ុន សែន៖

– សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានថ្លែងថា បច្ចុប្បន្នកម្ពុជាមានសុខសន្តិភាព ស្ថិរភាព​នយោបាយ សណ្តាប់ធ្នាប់ល្អបរិបូរណ៍ ប្រព័ន្ធហេដ្ឋារចនាសម្ព័ន្ធល្អប្រសើរ និងមាន​ការ​អភិវឌ្ឍ​លើ​គ្រប់​វិស័យ ហើយមានកំណើនសេដ្ឋកិច្ចខ្ពស់ គួរឲ្យកត់សម្គាល់ក្នុងរយៈពេលប៉ុន្មានឆ្នាំ ចុងក្រោយនេះ។ សម្តេច​បានថ្លែងទៀត កម្ពុជាត្រូវបន្តខិតខំប្រឹងប្រែងខ្លាំងក្លាបន្ថែមទៀត ដើម្បីទទួល​បាន​នូវ​ភាព​រីក​ចម្រើន​សម្រេច​បាន តាមបំណង ប្រាថ្នារបស់ខ្លួនសំដៅបន្តកែលម្អជីវភាព និងការរស់នៅរបស់ប្រជាជន និងការ​រួម​ចំណែក​ថែរ​ក្សា​ភព​ផែនដីរបស់ សម្រាប់កូនចៅ ជំនាន់ក្រោយៗទៀត។

– សម្តេចនាយករដ្ឋមន្រ្តី បានថ្លែងថា វិស័យ​ទេសចរណ៍​ចូល​រួម​ចំណែក​យ៉ាង​សំខាន់​ក្នុង​ជួយ​ដល់​ជីវភាព​របស់​ប្រជា​ពល​រដ្ឋ និងជួយ​កាត់បន្ថយ បម្រែបម្រួល​អាកាស​ធាតុនៅ​លើពិភព​លោក​ផងដែរ។ សម្តេច​តេជោ​ ហ៊ុន សែន បានថ្លែងថា កិច្ចការពារ​បរិស្ថាន​គឺជារឿង​សំខាន់មួយ ក្នុងការការពារភពផែនដី និង​កាត់​បន្ថយ​ឧស្ម័នពុលក្នុងបិរស្ថាន។

– សម្តេចតេជោ ហ៊ុន សែន បានថ្លែងថា ភ្ញៀវទេសចរនឹងមិនប្រថុយប្រថានមកកាន់ប្រទេសមានសង្រ្គាម ដូច​ដែលកម្ពុជាជួបប្រទះកាលពីអតីតកាល ក៏ដូច​ជា​បណ្តា​ប្រទេស​កំពុង​ជួប​សង្រ្គាម​ដូច​បណ្តា​ប្រទេស​នៅ​តំបន់​មជ្ឈឹមនោះឡើយ។ ដូច្នេះការប្រយុទ្ធប្រឆាំងភេរវកម្ម និងរក្សាឲ្យបាននូវសុខសន្តិភាព គឺជា​កត្តា​ដ៏​ចាំបាច់​ត្រូវអនុវត្ត និងរក្សាឲ្យបាន។

– សម្តេចតេជោ បានថ្លែងបន្តថា ភ្ញៀវទេសចរ ក៏នឹងមិនចង់មកឃើញប្រទេសមានបរិស្ថានពុល កខ្វក់ និង​ក្លិ​ន​ស្អុយនោះទេ។ សម្តេចនាយករដ្ឋមន្រ្តី ក៏បានណែនាំឲ្យមានការបង្កើតបរិយាកាសបៃតង តាម​រយៈ​ការ​ដាំ​បន្លែបែបធម្មជាតិ និងការចិញ្ចឹមសត្វជាដើម ដើម្បីផ្គត់ផ្គង់នៅតាមភោជនីយដ្ឋាន និង​សណ្ឋាគារ​ផ្សេងៗ​នៅ​តាមតំបន់ទស្សនាចរ។

– សម្តេចនាយករដ្ឋមន្រ្តី បានណែនាំឲ្យក្រសួងទេសចរណ៍ និងក្រសួងកសិកម្ម ត្រូវបង្កើត​ឲ្យមាន​ចលនា​ប្រឡង​ប្រណាំង​ខ្សែ​ក្រវ៉ាត់​បៃតង គឺសំដៅទៅ លើការដាំដុះបន្លែ និងការចិញ្ចឹម​សត្វ​ផងដែរ ដើម្បី​ផ្គត់​ផ្គត់​ការហូប​ចុក​ដល់​ភ្ញៀវ​ទេសចរណ៍ នៅតាមតំបន់​ទេសចរណ៍​ល្បីៗ ព្រោះបច្ចុ​ប្បន្នបន្លែ និងសាច់​សត្វ​ជាច្រើន ត្រូវបាន​នាំមក​ពីបរទេសនៅឡើយ។

