បន្ទាប់មកនៅរាត្រីថ្ងៃទី១៤ វិច្ឆិកា ដដែលនោះដែរ ឯកឧត្តម លី ស៊ានឡុង នាយករដ្ឋមន្រ្តីសិង្ហបុរី និង ជាប្រធានកិច្ចប្រជុំកំពូលអាស៊ានលើកទី៣៣ និងលោកជំទាវ បានប្រារព្វពិធីលៀងសាយភោជន៍ជាមហាកិត្តិយសដ៏ខ្ពង់ខ្ពស់បំផុត ថ្វាយនិងជូនប្រមុខរដ្ឋ ប្រមុខរដ្ឋាភិបាលនៃប្រទេសអាស៊ាន និងប្រទេសជាដៃគូទាំងអស់របស់អាស៊ាន ព្រមទាំងឧត្តមមន្រ្តីអាស៊ាន និងគណៈប្រតិភូទាំងអស់ ដែលមានវត្តមានអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនានា នៅសាធារណរដ្ឋសិង្ហបុរី។
ឯកឧត្តមប្រធានកិច្ចប្រជុំមានប្រសាសន៍ដែរថា យើងបានចំណាយពេលវេលាដ៏យូក្នុងការរួមគ្នាកសាងសហគមន៍អាស៊ានមួយកាលពីឆ្នាំ២០១៥ ហើយសម្រាប់អនាគតទៅមុខយើងនឹងខិតខំរួមគ្នាបន្តទៀត យើងនឹងបន្តខិតខំរួមគ្នាបន្ថែមទៀត ក្នុងការដោះស្រាយនូវរាល់បញ្ហាប្រឈមនានា ដើម្បីអនាគតដ៏រុងរឿងរបស់តំបន់ ពិសេសដើម្បីប្រជាពលរដ្ឋរបស់យើងទាំងអស់គ្នា។ ឯកឧត្តមប្រធានមានប្រសាសន៍ដែរថា ក្រោមប្រធានបទ ការកសាងនវានុវត្តន៍ និងភាពរឹងមាំរបស់អាស៊ាន យើងនឹងបន្តធ្វើការពិភាក្សារបស់យើងឲ្យកាន់តែ ស៊ីជម្រៅថែមទៀត នៅព្រឹកថ្ងៃទី ២៨មេសា ដើម្បីបម្រើប្រយោជន៍តំបន់និងប្រជាជន នៃយើងទាំងអស់គ្នា។ បណ្តា មេដឹកនាំទាំងអស់ ក៏បានតាមដានទស្សនានូវរបាំចម្រៀង របស់ក្រុមសិល្បៈមហាជន របស់ប្រទេសសិង្ហបុរីផងដែរ។
ឯកឧត្តម លី ស៊ានឡុង នាយករដ្ឋមន្រ្តីសិង្ហបុរី និងជាប្រធានកិច្ចប្រជុំកំពូលអាស៊ានលើកទី៣៣ បានថ្លែងសុន្ទរកថាគន្លឹះទៅកាន់បណ្តាមេដឹកនាំទាំងអស់ ដែលមានវត្តមានក្នុងពិធីលៀង សាយភោជន៍ជាមហាកិត្តិយសនោះថា ឯកឧត្តមពិតជាមានការសប្បាយរីករាយខ្លាំងណាស់ ដែល សិង្ហបុរីសម្រេចបាននូវសមិទ្ធផលដ៏ធំធេង ក្នុងរយៈពេល១ឆ្នាំកន្លងមក ក្នុងនាមជាប្រធាន អាស៊ានប្តូរវេន។ ឯកឧត្តមក៏បានប្រសិទ្ធពរជ័យបវរមហាប្រសើរជូនបណ្តាមេដឹកនាំទាំងអស់ ទទួលបាននូវភាពជោគជ័យខ្ពង់ខ្ពស់ថែមទៀត ក្នុងបុព្វហេតុនៃការបម្រើប្រទេសនិងប្រជាជនទាំងអស់ ទាំងនៅក្នុងតំបន់និងក្រៅតំបន់។
