ព្រះមហាក្សត្រ​សព្វព្រះរាជហឫទ័យស្តេច​យាង​​ជាព្រះ​​រាជាធិបតីក្នុង​ពិធីរម្លឹក​ខួបលើកទី​២៥ឆ្នាំ នៃការបង្កើត មន្ទីរពេទ្យ​គន្ធបុប្ជា និងសម្ពោធ​អគារមជ្ឈ​មណ្ឌល​ព័ត៌មាន នៃមន្ទីរពេទ្យគន្ធបុប្ជា

ព្រះករុណា ព្រះបាទ​សម្ដេច​ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជា​ណាចក្រកម្ពុជា និង​សម្តេច​ព្រះ​មហាក្សត្រី ព្រះវររា​ជមាតាជាតិខ្មែរ ព្រមទាំង​ដោយ​មាន​ការ​អញ្ជើញ​ចូលរួ​ម​ពីសម្ដេច​ចៅហ្វាវាំង គង់ សំអុល ឧប​នាយក​រដ្ឋមន្រ្ដី រដ្ឋមន្រ្ដីក្រសួង​ព្រះបរមរាជវាំង និង​សម្ដេច​កិត្ដិព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទ​ ក្រហមកម្ពុជា ​បាន​យាង និងអញ្ជើញចូលួ​មក្នុងពិធី​រម្លឹកខួប លើកទី២៥ឆ្នាំ នៃការ​បង្កើត​មន្ទីរ ពេទ្យគន្ធបុប្ជា និង សម្ពោធ​អគារ​មជ្ឈមណ្ឌល ព័ត៌មាន នៃមន្ទីរពេទ្យ គន្ធបុប្ជា កាលពីព្រឹក​ថ្ងៃទី​១៥ ខែវិច្ឆិកា ឆ្នាំ២០១៧។

ព្រះករុណា ព្រះបាទ​សម្ដេច​ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណា​ចក្រកម្ពុជា បាន​មាន​ព្រះរាជ​បន្ទូល​កោតសរសើរ​ចំពោះ​លោកសាស្រ្ដាចារ្យ Beat Richner វេជ្ជបណ្ឌិត គ្រូពេទ្យ និងបុគ្គលិក​បម្រើការ​ទាំងអស់​នៅក្នុង មន្ទីរពេទ្យ​កុមារគន្ធបុប្ជា ដែលបាន​យកចិត្ត​ទុកដាក់ក្នុង​មនោសញ្ចេតនា​ស្រលាញ់រាប់ អានកុមារ​មានជំងឺ និងស្រ្ដី​មានផ្ទៃពោះ ហើយបាន​ខិតខំ​បំពេញ​ភារកិច្ច​បាន​ល្អប្រសើរ ក្នុងការ​ជួយសង្គ្រោះ​កុមារ​កម្ពុជា​ច្រើន​លាននាក់ និងស្ដ្រីមួយ​ចំនួន​ឱ្យរួច​ផុត ពីជំងឺ​ផ្សេងៗ ដែលជា​កត្ដា​ជំរុញអ​ភិវឌ្ឍន៍​វិស័យ​ធនធាន​មនុស្ស សម្រាប់កសាង​សង្គម​ជាតិនា​ពេល​បច្ចុប្បន្ន និងទៅអនាគត។
ព្រះករុណា មាន​ព្រះរាជ​​បន្ទូល​​បន្ដថា ចាប់តាំង​ពីឆ្នាំ១​៩៩២​មក មូល​និធិ​កុមារ​គន្ធ​បុប្ជា ដោយ​មាន​ការ ឧបត្ថម្ភ​គាំទ្រពី រដ្ឋាភិបាល​ស៊្វីស និងសប្បុរសជនស៊្វីស ព្រមទាំងសប្បុរសជនជាតិ និងអន្ដរជាតិ ផ្សេងទៀត ជាពិសេស​លោក​សាស្រ្ដាចារ្យ Beat Richner បានកសាង​មន្ទីរពេទ្យ​គន្ធបុប្ជា​ចំនួន​៥កន្លែង នៅរាជធានីភ្នំពេញ និងខេត្ដសៀមរាប សម្រាប់​ទទួលកុមារ ស្រ្ដីមានផ្ទៃពោះ និងស្រ្ដីមាន ជំងឺមកពិនិត្យ សម្រាក​ព្យាបាលបា​នច្រើន​លាននាក់​ដោយ​មិនយកថ្លៃ។ នេះជាសក្ខីភាព​បញ្ជាក់​ឱ្យឃើញ​នូវ​ទំហំ​នៃ ទឹក​ចិត្ដ​មនុស្សធម៌ ដ៏ជ្រាល​ជ្រៅបំផុត​របស់​លោក​សាស្រ្ដាចារ្យ រដ្ឋាភិបាល​ស៊្វីស សប្បុរសជនស៊្វីស ព្រមទាំងស​ប្បុរស​ជន ជាតិ និង​អន្ដរជាតិផ្សេងៗទៀត ចំពោះ​ប្រជាជន​កម្ពុជា ព្រមទាំង​លើផ្នែក ផ្ដល់​សេវាសុខ​ភាព​កុមារ និងស្រ្ដីផងដែរ។