– សម្តេចនាយករដ្ឋមន្រ្តី បានគូសបញ្ជាក់ថា កម្ពុជាមានអំណោយ​ផលច្រើន​សម្រាប់​វិស័យ​ទេសចរណ៍ ព្រោះ​កម្ពុជា មិនសូវជាមានជំងឺឆ្លង ផ្សេងៗច្រើនោះទេ។ ប៉ុន្តែក៏មានការព្រួយបារម្ភចំពោះអំពើភេរវកម្ម តែយ៉ាង​ណា​កម្ពុជា​ក៏ត្រូវ​តែប្រឹង​ប្រែង​ទប់ស្កាត់​ឲ្យបាន។

– សម្តេចនាយករដ្ឋមន្រ្តី បានថ្លែងជាចម្ងល់ចោទសួរទៅមន្រ្តីទូតនានាថា មូលហេតុអ្វីបានជាគ្រឿងញៀន និង​ការ​ជួញ​ដូរផ្សេងៗ ដូចជាភ្លុកដំរីជាដើម បានឆ្លងកាត់​គ្រប់​ព្រលាន​យន្ត​ហោះនៅ​បណ្តា​ប្រទេស​ដទៃ​រហូត​មកដល់កម្ពុជា ? សម្តេចបន្តថា គួរតែមានការរួមគ្នាប្រយុទ្ធប្រឆាំងការជួញដូរ ឆ្លងដែន​ខុស​ច្បាប់​ទាំង​អស់នោះ។

– សម្តេចតេជោ ហ៊ុន សែន ថា មកដល់បច្ចុប្បន្ននេះ គ្មានអ្នកទេសចរ​ណា​ទៅលេងក​ម្សាន្ត​នៅតំបន់​សង្រ្គាម​ដូចមជ្ឈិមបូព៌ានោះទេ ដូច្នេះសុខសន្តិភាព នៅតែជាកត្តាសំខាន់​ណាស់​សម្រាប់​ការ​ទាក់​ទាញ​ភ្ញៀវ​ទេស​ចរ។

– សម្តេចតេជោ ហ៊ុន សែន បានថ្លែងថា ប្រាសាទអង្គរវត្តមិនមែនទើបមាននាពេលបច្ចុប្បន្ននោះទេ ប៉ុន្តែ​ហេតុអ្វីគ្មានទេសចរមកកាន់កម្ពុជា កាលពីទសវត្សរ៍ឆ្នាំ៧០ នោះក៏ព្រោះ​តែ​ប្រទេស​កម្ពុជា​ពេល​នោះ​ជួប​នូវ​ភ្លើងសង្រ្គាម។ ដូច្នេះការរក្សាឲ្យបានសន្តិភាព គឺជារឿងដ៏ចំាបាច់ សម្តេចថា ទោះបីក្នុងតម្លៃណាក៏ដោយ សន្តិភាពត្រូវតែរក្សាឲ្យបាន ហើយមិនត្រូវយកបញ្ហាសិទ្ធិមនុស្ស មកបង្កជាបញ្ហា និងអសន្តិសុខ នៅ​កម្ពុជា​នោះឡើយ។

– សម្តេចតេជោ ហ៊ុន សែន បានស្នើឲ្យបង្កើតចំណតរថយន្តឲ្យបានត្រឹមត្រូវនៅក្នុងទីក្រុង និងច្បាប់​ស្តីពី​សណ្តាប់​ធ្នាប់ទីក្រុង ដើម្បីកាត់បន្ថយការ កកស្ទះចរាចរណ៍។ សម្តេចតេជោ ក៏បានស្នើឲ្យសាលារាជធានី គិត​ពីការពង្រីកខ្សែរថយន្តក្រុងបន្ថែមផងដែរ។

– សម្តេចតេជោ បានហាមឃាត់ផងដែរ បើទោះបីឲ្យបង្កើតចំណតរថយន្តថ្មី តែមិនឲ្យដោះ​ដូរជា​មួយ​ចំណត​រថយន្ត​ចាស់នោះទេ។ សម្តេចនាយករដ្ឋមន្រ្តី ហាមផ្តាច់ចំពោះការដោះដូរចំណតរថយន្ត ព្រោះ​ជា​រឿង​ធ្វើឲ្យសម្តេចឈឺក្បាលខ្លាំង។

