ភ្នំពេញ ថ្ងៃទី០៤ ខែកក្កដា ឆ្នាំ២០១៩ -ក្នុងខណៈដឹកនាំគណៈប្រតិភូទៅចូលរួមកិច្ចប្រជុំ «ត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ២០១៩» នារាត្រីថ្ងៃពុធ ២កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹង ថ្ងៃទី៣កក្កដា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្រ្តី នៃព្រះរាជាណាចក្រកម្ពុជា អញ្ជើញជាអធិបតីដ៏ខ្ពង់ខ្ពស់ក្នុងពិធីបើកកម្មវិធីព្រឹត្តិការណ៍ សង្គម និងវប្បធម៌ ដែលប្រារព្ធធ្វើឡើងនៅទីស្នាក់ការកណ្តាល អង្គការពាណិជ្ជកម្មពិភព លោក ក្នុងទីក្រុងហ្សឺណែវ សហព័ន្ធស៊្វីស។
ប្រភពពីទូរទស្សន៍ជាតិកម្ពុជាបានឱ្យដឹងថា ពិធីដ៏មានអត្ថន័យនេះក៏មានការអញ្ជើញ ចូលរួមពី ឯកឧត្តម រ៉ូប៊ែរតូ អាហ្សេវ៉េឌូ អគ្គនាយកអង្គការពាណិជ្ជកម្មពិភពលោក ព្រមទាំងវត្តមាន ឯកឧត្តម លោកជំទាវ អនុប្រធានាធិបតី និងតំណាងប្រទេសនៃសមាជិកអង្គការពាណិជ្ជកម្មពិភពលោក ជាច្រើនរូប។ ក្នុងព្រឹត្តិការណ៍ដ៏មានអត្ថន័យជាប្រវត្តិសាស្រ្ត និងក្នុងនាមជាប្រទេសម្ចាស់ផ្ទះរៀបចំព្រឹត្តិការណ៍សង្គម និងវប្បធម៌ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងថ្នាក់ដឹកនាំទាំងអស់នៃប្រទេសជាសមាជិក អង្គការពាណិជ្ជកម្មពិភពលោក បានអញ្ជើញពិសានំបញ្ចុក និងបង្អែមប្រពៃណីជាតិខ្មែរ ដែលរៀបចំដោយអ្នកចុងភៅមកពីប្រទេសកម្ពុជា និងប្រជាពលរដ្ឋនៅសហភាពអឺរ៉ុប។
សម្តេចតេជោនាយករដ្ឋមន្រ្តី និងអ្នកចូលរួមទាំងអស់ បានភ្លក់នូវរសជាតិនំបញ្ចុក និង បង្អែមប្រពៃណីជាតិខ្មែរ ដែលមានរសជាតិឆ្ងុយឆ្ងាញ់ ដែលជាមោទនភាពជាតិខ្មែរ ក្រោមម្លប់ សន្តិភាពរបស់សម្តេចតេជោជាប្រមុខរាជរដ្ឋាភិបាល។ក្រោមការដឹកនាំរបស់សម្តេចតេជោ ហ៊ុន សែន បច្ចុប្បន្នកម្ពុជាមានចំណងមិត្តភាព និងកិច្ចសហប្រតិបត្តិការល្អ ជាមួយគ្រប់ប្រទេស ដោយមិនប្រកាន់របបនយោបាយ ហើយបានធ្វើឱ្យមានទំនាក់ទំនងជាប្រក្រតី ជាមួយអង្គការអន្តរជាតិនានា ទាំងក្នុងក្របខ័ណ្ឌតំបន់ក៏ដូចជាពិភពលោក ដែលបាននាំមកនូវការគាំទ្រ និងជំនួយឧបត្ថម្ភយ៉ាងច្រើនសម្រាប់ការអភិវឌ្ឍ។ កម្ពុជាដែលពីមុនត្រូវគេហ៊ុមព័ទ្ធឯកោ និងត្រូវគេប្រមាថ ឥឡូវនេះបានធ្វើសមាហរណកម្មពេញលេញជាមួយបណ្តាប្រទេស ក្នុងរាល់កិច្ចការអន្តរជាតិ។ កម្ពុជាដែលធ្លាប់ជាប្រទេសទទួលកងទ័ពរក្សាសន្តិភាព របស់អង្គការសហប្រជាជាតិ បានក្លាយជាប្រទេសដែលបានបញ្ជូនកងកម្លាំងរក្សាសន្តិភាពរបស់ខ្លួន ទៅជួយរក្សាសន្តិភាពនៅប្រទេសមួយចំនួនវិញ ក្នុងក្របខ័ណ្ឌប្រតិបត្តិការ នៃអង្គការសហប្រជាជាតិ។ សម្តេចតេជោនាយករដ្ឋមន្រ្តី គឺជាអ្នកដឹកនាំដ៏ឆ្នើមនៅកម្ពុជា ហ៊ានធ្វើហ៊ានទទួលខុសត្រូវ នៅចំពោះមុខប្រវត្តិសាស្រ្តប្រទេសនិងប្រជាជនកម្ពុជា។ ពោលគឺសម្តេចតែងតែធ្វើនូវអ្វីៗគ្រប់បែបយ៉ាង ដើម្បីបម្រើផលប្រយោជន៍របស់ប្រជាជនកម្ពុជា ដោយមិនក្រាប មិនឱនក្បាល មិនលុតជង្គង់ មិនទទួលយកការគំរាម មិនលក់ខ្លួនបម្រើនយោបាយបរទេស ដែលធ្វើឱ្យបាត់បង់ កិត្តិយស បាត់បង់សិទ្ធិស្វ័យសម្រេច និងសេចក្តីថ្លៃថ្នូររបស់ជាតិ ដែលជាគុណតម្លៃមិនអាចខ្វះ បានរបស់ប្រជាជាតិមួយ។ កម្ពុជាចង់បានតែភាពស្មើសិទ្ធិ ស្មើភាព ស្មើមុខស្មើមាត់ជាមួយនឹង បណ្តាប្រទេសទាំងអស់លើកសកលលោក ដោយមិនប្រកាន់ថា ប្រទេសតូច ប្រទេសធំ ប្រទេសមាន ក្រនោះឡើយ។ ដោយសារតែភាពម៉ឺងមាត់ក្នុងការដឹកនាំនេះហើយ សម្តេចតេជោ ហ៊ុន សែន ទទួលបាននូវការអាណិត គោរពស្រឡាញ់ពេញចិត្ត ពីសំណាក់ប្រជាជនកម្ពុជាទាំងក្នុង និងក្រៅប្រទេស ពោលគឺចាប់ពីការបោះឆ្នោតនីតិកាលមួយ ទៅកាន់នីតិកាល មួយ ប្រជាជនកម្ពុជាបានផ្តល់នូវទំនុកចិត្តមានការកើនឡើងជាលំដាប់។
សូមបញ្ជាក់ដែរថា ថ្នាក់ដឹកនាំនៃអង្គការពាណិជ្ជកម្មពិភពលោក និងថ្នាក់ដឹកនាំនៃប្រទេសជាសមាជិកអង្គការពាណិជ្ជកម្មពិភពលោក ដែលមានវត្តមានក្នុងកម្មវិធីព្រឹត្តិការណ៍សង្គម និងវប្បធម៌ គឺសុទ្ធតែសម្ដែងនូវការកោតសរសើរចំពោះរសជាតិ នៃម្ហូបប្រពៃណីជាតិខ្មែរ គឺនំបញ្ចុកដែលមានរសជាតិឆ្ងុយឆ្ងាញ់ពិសានេះ៕
ដោយជឹម ណារី