ព្រះករុណា ព្រះមហាក្សត្រ ក៏បាន​ថ្លែងអំណរព្រះរាជ​គុណ​​ចំពោះការ​ខិតខំប្រឹង​ប្រែង​របស់រាជ​រដ្ឋាភិបាល​កម្ពុជា ដើម្បីអភិវឌ្ឍន៍ វិស័យ​សុខាភិបាល លើកកម្ពស់​សុខុមាលភាព របស់ប្រជាពលរដ្ឋ​នៅទូទាំង ព្រះរាជាណា​ចក្រកម្ពុជា ជាពិសេស​តាមរយៈ​សកម្មភាព​របស់​មន្ទីរ​ពេទ្យគន្ធបុប្ជា ដែលបាន​រួមចំណែកថែរក្សា ការពារ​សុខភាព​ស្រ្ដី និងកុមារ ក្នុងរយៈពេល២៥ឆ្នាំ​កន្លងមកនេះ។

ព្រះអង្គ​​បាន​ថ្លែង​អំណរ​គុណ​ចំពោះសម្ដេចអគ្គ​មហាសេ​នាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រ​កម្ពុជា ដែល​បានផ្ដល់​ដីដ៏​ធំមួយ​កន្លែង​នៅក្នុងខេត្ដ​សៀមរាប សម្រាប់​កសាងមន្ទីរ​ពេទ្យជ័យ​វរ្ម័នទី៧ កាលពីឆ្នាំ​១៩៩៨ និងបាន​ជួយ​ឧបត្ដម្ភ ថវិកាជាច្រើនលានដុល្លារសហរដ្ឋអាមេរិក ក្នុងមួយឆ្នាំៗ ព្រមទាំង​បាន​បង្ក​លក្ខណៈ​គ្រប់បែប​យ៉ាងដល់​មូលនិធិ​មន្ទីរ​ពេទ្យកុមារ​គន្ធបុប្ជា ក្នុងការក​សាងមន្ទីរពេទ្យ កុមារគន្ធបុប្ជា។ កាយវិកាដ៏ឧត្តុង្គ​ឧត្តមនេះ បានបង្ហាញនូវការ​យកចិ​ត្ដទុកដាក់​ខ្ពស់របស់​ថ្នាក់ដឹកនាំ និងសប្បុរសជនជាតិ អន្តរជាតិ ចំពោះសុខភាព​កុមារ ដែលជាទំ​ពាំងស្នង​ឫស្សីទៅ​ថ្ងៃអនាគត។

