ប្រមុខ​រាជរ​ដ្ឋាភិបាល​កម្ពុជា និង​អគ្គ​លេខា​ធិការ​បក្ស​កុម្មុយ​នីស​វៀតណាម ជួបពិភាក្សា​ការងារ និង​ចុះហត្ថ​លេខា​លើឯកសារ​មួយ​ចំនួន​ដើម្បី​ពង្រឹង​ទំនាក់​ទំនងទ្វេភាគី​អោយ​កាន់​តែស៊ីជ​ម្រៅ

នៅក្នុង​ជំនួប​ពិភាក្សា​ការងារ​ជាមួយ សម្តេចអគ្គ​មហាសេនា​បតីតេជោ ហ៊ុន សែន នាយករដ្ឋកម្ពុជា នៅវិមានសន្តិភាព នារសៀលថ្ងៃទី២០ ខែកក្តដា ឆ្នាំ២០១៧នេះ ឯកឧត្តម ង្វៀន ហ៊្វូជុង អគ្គលេខាធិការ​គណៈកម្មា​ធិការបក្សកុម្មុយនីសវៀតណាម បាន​លើកឡើងពី ​ទំនាក់ទំនងការទូត​រវាង​ប្រទេស​កម្ពុជា​​និងវៀតណាម ដែលគិតមក​ដល់ពេលនេះ មានរយៈពេល៥០ឆ្នាំមកហើយ។ ក្នុងរយៈពេលនេះ​​ប្រទេសទាំងពីរបាន​​ឆ្លងកាត់ការ​តស៊ូ និងសហការគ្នា​យ៉ាងជិតស្និទ្ធ ដើម្បី​ស្វែងរកស​ន្តិភាព​ និង ស្ថេរភាព ដែលជាកត្តាចលករ​ក្នុងការអ​ភិវឌ្ឍប្រទេស​កម្ពុជា​មានការរីក​ចម្រើន​មកដល់ពេលនេះ។  

ឯកឧត្តម ង្វៀន ហ៊្វូជុង បានស្នើសុំអោយ​ប្រទេស​ទាំងពីរ​ ជម្រុញការ​តភ្ជាប់​​អោយ​​កាន់តែស៊ីជម្រៅ តាមរយៈ​ស្ថាប័ន​រដ្ឋ វិស័យអប់រំ  យុវជន និងវិស័យសេដ្ឋកិច្ច ជាដើម ធ្វើយ៉ាងណាពង្រីកទំហំពាណិជ្ជកម្ម​ទ្វេភាគីអោយ​កើន​ឡើងដល់ ៥ពាន់លាន​ដុល្លារ​​អាមេរិក​នា​​ឆ្នាំ​២០២៥​ខាងមុខ​។  ​ នៅក្នុងជំនូប​នេះដែរ ឯកឧត្តម ង្វៀន ហ៊្វូជុង ក៏បានសម្តែង​ការអប​អរសាទរ​​ចំពោះ​លទ្ធ​ផលជោគ​ជ័យ​​របស់គ​ណបក្ស​​ប្រជាជន​​កម្ពុជា​​ក្នុង​ការបោះ​ឆ្នោត​ជ្រើសរើ​ស​​ក្រុមប្រឹក្សា ឃុំសង្កាត់អាណត្តិ​ទី៤ កន្លងមកនេះ។   នៅក្នុងទំនាក់ទំនង​ដ៏ល្អរវាងប្រទេស​ទាំងពីរនេះ ឯកឧត្តម ង្វៀន ហ៊្វូជុង បានជំរាប​ជូន​​សម្តេច​តេជោថា​ រដ្ឋាភិបាល​វៀតណាម បានសម្រេចផ្ត​ល់ជំនួយ​​ជាថវិកាចំនួន​២៥លាន​​ដុល្លារអាមេរិក ដល់រាជរដ្ឋាភិបាល​កម្ពុជា ដើម្បីសាងសង់​អគារ​អគ្គលេខាធិការ​ដ្ឋាន​រដ្ឋសភា​ផងដែរ។

សម្តេច​តេជោ ហ៊ុន សែន បានឆ្លើយតបទៅ​នឹង​ការផ្តល់​ជំនួយ​ថវិកានេះថា គឺជាចំណងដៃ​ដ៏ធំមួយ សម្រាប់​ពង្រឹងនិ​តិរដ្ឋ​របស់កម្ពុជា។  បន្ថែមពីនេះ​សម្តេច​តេជោ បានថ្លែងអំ​ណរ​គុណចំពោះ​រដ្ឋាភិបាល និងប្រជាជន​វៀតណាម ដែលបាន​គាំទ្រ​ចំពោះការ​​ដាក់​បញ្ចូល​តំបន់ប្រាសាទ​សំបូរ​ព្រៃគុក របស់កម្ពុជា​ទៅក្នុងប​ញ្ជី​បេតិកភ័ណ្ឌ​ពិភពលោក។ សម្តេចតេជោ បានស្នើសុំ​ដល់ភាគី​វៀតណាម ជួយជម្រុញភ្ញៀ​វទេសចរណ៌​មកកាន់ក​ម្ពុជាកាន់តែ​ច្រើន និងជម្រុញអោយមា​នកិច្ចស​ហការគ្នារ​វាងស្ថាប័ន និងអាជ្ញាធរខេត្តជាប់ព្រំដែន​​នៃប្រទេសទាំ​ងពីរ ដើម្បីទប់ស្កា​ត់រាល់​អំពើរ​ឧក្រិដ្ឋដែលអាច​នឹងមានឡើង​រវាងប្រ​ទេសទាំង​ពីរតែម្តង។

