កិច្ចប្រជុំប្រចាំឆ្នាំ២០១៨ របស់មូលនិធិរូបិយវត្ថុអន្តរជាតិ IMF – ធនាគារពិភពលោក World Bank បានប្រារព្វពិធីបើកជាផ្លូវការហើយ នៅព្រឹកថ្ងៃទី១២ ខែតុលា ២០១៩នេះ នៅមជ្ឈមណ្ឌលសន្និសីទបាលីនូសាឌួ តំបន់លំហែកាយមាត់សមុទ្រ កោះបាលី សាធារណរដ្ឋឥណ្ឌូនេស៊ី។ កិច្ចប្រជុំប្រចាំឆ្នាំ២០១៨ របស់មូលនិធិរូបិយវត្ថុអន្តរជាតិ IMF – ធនាគារពិភពលោក World Bank ត្រូវបានការអញ្ជើញចូលរួមពី ប្រមុខរដ្ឋ / ប្រមុខរដ្ឋាភិបាលអាស៊ាន អគ្គលេខាធិការអង្គការសហប្រជាជាតិ ប្រធានមូលនិធិរូបិយវត្ថុអន្តជាតិ ប្រធានធនាគារពិភពលោក និងមានការចូលរួមពីប្រតិភូ ប្រមាណ ៣ពាន់៥០០នាក់ មកពី១៨៩ប្រទេស និងតំណាងផ្នែកឯកជន សហគមន៍ធនាគារ វិទ្យាស្ថានរាជ្យបណ្ឌិតសភា អង្គការសង្គមស៊ីវិល សភាតំណាងរាស្រ្ត អ្នកអង្កេតការណ៍ និងអ្នកសារព័ត៌មាន សរុបប្រមាណ ១ម៉ឺន៥ពាន់នាក់។
នៅក្នុងសុន្ទរកថាបើកកិច្ចប្រជុំ របស់ឯកឧត្តម រដ្ឋមន្រ្តីក្រសួងសេដ្ឋកិច្ច នៃប្រទេសហ្វាំងឡង់ និងជាប្រធានកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តជាតិ និងធនាគារពិភពលោក និងសុន្ទរកថាឯកឧត្តម យ៉ូកូ វីដូដូ ប្រធានាធិបតី នៃ សាធារណរដ្ឋឥណ្ឌូនេស៊ី បានធ្វើការគូសបញ្ជាក់រួមគ្នាថា កិច្ចប្រជុំប្រចាំឆ្នាំ២០១៨ របស់មូលនិធិរូបិយវត្ថុអន្តរជាតិ IMF – ធនាគារពិភពលោក World Bank គឺពិតជាបានចែករម្លែក នូវទស្សនវិស័យ ផ្ដល់បច្ចុប្បន្នភាព ស្ដីអំពីស្ថានភាព សេដ្ឋកិច្ច និងហិរញ្ញវត្ថុ ដែលជាការឆ្លុះបញ្ចាំងអំពី ទិសដៅអនាគតសម្រាប់អាស៊ាន ដើម្បីបង្ហាញពីភាពដឹកនាំ និងកិច្ចសហប្រតិបត្តិការប្រកបដោយប្រសិទ្ធិភាព ក្នុងការគ្រប់គ្រងការរីកលូតលាស់ផ្នែកសេដ្ឋកិច្ចរបស់អាស៊ាន។ តាមរយៈកិច្ចសន្ទនានេះ អាស៊ាន និងស្ថាប័នពិភពលោក នឹងបង្កើតបានកិច្ចសហការប្រកបដោយប្រសិទ្ធភាព និងគ្រប់ជ្រុងជ្រោយដើម្បីសម្រេចបានសហគមន៍សេដ្ឋកិច្ចអាស៊ានឆ្នាំ២០២៥ និងរបៀបវារៈឆ្នាំ២០៣០ នៃគោលដៅអភិវឌ្ឍន៍ប្រកបដោយចីរភាពសំដៅនាំមកនូវ ជោគជ័យលើការកាត់បន្ថយគម្លាត នៃការអភិវឌ្ឈ និងធានាបានថា អត្ថប្រយោជន៍ នៃសមាហរណកម្មសេដ្ឋកិច្ចសកល ត្រូវបានចែករំលែកយ៉ាងទូលំទូលាយ។ ម្យ៉ាងវិញទៀតវេទិកាជំនួបថ្នាក់ដឹកនាំអាស៊ាន បានបង្ហាញពីភាពជាអ្នកដឹកនាំរបស់អាស៊ាន និងកិច្ចសហប្រតិបត្តិការរឹងមាំ នៅក្នុងការគ្រប់គ្រងកំណើនសេដ្ឋកិច្ច ដើម្បីធ្វើឲ្យប្រសើរឡើងនូវវិបុលភាព និងសមធម៌ ក៏ដូចជាការផ្តល់នូវការរីកចម្រើន សម្រេចបាននូវគោលដៅ អភិវឌ្ឍប្រកបដោយចីរភាព ដែលបង្ហាញពីការប្តេជ្ញាចិត្តរបស់អាស៊ាន ក្នុងការគាំទ្រតួនាទីរបស់ IMF WB និង UN ក្នុងការដោះស្រាយបញ្ហាប្រឈមនានា ។
បន្ទាប់ពីស្នាក់អាស្រ័យអញ្ជើញបំពេញទស្សនកិច្ចផ្លូវការ អញ្ជើញចូលរួមកិច្ចប្រជុំកំពូលមេគង្គ-ជប៉ុន នៅទីក្រុង តូក្យូ ប្រទេសជប៉ុន និងអញ្ជើញចូលរួមវេទិកានៃជំនួបថ្នាក់ដឹកនាំអាស៊ាន និងកិច្ចប្រជុំប្រចាំឆ្នាំ២០១៨ របស់មូលនិធិរូបិយវត្ថុអន្តរជាតិ IMF – ធនាគារពិភពលោក World Bank នៅតំបន់លំហែកាយមាត់សមុទ្រកោះបាលី សាធារណ រដ្ឋឥណ្ឌូនេស៊ី រយៈពេល៧ថ្ងៃ ប្រកបដោយលទ្ធផលដ៏ត្រចះត្រចង់រួចមក នៅព្រឹកថ្ងៃទី១២ ខែតុលា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញធ្វើដំណើរចាកចេញពីតំបន់លំហែកាយមាត់សមុទ្រកោះបាលី សាធារណរដ្ឋឥណ្ឌូនេស៊ី ក្នុងដំណើរមកកាន់រាជធានីភ្នំពេញ ព្រះរាជាណាចក្រកម្ពុជា។ អញ្ជើញជូនដំណើរសម្តេចតេជោ នាយករដ្ឋមន្រ្តី នៅអាកាសយានដ្ឋានអន្តរជាតិ ង៉ូរ៉ារ៉ៃ កោះបាលី សាធារណរដ្ឋឥណ្ឌូនេស៊ី រួមមាន ឯកឧត្តម រ៉ូដាតារា រដ្ឋមន្រ្តីក្រសួងទំនាក់ទំនង និងព័ត៌មានវិទ្យាឥណ្ឌូនេស៊ី ឯកឧត្តម ហោ ណាំបូរ៉ា ឯកអគ្គរាជទូតវិសាមញ និងពេញសមត្ថភាព របស់ព្រះរាជាណាចក្រកម្ពុជា ប្រចាំសាធារណរដ្ឋឥណ្ឌូនេស៊ី ព្រមទាំងឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាលឥណ្ឌូនេស៊ី និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណរដ្ឋឥណ្ឌូនេស៊ី ជាច្រើនរូប។