ក្នុងឱកាស​នេះដែរ ព្រះករុណា ព្រះបាទសម្ដេច​ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជា​ណា​ចក្រកម្ពុជា បាន​ចូលរួ​មវិ​ភាគទា​ន​ព្រះរាជ​ទ្រព្យចំនួន ១០.០០០ដុល្លារ​សហរដ្ឋ​អាមេរិក និងសម្តេច​ព្រះមហាក្សត្រី ព្រះវររាជមាតាជាតិខ្មែរ ក៏បានចូលរួ​មវិភាគទានព្រះរាជ​ទ្រព្យចំនួន ១០.០០០ដុល្លារសហ​រដ្ឋអាមេរិក ជូនចំពោះមូល​និធិមន្ទីរ​ពេទ្យកុមារ​គន្ធបុប្ផាផងដែរ។

ឯកឧត្តម ម៉ម ប៊ុនហេង រដ្ឋមន្រ្ដីក្រសួង​សុខាភិបាល​បានលើក​ឡើងថា ក្នុងរយៈពេល ២៥ឆ្នាំ​កន្លងមកនេះ មូលនិធិគន្ធបុប្ជា ដែលមាន​លោកវេជ្ជ​បណ្ឌិត Beat Richner បានពង្រីក ទីតាំង​មន្ទីរ​ពេទ្យបាន ចំនួន៥សាខា នៅក្នុង​រាជធានីភ្នំពេញ និងខេត្ដសៀមរាប ដែលបំពាក់​ទៅដោយ​ឧបករណ៍​បច្ចេកវិទ្យា វេជ្ជសាស្រ្ដ បរិក្ខារ​ពេទ្យទំនើបៗ និងមាន​​​គ្រែ​សរុបចំនួន ២.១៥៩គ្រែ ក្នុងនោះ​ផ្នែក​សម្ភព មានចំ​នួន​២២០គ្រែ ព្រមទាំង​មានបុគ្គលិកក​ម្ពុជាចំនួន ២.៥០០នាក់ កំពុង​បម្រើកា​រងារ ដើម្បីផ្ដល់​សេវា សុខភាព ព្យាបាលកុមារ និងស្រ្ដី​មានផ្ទៃពោះ ប្រកប​ដោយវិជ្ជាជីវៈ គុណភាព និងប្រសិទ្ធភាព​ដោយ ឥតគិតថ្លៃ ដែលមានអត្រា​គ្របដណ្ដប់ លើកុមារទូទាំង​ប្រទេស។

ឯកឧត្តម​បានបន្ដថា ក្រៅពីការ​ពិនិត្យ និ​ងព្យាបាល​ជំងឺ​មន្ទីរពេទ្យ គន្ធបុប្ជា បានដើរតួនាទី​យ៉ាងសំខាន់ ក្នុង​ការបណ្ដុះ​បណ្ដាលផ្នែក​វេជ្ជសាស្រ្ដ ឯកទេសកុមារ ហើយបា​នក្លាយទៅ​ជាមន្ទីរពេទ្យ​សកលវិទ្យាល័យ ដែលបាន​ជួយ​បណ្ដុះបណ្ដាល​និស្សិត​ពេទ្យបាន យ៉ាងច្រើនថែម​ទៀតផង។

សូមបញ្ជាក់ថា៖ គិតរហូត​មកដល់បច្ចុប្បន្ននេះ មន្ទីរពេទ្យគន្ធបុប្ជាបាន​ទទួល ពិនិត្យកុមារ និងស្រ្ដី មានផ្ទៃពោះ​ នៅផ្នែក​ពិគ្រោះជំងឺក្រៅបាន​ចំនួន១៦.៨២២.២២៥ករណី បានព្យាបាល កុមារសម្រាក ក្នុងមន្ទីរពេទ្យ​បានចំនួន១.៨៥៣.៥១០នាក់ និងសម្រាលបុត្រ បានចំនួន ២៤៥.៥៩៦នាក់ និងចំណាយថវិកា សរុបប្រមាណ៦៣២លានដុល្លារ៕

ពត៌មានទាក់ទង

ពត៌មានផ្សេងៗ