សម្តេចតេជោ ហ៊ុន សែន អញ្ជើញជួបពិភាក្សាការងារជាមួយ ប្រធានប្រតិបត្តិនៃតំបន់រដ្ឋបាលពិសេសម៉ាកាវ

នៅវិមានសន្តិភាព រសៀលថ្ងៃអង្គារ ០៩រោច ខែពិសាខ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី០៧ ខែឧសភា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញទទួលជួបពិភាក្សាការងារជាមួយលោក ឈុយ សៃអន Chui Sai on ប្រធានប្រតិបត្តិ នៃតំបន់រដ្ឋបាលពិសេសម៉ាកាវ។

លោក Chui Sai on បានគោរពជម្រាបជូនសម្តេចតេជោ ហ៊ុន សែន ថា តំបន់រដ្ឋបាលពិសេសម៉ាកាវបានទទួលនូវការគាំទ្រពីរដ្ឋបាលថ្នាក់កណ្តាលដើម្បីបង្កើតតំបន់ទេសចរណ៍ និងអនុវត្តតាមគោលនយោបាយខ្សែក្រវ៉ាត់មួយផ្លូវមួយ ក្នុងន័យនេះលោកក៏បានឆ្លៀតជម្រុញតាមគោលនយោបាយនេះ ដើម្បីពង្រឹងពង្រីកកិច្ចសហប្រតិបត្តិការតំបន់សេដ្ឋកិច្ចពិសេសម៉ាកាវ និងប្រទេសដ៏ទៃទៀត ដោយឡែកជាមួយនឹងកម្ពុជាតំបន់រដ្ឋបាលពិសេសម៉ាកាវបានចុះហត្ថលេខាលើអនុសារណៈនៃការចងសម្ព័ន្ធមេត្រីភាពជាមួយទីក្រុងសៀមរាបកាលពីឆ្នាំទៅ ហើយក៏បានចុះអនុសារណៈពង្រឹងកិច្ចសហប្រតិបត្តិការជាមួយកម្ពុជាដែរ កាលពីម្សិលមិញនេះជាមួយក្រសួងការបរទេស។ លោកក៏បានជម្រាបជូនសម្តេចថានៅពេលនេះ ទំនាក់ទំនងរវាងតំបន់រដ្ឋបាលម៉ាកាវ និងកម្ពុជាកំពុងតែមានទំនាក់ទំនងល្អហើយចំនួនទេសចរណ៍មកកាន់កម្ពុជាក៏កំពុងមានកាន់តែច្រើនឡើងផងដែរ ក្នុងន័យនេះលោកក៏បានគោរពសុំអនុសាសន៍ពីសម្តេចតេជោ ដើម្បីធ្វើយ៉ាងណាជំរុញ ពង្រឹងពង្រីកិច្ចសហប្រតិបត្តិការរវាងតំបន់ម៉ាកាវ និងកម្ពុជា អោយកាន់តែរឹងមាំថែមទៀត។