– សម្តេចនាយករដ្ឋមន្រ្តី បានថ្លែងបង្ហាញពីគម្រោងដើរតាមផ្លូវថ្មើរជើងប្របម៉ាត់ទន្លេពីមុខវាំង ទៅដល់​មជ្ឈ​មណ្ឌល​កោះពេជ្រផងដែរ។

– សម្តេចនាយករដ្ឋមន្រ្តី សេវាសាធារណៈនៅតែជាបញ្ហាប្រឈមមួយផងដែរ សម្រាប់វិស័យទេសចរណ៍។ ឆ្លើយ​តបបញ្ហានេះ សម្តេចតេជោថាត្រូវធ្វើកំណែ ទម្រង់ឲ្យបានស៊ីជម្រៅ និង​លើក​ទឹក​ចិត្ត​ឲ្យអ្នក​ផ្តល់​សេវា​សា​ធារណៈផ្តល់ឲ្យបានលឿន និងឆាប់រហ័ស។

– សម្តេចតេជោ ហ៊ុន សែន ថា ត្រូវនាំគ្នាប្រយុទ្ធប្រឆាំងគ្រឿងញៀន មិនត្រូវឲ្យអ្នកទេសចរនិយាយថា ប្រទេសកម្ពុជា សម្បូរគ្រឿងញៀននោះទេ ហើយក៏ត្រូវធ្វើឲ្យអ្នកទេសចរពេលមកកម្ពុជាហើយ ចង់​ត្រឡប់​មក​កម្សាន្ត​ជាថ្មី​ម្តងទៀត។ មិនត្រូវធ្វើឲ្យអ្នកទេសចរមកហើយជួបបញ្ហានានា ធ្វើឲ្យ​ភ្ញៀវ​លែង​ចង់​មក​លេង​នោះទេ។

– សម្តេចតេជោ ហ៊ុន សែន សង្ឃឹម និងជឿជាក់យ៉ាងមុតមាំថា គ្រប់ភាគីពាក់​ព័ន្ធ​ទាំង​អស់​នឹង​បន្ត​សហការ​ចូល​រួម​គាំទ្រឧបត្ថម្ភ និង​អនុវត្តរាល់ យុទ្ធនាការនានា ដែលត្រូវបានដាក់ចេញដោយរាជរដ្ឋាភិបាល ដើម្បីគាំទ្រ​ដល់​ចលនាប្រឡង​ប្រណាំង​ទីក្រុងស្អាតជាអាទិ៍៖ ចលនាប្រឡង​ប្រណាំង​រង្វាន់ សម្តេច​តេជោ​នាយក​រដ្ឋម​ន្រ្តី​សម្រាប់​ធុរកិច្ចបៃតង​ ក្នុងវិស័យ​ទេសចរណ៍ ចលនា​ប្រឡង​ប្រំណាង​បដិ​សណ្ឋារ​កិច្ច​ល្អ​សេវា​សា​ធារណៈ​របស់ក្រុង-ខណ្ឌ បេក្ខភាពក្នុង​ចលនា​ប្រឡង​ប្រណាំង​បដិស​ណ្ឋារ​កិច្ចល្អ របស់​ច្រក​ទ្វា​អន្តរជាតិ យុទ្ធនា​ការ «ភូមិ-ឃុំមាន​សុវត្ថិភាព» យុទ្ធនាការ «ប្រយុទ្ធប្រឆាំង​គ្រឿង​ញៀន» និងយុទ្ធនាការ «យុវជន និង​ទីក្រុង​ស្ទាត» ជាដើម ដើម្បីចូលរួម​ដល់ការ​សម្រេច​បាន​ជោគ​ជ័យ​ទីក្រុងស្អាត ស្របតាម​ខ្លឹម​សារ នៃ​ប្រធាន​បទ «ទីក្រុងស្អាត៖ ទីក្រុងផ្តល់​ភាពកក់​ក្តៅដល់​ប្រជា​ពលរដ្ឋ និង​ភ្ញៀវ​ទេស​ចរ»។

– សម្តេចតេជោ ហ៊ុន សែន បានបញ្ចប់ការថ្លែងសុន្ទរកថា នៅវេលាម៉ោង៩៖៣៤នាទីព្រឹកថ្ងៃដដែល៕

ពត៌មានទាក់ទង

ពត៌មានផ្សេងៗ