បន្ទាប់ពីបញ្ចប់​ជំនួបពិភាក្សាទ្វេភាគី សម្តេចតេជោ នាយករដ្ឋមន្ត្រី ហ៊ុន ​សែន និង ឯកឧត្តម ង្វៀន ហ៊្វូជុង អគ្គលេខាធិការ​​គណៈ​កម្មាធិការ​បក្សកុម្មុយ​នីស​វៀតណាម បានចូលរួម​ជា​សក្ខីភាព​ក្នុងពិធី​ចុះហត្ថលេខា​លើឯកសារ​រវាងប្រទេស​កម្ពុជា និងវៀតណាម មានដូចជា៖

១. សេចក្តីថ្លែង​ការណ៍រួម ស្តីពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងវៀតណាម ដែលចុះហត្ថ​លេខា​ដោយ រដ្ឋមន្ត្រីការ​បរទេសវៀតណាម ឯកឧត្តម ឧបនាយក​រដ្ឋមន្ត្រី ផាម ប៊ិញ មិញ និង រដ្ឋមន្ត្រីការបរទេស​និងសហប្រតិបត្តិការអន្តរជាតិ​កម្ពុជា ឯកឧត្តម ទេសរដ្ឋមន្ត្រី ប្រាក់ សុខុន​។ ​​២.  ក្រប​ខ័ណ្ឌ​កិច្ច​ព្រម​ព្រៀ​ងរួម រវាង​រាជ​រដ្ឋាភិបាល​កម្ពុជា និង​រដ្ឋាភិ​បាលវៀត​ណាម ស្តីពីការ​តភ្ជាប់​សេដ្ឋកិច្ច​កម្ពុជា​-វៀតណាម   ដែល​ចុះហត្ថ​លេខា​ដោយ រដ្ឋមន្ត្រីក្រសួង​ផែនការ និងវិនិយោគ ឯកឧត្តម ង្វៀន ជីយ៉ុង និង រដ្ឋមន្ត្រីក្រសួង​ផែនការកម្ពុជា ឯកឧត្តម ទេសរដ្ឋមន្ត្រី ឆាយ ថន។  ៣. អនុស្សារណៈនៃការយោគយល់គ្នា ស្តីពី កិច្ចសហប្រតិបត្តិការអភិវឌ្ឍន៍គម្រោង​រោង​ចក្រអគ្គិសនី ការតភ្ជាប់​បណ្តាញ​បញ្ជូន​អគ្គិសនី និងពាណិជ្ជ​កម្មថាមពល  ដែលចុះ​ហត្ថលេខា​ដោយ រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម ឯកឧត្តម ត្រាន់ តួនអាញ់ និង រដ្ឋមន្រ្តីក្រសួងរ៉ែ និងថាមពល ឯកឧត្តម ស៊ុយ សែម ។   ៤. សកម្មភាព​សង្គ្រោះគ្រោះ​មហន្តរាយ​អចិន្រៃយ៍នៅតាមតំបន់​ព្រំដែនគោក  ដែល​ចុះហត្ថលេខាដោយ អនុរដ្ឋមន្ត្រី ក្រសួងការពារជាតិវៀតណាម ឯកឧត្តម ង្វៀន ជីវិញ និង រដ្ឋលេខាធិការក្រសួង​ការពារ​ជាតិកម្ពុជា ឯកឧត្តម នាង ផាត។ ​៥. អនុស្សារណៈ​នៃការយោគយល់គ្នា រវាងវិទ្យាស្ថាន​ប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) នៃក្រសួង​ប្រៃសណីយ៍ ទូរគមនាគមន៍កម្ពុជា ជាមួយក្រុមហ៊ុន​វៀត​ធែល​កម្ពុជា ភីធីអ៊ី អ៊ិលធីឌី ( VIETTEL Cambodia PTE.,LTD) ដែលចុះហត្ថលេខាដោយ អគ្គនាយកក្រុមហ៊ុន​វៀតធែលកម្ពុជា លោក ង្វៀន ថាញ់ញឿង និង ប្រធានវិទ្យាស្ថានប្រៃសណីយ៌ ឯកឧត្តម សេង សុភាព

ពត៌មានទាក់ទង

ពត៌មានផ្សេងៗ