ភ្នំពេញ ថ្ងៃទី១៤ ខែមីនា ឆ្នាំ២០១៩ — ឯកឧត្ដម Nguyen Manh Hung រដ្ឋមន្ត្រីក្រសួងព័ត៌មាន និងទូរគមនាគមន៍ នៃសាធារណរដ្ឋសង្គមនិយមវៀតណាម បានថ្លែងថា វៀតណាម នឹងផ្ដល់អាហារូបករណ៍ ដល់មន្ត្រីកម្ពុជាចំនួន៤រូប ដើម្បីធ្វើការសិក្សាលើប្រព័ន្ធអេឡិចត្រូនិក អាយ ស៊ី ធី ។
ឯកឧត្ដម អ៊ាង សុផល្លែត ជំនួយការសម្ដេចតេជោ បានថ្លែងដូច្នេះប្រាប់ក្រុមអ្នកយកព័ត៌មាន បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្ដម Nguyen Manh Hung រដ្ឋមន្ត្រីក្រសួងព័ត៌មាន និងទូរគមនាគមន៍ នៃសាធារណរដ្ឋសង្គមនិយមវៀតណាម និងគណៈប្រតិភូ ចូលជួបសម្ដែងការគួរសម នារសៀលថ្ងៃទី ១៤ ខែមីនា ឆ្នាំ២០១៩ នៅវិមានសន្តិភាព។
ឯកឧត្ដម Nguyen Manh Hung បានជម្រាបជូនសម្ដេចតេជោនាយករដ្ឋមន្ត្រីថា នេះគឺ ជាលើកទីមួយហើយ ដែលឯកឧត្ដមបានមកកាន់ព្រះរាជាណាចក្រកម្ពុជា បន្ទាប់ពីឯកឧត្ដម ត្រូវបានតែងតាំងជារដ្ឋមន្ត្រីក្រសួងព័ត៌មាន និងទូរគមនាគមន៍។ ឯកឧត្ដមក៏បានលើកឡើង អំពីវឌ្ឍនភាពលើវិស័យទូរគមនាគមន៍នៅប្រទេសវៀតណាម ដោយឯកឧត្ដមបានបញ្ជាក់ថា ប៉ុន្មានឆ្នាំកន្លងមកនេះវៀតណាមបានបង្កើតនូវបច្ចេកវិទ្យាការពារសន្តិសុខ តាមបណ្ដាញព័ត៌ មាន ដែលនេះគឺជាបច្ចេកវិទ្យាដែលអាចតាមដានពួកហេកគ័រ ការវិភាគទិន្នន័យ និងអាចស្វែង រកទប់ស្កាត់ ការប្រព្រឹត្តឧក្រិដ្ឋកម្មតាមប្រព័ន្ធអ៊ីធឺណែត។ ឯកឧត្ដក៏បានជម្រាបជូនសម្ដេច តេជោអំពីកិច្ចពិភាក្សារវាង ឯកឧត្ដមផ្ទាល់ ជាមួយឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ពាក់ព័ន្ធនឹងបញ្ហា អ៊ីហ្គាវ៉ាមិន(E-Government) ពាណិជ្ជកម្មតាមប្រព័ន្ធអេឡិចត្រូនិក ក៏ដូចជាទីក្រុងឆ្លាតវៃ ហើយក៏បានយល់ព្រមជាមួយគ្នា ក្នុងការពិនិត្យការប្រើប្រាស់ប្រព័ន្ធវ៉ាយជី ក៏ដូចជាការបង់ប្រាក់តាមប្រព័ន្ធអេឡិចត្រូនិក និងការផ្លាស់ប្ដូរកិច្ចសហប្រតិបត្តិការក្នុងការផ្លាស់ប្ដូរព័ត៌មាន និងកិច្ចសហប្រតិបត្តិការក្នុងការអភិវឌ្ឍធនធានមនុស្ស។ ក្នុងន័យនេះដែរ ឯកឧត្ដមក៏បានជម្រាបជូនសម្ដេចតេជោនាយករដ្ឋមន្ត្រីថា នឹងផ្ដល់អាហារូបករណ៍ដល់មន្ត្រីកម្ពុជាចំនួន៤រូប ដើម្បីធ្វើការសិក្សាលើប្រព័ន្ធអេឡិចត្រូនិក អាយ ស៊ី ធី ។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានសម្ដែងនូវការអបអរសា ទរចំពោះវឌ្ឍនភាពរបស់វៀតណាម ជាពិសេសលើវិស័យប្រព័ន្ធបច្ចេកវិទ្យាការពារសន្តិសុខ ហើយក៏បានស្វាគមន៍ចំពោះអ្វីដែលបានពិភាក្សា និងព្រមព្រៀងគ្នាជាមួយ ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា។ សម្ដេចតេជោបានថ្លែងសង្កត់ធ្ងន់ដោយស្នើឱ្យភាគីទាំងពីរធ្វើយ៉ាងណា ចែករំលែកបច្ចេកវិទ្យា និងព័ត៌មានគ្នាទៅវិញទៅមក និងការអភិវឌ្ឍធនធានមនុស្ស ព្រោះថា នេះជាកត្តាសំខាន់ ដែលអាចជួយកម្ពុជាក្នុងការអភិវឌ្ឍផ្នែកបច្ចេកវិទ្យា៕
ដោយ ជឹម ណារី
