សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណះប្រតិភូជាន់ខ្ពស់ រាជរដ្ឋាភិបាលកម្ពុជា បានអញ្ជើញទៅដល់អាកាសយានដ្ឋានអន្តរជាតិ នីណយអាគីណូ Ninoy Aquino ទីក្រុងម៉ានីល សាធារណរដ្ឋហ្វីលីពីន ប្រកបដោយសុវត្តិភាព កាលពីវេលាម៉ោង១៣និង៥០នាទីរសៀលថ្ងៃទី២៨មេសា ម៉ោងនៅទីក្រុងម៉ានីល ត្រូវនឹងម៉ោង១២និង៥០នាទី ម៉ោងនៅព្រះរាជាណាចក្រកម្ពុជា ដើម្បីចូលរួមកិច្ចប្រជុំកំពូលអាស៊ានលើកទី៣០ និងកិច្ចប្រជុំពាក់ព័ន្ធ នៅទីក្រុងម៉ានីល សាធារណរដ្ឋហ្វីលីពីន ដែលនឹងប្រារព្វធ្វើឡើងថ្ងៃទី២៩មេសា ស្អែកនេះ។
នៅអាកាសយានដ្ឋានអន្តរជាតិ នីណយអាគីណូ វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរ៉ាក់ទាក់បំផុត ពីសំណាក់ឯកឧត្តម Delfin N. Lorenzana រដ្ឋមន្រ្តីក្រសួងការពារជាតិហ្វីលីពីន លោកជំទាវ ទូត បញ្ញា ឯកអគ្គរាជទូតវិសាមញ និងពេញសមត្ថភាពព្រះរាជាណាចក្រកម្ពុជា ប្រចាំសាធារណរដ្ឋហ្វីលីពីន ព្រមទាំងឯកឧត្តម លោកជំទាវមន្រ្តីជាន់ ខ្ពស់រដ្ឋាភិបាលហ្វីលីពីន និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណរដ្ឋហ្វីលីពីនជាច្រើនរូប។
ដូចគ្នានឹងបណ្តាមេដឹកនាំអាស៊ានដទៃទៀតដែរ សម្តេចតេជោនាយករដ្ឋមន្រ្តីនឹង ថ្លែងសុន្ទរកថា និងបទអន្តរាគមន៍ ក្នុងកិច្ចប្រជុំកំពូលពេញអង្គអាស៊ានលើកទី៣០ កិច្ចប្រជុំកំពូលចង្អៀតអាស៊ានលើកទី៣០ កិច្ចប្រជុំកំពូលរបស់មេដឹកនាំអាស៊ាន ជាមួយតំណាងអន្តរសភាអាស៊ាន និងកិច្ចប្រជុំកំពូលរបស់មេដឹកនាំអាស៊ាន ជាមួយតំណាងយុវជនអាស៊ាន នៅព្រឹកថ្ងៃទី២៩មេសា។
